19
1 Nɛrɔ há ká nɩyár kaá va tékétéké sɩɛrʋ,ʋ nɛ́ weri nɩcʋʋlɛ́ há ká nyɛtɩ́ŋ.
2 Kajáŋtɩɩnɔ há wɩ wɩ́zɩmɛ kené, ʋ to wɩ́wérí,
Nalʋ́ŋtɩɩnɔ́ nyɔ́rkʋ́ nɛ́.
3 Nɩbííno tɩɩ cʋ́llɛ nɩ́ɩ́ zɔ́kʋ́;
kɔ́ʋ́ dídí cɔ́ɛ́ Nyuutɩna Wɩɩsɛ rɩ́.
4 Kuorí pul naŋnɔ́ŋsɛ,
amá wɩlɩnáárɔ nannɔ́ŋbalá ná má tɩɩ wɩ cɩ́nɛ́ aá tɩ́kʋ́.
5 Dáŋsɩ́ɛ́ nyɛtɩɩnɔ sɩ́ ná tʋrɛ́,
ká nyɛtɩɩnɔ má wɩ bɛŋsɛ́ mɩ́ɩ́ fóri.
6 Nɩɛ ɓɩkaná píŋsi sɩ́dííro ʋ sɩ́ɛ́ mɛ́ nɛ́,
Zilé tɩ́na ká nɛrɔ wuu nannɔ́ŋɔ nɛ́.
7 Nɩyaarɔ lɩkápáwa wuu há bɛ́rʋ́,
ʋ nannɔ́ŋsɛ nɛ́ sɩɛ́ waá fáá kɛ́kʋ́ mɛ́?
Ʋʋ́ jɩ́ja rʋ́ʋ́ bʋl wɩ́ɛ́ ɓa rɩ́, ká wʋ́ɔ́ ná.
8 Nɛ́ŋ ná háá bɩɩnɛ wɩ́ɛ́ wérí, ʋʋ́ ɔ́sʋ́ tɩɩ nɛ́,
nɛ́ŋ ná há kéŋ wɩ́zɩmɛ, ʋ sɩ́ ná wér.
9 Dáŋsɩ́ɛ́ nyɛtɩɩnɔ sɩ́ ná tʋrɛ́;
ká nyɛtɩɩnɔ máá zɔ́kʋ́ tɩɩ nɛ́.
10 Nɩcʋʋlɛ́ rɩ́ wér sɩɛrʋ mɩnɛ́ há wɩ cɛ́rɛ́,
yómo há lá kuóbɛlɛ sɩ́ɛ́, ʋ ráá sɩɛ́ wɩ bɔŋ wuu!
11 Nɛrɔ ná há ɛ̃ wɩ́ɛ́, wɩ cɔ́ɛ́ dí kɩ́kɛ́lɛ́,
ʋ yɩr wɩ́ɩ́ nɛ́ kɔ́ʋ́ há wɩ bɔ́ŋbɔ́ŋ píé aá bílú sɩɛrʋ.
12 Kuóro cɔwɩɩlɔ́ dé nɛ́ kɩ́ŋkáná uuré ní,
amá ʋ sawér nɩhɩ̃́ nyɛlɔ nɛ́ nyɔ́ɔ́ daha.
13 Bicʋʋlɛ́ kɔ́ʋ́ áná wɩɩla nɛ́,
Hánɛnaarɔ nɛsɛ waá tenni anɛ fɩfɛcuuró háá líŋ díŋderé.
14 Ɩ wo jaa arɩ́ kuóɓɩɛ aá ná rɩ́wɔ́ ɛ́ɛ́ ánáwa liwe,
amá hásabɩɩna tɩ́na ká Nyuutɩna Wɩɩsɛ zilé ní.
15 Tɛŋwɩ́l gbɛ́l nɩbííno,
ká nɛ́ŋ ná há wɩ tʋmɛ́ ja, ʋ nɛ́ ká losu nɩkanɩ́.
16 Nɛ́ŋ ná háá tɩŋ wɩ́makɛ́, ʋʋ́ kɛ́rʋ́ mɩɩsɛ mɛ́ nɛ́;
nɛ́ŋ ná há wʋ́ʋ́ tɩɩ kanɛ́ ɛ̃, ʋʋ́ sʋ́wɛ́ nɛ́.
17 Nɛ́ŋ ná há pi omo a pá nɩyaarɔ, ʋ pá Nyuutɩna Wɩɩsɛ nɛ́;
Wɩɩsɛ nɛ́ sɩ́ túŋ tɩ́na.
18 Pi fól cáánɩ́ bio rʋʋ ha wɩ déré;
amá sɩ́ ló rɩ́ɩ́ cɔ́ɛ́ ko wɩɩ daarɛ, rɩ́ɩ́ jɩ́jɔ́ʋ́ ɓʋ́ɩ́.
19 Nɛ́ŋ ná cɔ́ɛ́ há zeno, ʋʋ́ túŋ dɩlmɩlmɔ́ kɩŋ nɛ́,
rɩɩ tɔ́ʋ́, ɩɩ́ yíkú rʋ́ʋ́ ɔsɛ aá a nɛ́.
20 Zesi cáánɛ, a saŋ makɛ́;
a makɛ rɩ́ɩ́ ka zɩmɛ́.
21 Nɩbííno jáŋwa é káŋ;
amá Nyuutɩna Wɩɩsɛ há sʋ́ʋ́ ná, ʋ nɩ́ɩ́ cɩ́nɛ́.
22 Ɓa háá jɔ́ʋ́ ná nɩbííno wuu rɩ́, ʋ nɛ́ ká nɩcɩ́tɩkɔ́,
nɩyaarɔ weri nyɛtɩɩnɔ.
23 Nyuutɩna Wɩɩsɛ fɛ́ɛ́ kéŋ waana;
ʋʋ́ kɛ́rɛ wɩɩla mɛ́, ká rɩ́ɩ́ pɛ́ dóŋ vɔkɛ.
24 Tɛŋwɩtɩɩnɔ́ hóú nɛ́sɛ ɓɩdííle gbaŋa mɛ́,
amá, ʋ kaa mʋ́ʋ́ nʋɔ má dé ká wɩ́nɩɩlɩ́ nɛ́.
25 Ŋmɔwɛ nɩmɔnnɔ, rɩ́ nɩcʋʋlɛ́ má tɩŋ ɛ́ mɛ́, a zɩ́mʋ́ tɩɩ kanɛ́;
cáánɛ wɩ́zɩnnɔ, ʋ sɩ́ nɛ wɩ́ɛ́ mʋ́ʋ́la.
26 Bio ná háá bɛ́ŋsʋ́ áná, ká kírú maá aá tá,
ʋ ká hɩɩ̃sɛ bio ní, ʋʋ́ zɔkɛ yɩr.
27 Ŋ bíí, vɛ cáánɛ ná ɩ háá zesé,
rʋ́ʋ́ kánɩ́ kɛkɛ wɩ́ɛ́ zɩmɛ́ mɛ́.
28 Dáŋsɩ́ɛ́ nɛrɔ ná há ká nɩkɔsɔ, ʋ sɩ́ɛ́ to yɛ́rɛ́ mɛ́;
wɩ́bɔmɔ ŋmɔ́ŋ sahɔɔtɩɩna nʋʋsɛ mɛ́.
29 Nɩmɔnna sɩ́ ná tʋrɛ́;
ká rɩ nɩcʋ́llɛ má daguŋsi ná ŋmɔwɛ́.