17
1 Ɩ há tʋ́ŋ dɩpɛ́ŋ kul hɩlɩ́, ká ka tɛŋfɩ́ɛ́l,ʋ nɛ́ weré a kɩ́llɩ́ há mɩŋ jaa ná há sú ɓɩdíwere mí, ká nɛsɛ mɩŋ ráŋ.
2 Tʋtʋnnɔ ná há kéŋ zɩmɛ́ nɩ́ kɛ bio ná háá hɩɩ̃sɛ nɩɛ,
ɛ́ tʋtʋnnɔ kéŋ liwe ker ʋ maábináŋa sɩɛrʋ.
3 Níŋ ní ɓa pi aá cʋɔrɛ salmɛ arɩ́ wárɛ aá nówó wér,
amá Nyuutɩna Wɩɩsɛ nɩ́ɩ́ kɩ́ɛ́lɛ nɩbííne sabɩŋsɛ wér.
4 Sahɔɔtɩɩnɔ́ zesi nɩbɔma wɩ́bʋlɛ́ nɛ́,
ká nyɛtɩɩnɔ maá zesi nyɛtɩɩna wɩ́ɛ́.
5 Nɛ́ŋ ná háá mɔŋ nɩyaarɔ, ʋʋ́ tʋ́ksʋ́ mɩ́máárɔ nɛ́,
nɛ́ŋ ná háá jʋɔsɛ nɛrɔ nɔ́ŋɔ wɩhála wɩ́ɛ́, ɓa waá píí cɛ́ʋ́.
6 Nihẽ ká naabálwa yɩr nɛ́,
ká ánáwa a bɛlɛ jɛsa.
7 Wɩ́bʋlwero wɩ cɛ́rɛ́ rɩ́ nɩcʋʋlɛ́ nʋɔ,
anɛ ɛ́ nyɩɛrʋ há wɩ cɛ́rɛ́ rɩ́ tɔ́ɔ́ sɩ́dííro nʋɔ.
8 Nɛrɔ ná háá pá zilé onni bɩ́ɩ́nɔ́ rɩ ɓa ká nyúwér rí;
rʋʋ dɩmʋ́ɩ́ wuu, ʋ wɩ́ɛ́ wuu sɩ́ cɛ́rɛ pɔ́ʋ́.
9 Nɛ́ŋ ná há pá wɩ́ɛ́ aá tá, ʋ kéŋ nannɔ́ŋsɛ,
Nɛ́ŋ ná há lá wɩ́ɛ́ aá bílú sɩɛrʋ, ʋ tɩ́ná zɔkɛ nannɔŋnɩ́.
10 Ɩ há cáánɛ wɩ́zɩnnɔ naasɩ́ balá, ʋ kéŋ nyʋɔrɛ́,
a kɩ́llɩ́ há ŋmɔ́wɛ́ nɩcʋʋlɛ́ dagoo naasɩ́ zɔlɔ.
11 Nɩtɔk wɩ wɩ́jaalɩ́ nɔ́ŋ kené, a pɛ́ bɩ́ɩ́lɛ mɛ́;
amá ɓa sɩ́ tʋŋ nɩbɔmɔ rʋ́ʋ́ ko bɛ́ŋsʋ́.
12 Ɩ há céŋ ursi hásʋɔna rʋʋ bɛlɛ tóú lakaa,
ʋ nɛ́ wérí há céŋ nɩcʋʋlɛ́ rʋʋ ɔ́ʋ́ nɩcʋ́lwɩ́ɛ́.
13 Nɛ́ŋ ná há pí bɔ́ŋbɔ́ŋ aá túŋ wérí,
bɔ́ŋbɔ́ŋ wʋ́ʋ́ jaa mɩ́ɩ́ kaasɛ.
14 Nɛsɛ púle nɩhɛ̃́ nyii kɛ́rɛ há cɔ́rɛ nɛ́,
sɩɛ́ kʋ́ʋ́rɩ́ tɩɩ rɩ nɛsɛ ha wɩ púlé.
15 Nɛ́ŋ ná há lá taŋá aá pá sahɔɔtɩɩnɔ arɩ́ nɛ́ŋ ná há lá nyɩɛrʋ aá pá nɩtaŋá;
Nyuutɩna Wɩɩsɛ bɛ́rwɔ́ wuu bɛllɛ.
16 Meéwi tʋtʋmɩ́ nɛ́ beé, nɩcʋʋlɛ́ nɛ́sɛ mɛ́?
rʋ́ʋ́ sɩɛ́ pii yɔwɛ zɩmɛ́ yáá? Ʋ ɛ̃ beé?
17 Naŋnɔ́ŋɔ kéŋ cólle tɛ́ŋ wuu mí ní,
ká maábinɔ́ŋɔ é, wɩɩla tɛ́ŋ mɛ́ nɛ́ ʋʋ́ pɛ́.
18 Nɩcʋʋlɛ́ nɩ́ɩ́ cɩ́ naa,
a la nɛrɔ nɔ́ŋɔ kɩŋ a cɩ́ɩ́nʋ́ tɩɩ.
19 Nɛ́ŋ ná há có nɛsɛ, ʋ có bɔ́ŋbɔ́ŋ ɛɛ;
nɛ́ŋ ná háá nyʋ́kʋ́ tɩɩ, ʋʋ́ jɔ́ʋ́ tɩɩ zɔkɛ́ nɛ́.
20 Lɩ́ŋtɩɩnɔ wɩ wér ná,
ká wɩɩla sɩ́ dí wɩ́tɛbʋllɔ má.
21 Rɩɩ lʋ́l nɩbure, ʋ ká baŋcɩmɩlmɔ́ nɛ́,
nɩkɔsɔ áná wɩ satɔrɔ́ ná.
22 Satɔrɔ́ ká lúrí rí a pá tɛŋnamɩɛ,
amá sazɔkɔ́ ká heŋgbele pʋɔlɩ́ nɛ́.
23 Sahɔɔtɩɩnɔ lʋ́ɔ́rɔ́ aá la zílyɔwɛ́ nɛ́,
a makɛ rɩ́ taŋá sɩ́ nyɩ́ɩ́sʋ́.
24 Zɩmɛ́ mɩŋ nɛrɔ ná háá kɩ́ɛ́lɛ wɩ́ɛ́ laka,
amá nɩcʋʋlɛ́ éé bel mʋ́ yakɛ dúníe tokó mí ní.
25 Nɩburé púsú áná cɔ́ɛ́,
ká a sazɔkɔ́ a pɔ́ʋ́ maá ná há lʋ́lʋ́.
26 Ʋ wɩ mɔhɛ̃́ rɩ́wɔ́ ɓá kɩŋ pá nɩtaŋá,
Nɩyɩra bɛŋsɛ́ má ká wɩ́yalá nɛ́.
27 Nɛ́ŋ ná há ʋ́ʋ̃́ nʋɔ kanɛ́, ʋ ɛ̃ wɩ́ɛ́;
ká nɛ́ŋ ná má háá kɩ́ɛ́lɛ wɩ́ɛ́, ʋ kéŋ wɩ́zɩmɛ.
28 Rɩ nɩcʋʋlɛ́ má tɩɩ táŋŋʋ́ nʋɔ, ɓaá bʋlʋ́ kéŋ zɩmɛ́ nɛ́;
Rɩ nɛrɔ ʋ́ʋ̃́ nʋɔ kanɛ́, ʋ kéŋ wɩ́zɩmɛ nɛ́.