Ezayi
Laadíná
Wɩ́laabʋllɔ nɔhɔ̃́ oro fa mɩŋ Zerizalɛmɛ mɛ́, ʋ yɩr dí Ezayi. Ɛ́ yɩr nɛ́ ká kɛnɔ né má yɩr. Yɩrɛ́ há pérú, rʋ́ʋ́ lá Wɩɩsɛ nʋɔ wɩ́ɛ́ a bʋl, bɩŋsɛ zɔwalpɛ rɩ́ mɛɛ́sɛllɛ (740) tɛ́ŋ mɛ́ nɛ́, rɩ́ ɓa há wɩ Zeezi lʋ́lɛ́. Ʋ la wɩ́ɛ́ a bʋl a peri bɩŋsɛ mɛɛ́sɛllɛ. Wɩ́ɛ́ ná há mɩŋ kɛnɔ né sɩɛrʋ bɩŋsɛ luŋó kɩ́ŋkáŋ: bɩŋsɛ zɔwɛllɛ (200), rɩ́ ɓa há wɩ Zeezi lʋ́lɛ́. Ɛ́ kɛnɔ caksɛ cɔrɛ zeŋse botoro ní. Ɓa sɩɛrʋ wɩ́ɛ́ tɛ́ŋ (cɛ́rsɛ) ká bammawa rɛ́.
Dʋ́ŋdʋ́ʋ̃́ dɩhɩ̃́, sapítir 1 a kaá mʋ́ sapítir 39, wɩ́laabʋllɔ Ezayi bʋ́lɔ́ pá nɩɛ rɩ́wɔ́ zɩŋ rɩ́ Nyuutɩna Wɩɩsɛ cɔ́ɛ́ wɛ́ bɩbáwɩ́ɛ́ ná rɩ́ gɩrágɩrá ná arɩ́ nʋmáánɛ wɩ́'állɛ ná haá tʋŋ tɔ́ɔ́ ná sɩɛrʋ. Wɩɩsɛ ká pár (kɔ́ʋ́ dʋŋɔ), ʋ nɛ́ ká tíé (dúníé) wuu kuóro. Ʋ wʋ́ʋ́ nɩɛ arɩ́ duówa ná naŋá nɩɛ wɩ́bɔma píí cɛ́wɔ́. Wɩɩsɛ tɩɩ sɩ́ yiki Asiiri nɩɛ rɩ́ Babɩlɔɔnɛ nɩɛ rɩ́wɔ́ isí cɩ́nʋ́ nɩɛ mɛ́. Amá arɩ́ ɛ́ wɩhála má wuu, Wɩɩsɛ pá ŋmɛ́nɔ́ rʋ́ʋ́ nɩɛ há wólli bɩr kóú rí. Ká rɩ́ cɛ́rɛ́ nɔ́ŋɔ ko, rɩ́ nɩɛ wuu ké tɛŋfɩ́ɛ́l sɩɛrʋ.
Bʋllɛ dɩhɩ̃́, sapítir 40 a kaá mʋ́ sapítir 55, cɛ́rɛ́ ná mɛ́ ɓa há kɛ́sɛ́ Ziida nɩɛ wuu a mʋ́ Babɩlɔɔnɛ wɩ́ɛ́ nɛ́ mɩŋ ráŋ. Ɓa sɩɛrʋ fa zɔkɔ́ weri, ɓa baá fa wɩ yɩɛlá wuu kéné. Ɛ́ nɛ́ Wɩɩsɛ wɩ́laabʋllɔ sɩɛ́ cáárɛ labaarɩwero né a pɔ́wɔ́, a bʋ́lɛ́ rɩ́ Wɩɩsɛ sɩ́ lɔ́wɔ́ a tá bɩbára nɛ́sɛ mɛ́, ká káŋwɔ́ a bɩrɛ ko Zerizalɛmɛ. Wɩɩsɛ nɛ́ ká wɩ́ɩ́ nyúútɩ́na, ʋ sɩɛ́ có rʋ́ʋ́ tɩŋ Ɩzɩrayɛl nɩɛ mɛ́ nɛ́, a hé barka a pá duówa ná naŋá. Dɩhɩ̃́ né ɓa bʋl “Nyuutɩna Wɩɩsɛ tʋtʋnnɔ” wɩ́ɛ́ a cesi náŋá. Ʋ wɩ́ɛ́ nyɩ́ɩ́sɛ Nʋtal Bɩnɛ́ kɛnnɛ ná sɩɛrʋ weri.
Botoro nyúú mí dɩhɩ̃́, sapítir 56 a kaá mʋ́ sapítir 66, máŋsɔ́ rɩ́ nɩkɛ́sɛ ná ɓɩkana nɛ́ bɩrɛ a mʋ́ jɩɩsɛ. Wɩ́laabʋllɔ ná bʋl fɩ́ɛ́lɛ́ tapʋ́l rɩ́ vʋka arɩ́ wɩsʋlɔ́ wɩ́ɛ́ a tɩ́ɩ́rɛ weri. Wɩɩsɛ bʋ́lɔ́ a pɔ́ʋ́ nɩɛ pʋmmɩ́, rʋ́ʋ́ sɩ́ hé bárka a pɔ́wɔ́, rɩ́ ɓa nɛ́ cɩ́nɛ́ tɩ́kʋ́. Amá ɛ́ liŋó sɩɛ́ fa wɩ Ziida nɩɛ dʋŋɔ nɛ́ cáásɛ. Ʋ fa tɩ́ɩ́nɛ dúníé wuu mí ní. Ɓa má sɩ́ wólli tɩŋ dí baŋfɛlɔ ná rɩ́ tífɛlɔ ná Wɩɩsɛ há sɩ́ a wér:
Nyuutɩna Wɩɩsɛ sɛ́: