20
1 Dɩvɛ́ŋ ɔ́ɔ́ nɩɛ a nɩmɔ́nná, sɩduoru ɔ́ɔ́ nɩɛ kʋ́kɔ kʋɔllɛ;Nɛrɔ ná há lóé ɓaá búkú, ʋ wɩ zɩmɛ́ wuó ná.
2 Kuóro cɔwɩɩlɔ́ kéŋ héwíŋ anɛ kɩŋkána uuré ní.
Nɛ́ŋ ná há púsú cɔ́ɛ́, ʋʋ́ ja sʋʋ nɛ́.
3 Nɛ́ŋ ná há fɛ́ɛ́ aá kɛkɛ nɛsɛ mɛ́, ʋʋ́ zílú tɩɩ nɛ́,
amá nɩcʋʋlɛ́ é wuu wɩ́cɩ́tɩkɩ́ nɛ́ ɛ́.
4 Waarʋ wɩ́ɛ́ nɛ́, tɛŋwɩtɩɩnɔ waá parɛ;
amá onni kʋsɛ́ tɛ́ŋ mɛ́, ʋʋ́ sɩ́sʋl ká wɩ óŋ ná.
5 Nɩbííno sabɩŋsɛ de nɛ nyiluŋe ní,
nɛ́ŋ ná há kéŋ wɩ́zɩmɛ dʋŋɔ nɩ́ wówó lúksi aá lɩ́sɛ.
6 Nɩɛ ɓɩkana tɩɩ nɩ́ɩ́ bʋ́lwɔ́ nɩcɩ́tɩkɔ́ wɩ́ɛ́,
amá áŋ rɛ́ wo nɩtaŋá aá zɩŋ?
7 Nɩtaŋá va tékétéké sɩɛrʋ nɛ́,
ʋ bɛlɛ ná wér ʋ sʋʋ har mɛ́!
8 Rɩ kuóro nɛ́ kúó ké kuóɓasa daha rʋ́ʋ́ dí saríya;
wɩ́ɩ́ ná wuu há bɔ́mɔ́ nɛ́, ʋ nɩ́ná.
9 Áŋ rɛ́ sɩ́ wólli bʋlɛ́: «Ŋ sɩɛrʋ pʋ́mmɔ́,
ŋ é wɩ wɩ́bɔ́ŋ kené?»
10 Nyuutɩna Wɩɩsɛ bɛ́rɛ
dɔ́wɩ́kérse bɛllɛ, arɩ́ oŋkaamáŋsɛ bɛllɛ há ká bámmáwa.
11 Ɓaá tɩŋ heŋbie wɩ́'állɛ mɩ́ nɛ́, a wáárɛ zɩŋ
rʋʋ sɩ́ ká málwero, a a nɩtaŋá.
12 Dɩlla ná háá zesi wɩ́ɛ́, sɩ́ɛ́ ná háá belé,
Nyuutɩna Wɩɩsɛ nɛ́ ɔ́wɔ́ wuu bɛllɛ.
13 Sɩ́ dóŋ pɩ́nɛ cóllú, rɩ́ɩ́ háá ko yaarɛ;
wúrí sɩ́ɛ́, ɩ sɩ́ dí a vɔkɛ.
14 Yɩ́yɔɔrɔ́ bʋlɛ́: «Ɓa wɩ weri, ɓa wɩ weri»;
amá rʋʋ gɩ́ɩ́kɔ́, ʋ jɩ́jʋɔsɛ ʋ há ná mɔlɛ́.
15 Salmɛ arɩ́ jɩktáwa kánɔ́;
amá wɩ́ɛ́ zɩmɛ́ bʋlɛ́ nɛ́ weré kɩ́ŋkáŋ.
16 Lá nɛrɔ ná há cɩ́ naa a dí kɩŋ a pá nɩhʋɔrɔ gɛrɔ,
lɔ́ʋ́ óŋ a bil, ʋ há wɩ háhʋɔrɔ ná ɛ̃ wɩ́ɛ́.
17 Nyɩɛrɔ ɓɩdííle wéró ʋ púle mí, a pá tɩ́na,
amá ʋ dɩtenní, ʋʋ́ bɩrmɛ hɩɛla nɛ́ a súú nʋɔ.
18 Cáánɩwere nɩ́ɩ́ a jáŋwa dídí,
rɩɩ́ mʋ́ lal, ɩ lo rɩ́wɔ́ cáánɩ́ wérí.
19 Nɩlaŋwɩbʋllɔ, ʋʋ́ yɛ́llɛ wɩ́féŋse,
fá kɛkɛ wɩ́kaŋbʋllɔ mɛ́.
20 Nɛrɔ ná há bʋ́rɛ́ aá hóú áná arɩ́rʋ́ maá mɛ́,
ʋʋ́ sʋ́wʋ́ anɛ caanɔ́ há dʋ́sɛ́ bíno sɩɛrʋ nɛ́.
21 Nɛrɔ há já ɓɩɛ kɩ́kɛ́lɛ,
ɓaá tenni kɩ́kɛ́lɛ nɛ́.
22 Sɩ́ nyɛ bʋ́lʋ́: «Ŋ sɩ́ a bɔ́ŋbɔ́ŋ a túŋ bɔ́ŋbɔ́ŋ ná ɓa há áŋ mɛ́.»
Yɩɛlɛ Nyuutɩna Wɩɩsɛ, ʋ sɩ́ lɛ́ɩ́ a tá.
23 Nyuutɩna bɛ́rɛ nyɩɛrʋ dɔ́wɩ́kérse,
ʋ wɩ oŋkaakérse ná há wɩ cɛ́rɛ́ có.
24 Nyuutɩna Wɩɩsɛ nɩ́ɩ́ tɩɛsɛ nɩbííno,
rɩ́ ɛ́ ráá, nɩbííno a ɛ rɛɛ́, káá zɩ́mʋ́ dɩmʋ́ɩ́?
25 Nɩbííno há wɩ bɩɩnɛ ká bʋlɛ́: «Ʋʋ́ kísú», ɛ́ ká bárá nɛ́ a pɔ́ʋ́,
anʋ́ há wɩ bɩ́ɩ́nɛ́ ká tá nʋɔ.
26 Kuóro ná há kéŋ zɩmɛ́, ʋʋ́ kiri sahɔɔtɩɩna,
ká a ɓaá gɛ́rwɔ́.
27 Nɩbííno sabɩɩna ká caanɔ́ rɛ́, Nyuutɩna Wɩɩsɛ píí pɔ́ʋ́
aá cáánʋ́ sɩɛrʋ wuu.
28 Kuóro nɩcɩ́tɩkɔ́ arɩ́rʋ́ sawér nɩ́ɩ́ kɛ́rʋ́ mɛ́,
nɩcɩ́tɩkɔ́ nɛ́ kɔ́ʋ́ kuorí dóé.
29 Dóé ní ká heŋbiwafɛlɛ yɩr,
ká bánɩ́ɩ́náwa má yɩr nɛ́ kɔ́wɔ́ nyúpʋ́pʋŋsɛ.
30 Fʋrʋ rɩ́ cɛllɛ nɛ́ ká bɔ́ŋbɔ́ŋ luri,
ŋmɔwɛ́ zʋ tɛŋ.