18
1 Nɛ́ŋ ná há wʋ́ʋ́ tɩɩ kené aá hé nɩɛ sɩɛrʋ, ʋʋ́ jɔ́ʋ́ dʋŋɔ wér ní;rɩ ɓaá já rɩ́wɔ́ cáánʋ́, ʋ cɔ́ɛ́ de wɩ́wɛ nɛ́.
2 Nɩcʋʋlɛ́ wɩ wɩ́ɛ́ mʋ́ʋ́la nɩɩ̃́ ja,
amá ʋ sabɩɩna wɩ́ɛ́ nɛ́ ʋ makɛ aá pá nɩɛ.
3 Sahaksɩ́ nɛ́ kéŋ nɩguonó aá ko;
ká nɩtʋksɛ má ka hɩɩ̃sɛ aá ko.
4 Nɩbííno nʋɔ wɩ́bʋlɛ́ nɩhɛ̃́ nyiluŋe ní;
ká zɩmɛ́ maá pá waana anɛ polcʋ́ɔ́rɛ nyigíre.
5 Ʋ wɩ cɛ́rɛ́ rɩ́wɔ́ pɛ́ sahɔɔtɩɩnɔ mɛ́,
ká vʋʋrɛ vɔŋ nɩtaŋá.
6 Nɩcʋʋlɛ́ wɩ́bʋlɛ́ kéŋ nɛsɛ;
ʋ nʋɔ kéŋ daŋmɔwɛ.
7 Nɩcʋʋlɛ́ nʋɔ nɩ́ɩ́ zɔ́kʋ́;
ʋ wɩ́bʋlɛ́ nɛ́ ká bárá aá kánʋ́.
8 Zaŋbatɩɩnɔ wɩ́bʋlɛ́ nɩhɩ̃́ ɓɩdípʋʋrɛ́ nɛ́,
ɓaá zʋ tɛŋ wérí.
9 Nɛ́ŋ ná há wɩ tʋmɛ́ ja,
ʋ maábinɔ́ŋɔ nɛ́ ká nɛ́ŋ ná há kené aá zɔkɛ.
10 Nyuutɩna Wɩɩsɛ yɩr ná ká dɩduo ní,
Nɩtaŋá yúólú mí a de mɩŋ tɛŋfɩ́ɛ́l mɛ́.
11 Ɓɩɛ tɩ́na kuóɓɩɛ nɛ́ kɔ́ʋ́ dóé,
ʋ sabɩɩna mɛ́, ɓa nɛ́ kɔ́ʋ́ zekɛ́rgbó.
12 Rɩ nɩbííno nɩ́ɩ́ nyʋ́kʋ́ tɩɩ, ʋ zɔkɛ́ nɩ́ káánɛ́,
Múúríŋtɩɩ nɩ́ɩ́ la yɩjɔɔ sɩ́ɛ́.
13 Nɛrɔ ná há wɩ zésé kaá lɩ́sɛ nʋɔ,
cʋ́llʋ rɩ́ hɩɩ̃sɛ nɩ́ɩ́ dúú.
14 Nɩbííno sabɩɩna nɩ́ɩ́ pɔ́ʋ́ dóé ʋ pʋɔlɩ́ sɩɛrʋ,
amá rʋʋ sabɩɩna nɛ́ vúkmé, áŋ rɛ́ sɩ́ dúórú naasɛ?
15 Nɛ́ŋ ná há kéŋ wɩ́zɩmɛ, ʋʋ́ ná wɩ́ɛ́ zɩmɛ́;
ká zɩmɛ́ tɩ́náwa jɩ́ja wɩ́ɛ́ zɩmɛ́ zesé.
16 Nɩbííno ná há dí zilé aá pá nɩɛ, ʋ wúri dánnʋʋsɛ nɛ́ aá pɔ́ʋ́,
a kánʋ́ aá mʋ́ nɩpiŋe sɩ́ɛ́.
17 Nɛ́ŋ ná há lá sɩ́ɛ́ a bílú nʋɔ, ʋ nɩ́ɩ́ lá taŋá;
amá ʋ nanáárɩ́nɔ́ŋɔ nɛ́ sɩɛ́ ko máŋsɛ rʋʋ wɩ taŋá kené.
18 Bíyólli níí zá nɛsɛ,
kaá makɛ taŋá tɩ́na nanaara pɛ́kɛ.
19 Maábinɔ́ŋɔ ná ɓa há ɛ́ɛ́ a wʋ́ʋ́ mɛ́, ʋ sɩɛrʋ néé haakɩ́, a kɩ́llɛ tɔ́ɔ́ ná ɓa há sɔ́ɛ́ kɛ́rɛ;
ká nɛsɛ má wɩ́ɛ́ dúókó anɛ kuójaa bonni dɩyakɛ́.
20 Nɩbííno nʋɔ wɩ́bʋlɛ́ nɩ́ɩ́ pɔ́ʋ́ ɓɩdííle,
ʋ líŋwero bʋlɛ́ nɩ́ɩ́ pɔ́ʋ́ vɔkɛ.
21 Sʋʋ arɩ́ waana mɩŋ nɩbííno neŋdulí mí ní;
nɛ́ŋ ná há có wɩ́ɛ́ bʋlɛ́, ʋʋ́ sáŋwɔ́ har wɩ́ɛ́ má.
22 Nɛ́ŋ ná há já hásabɩɩna tɩ́na, ʋ ná wér;
Nyuutɩna Wɩɩsɛ zilé ní ʋ dí a pɔ́ʋ́.
23 Nɩyaarɔ́ bʋl wɩ́ɛ́ káá dú nɛ́sɛ nɛ́,
amá ɓɩɛ tɩ́ná lɩ́sɛ nʋɔ rɩ́ɩ́ dóé ní.
24 Nannɔ́ŋkana wóí wɩɩla sɩɛrʋ aá hé,
amá nannɔ́ŋfɩɛmɔ wér kɛ lɩkápáwa.