xxx
15
1 Nʋlɩ́sɔ ɓɩweró pɔrɛ cɔ́ɛ́,amá tɛŋbuoró wɩ́bʋlɛ́ pusi cɔ́ɛ́.
2 Zɩmɛ́ tɩ́na nʋɔ wɩ́bʋlɛ́ kéŋ cáánɛwero,
amá nɩcʋʋlɛ́ nʋɔ dé sú rɩ́ nɩcʋ́lwɩ́ɛ́ dʋŋɔ nɛ́.
3 Nyuutɩna Wɩɩsɛ sɩ́ɛ́ mɩŋ dɩhɩ̃́ wuu ní,
Aá kɩ́ɛ́lɛ nɩwere rɩ́ sahɔɔtɩɩna.
4 Neŋdulí ná há ɛ̃ bʋlɛ́ nɩhɩ̃́ hiẽsó tuu ní,
amá nʋgóllúwɩ́bʋlɛ́ zɔkɛ sɩɛrʋ.
5 Nɩcʋʋlɛ́ dáárʋ́ áná nʋɔ mɛ́,
amá nɛ́ŋ ná háá saŋ cáánɛ nɛ́ ʋ́ʋ̃́ tɩɩ kanɛ́.
6 Nɩtaŋá jaa kéŋ kuóɓɩɛ kɩŋkáŋ,
amá sahɔɔtɩɩnɔ suolé ɓɩɛ kéŋ wɩhála.
7 Zɩmɛ́ tɩ́náwa nʋɔ wɩ́bʋlɛ́ ká karmɛ́ rɛ́,
amá nɩcʋ́llɛ wɩ́bʋlɛ́ to ɛ́.
8 Nyuutɩna Wɩɩsɛ bɛ́rɛ sahɔɔtɩɩna vʋk'ɔsɔ́,
amá nɩwere wɩsʋlɔ́ tɔ́rʋ́ sɩɛrʋ.
9 Nyuutɩna Wɩɩsɛ bɛ́rɛ sahɔɔtɩɩna mála,
amá ʋ có nɛ́ŋ ná háá ja taŋá.
10 Nɛ́ŋ ná há cʋ́rɛ ŋmɛ́nɔ mɛ́, sɩ́ ná dɩlmɩlmɔ́ ɓɩduo,
nɛ́ŋ ná há bɛ́rɛ kánɩ́ŋ tɩɩ, ʋʋ́ sʋ́wʋ́ nɛ́.
11 Rɩ Nyuutɩna Wɩɩsɛ nɛ́ ɩ̃ lɛlɛtɔ́ɔ́ dɩluŋo wuu má tɩɩ,
nɩbííne sabɩŋsɛ nɛ́ sɩɛ́, ʋ wʋ́ɔ́ wuó zɩŋ?
12 Nɩmɔnnɔ wɩ có rɩ́wɔ́ bʋ́lʋ́ pɔ́ʋ́ tɩɩ mɛ́,
ʋ wɩ zɩmɛ́ tɩ́náwa rɩ́ɩ́ mʋ́ɛ́ aá ja zɩmɛ́.
13 Satɔrɔ́ nɩ́ ká sɩ́ɛ́ wér,
Sazɔkɔ́ nɛ́ ká sabɩɩna vúkme.
14 Nɛ́ŋ ná há ɛ̃ wɩ́ɛ́, ʋʋ́ ja makɛ́,
amá nɩcʋʋlɛ́ wɩ́dííli ní ká nɩcʋ́llɛ.
15 Nyaarɩtɩɩnɔ wɩ tápʋl wérí kené,
amá tápʋ́l wuu dé ká cana nɛ́ a pá wérnáárɔ.
16 Ɩ há kéŋ ɓɩɛ mʋ́ɔ́ kaá fá Nyuutɩna Wɩɩsɛ héwíŋ,
ʋ nɛ́ wérí há kéŋ ɓɩɛ kɩŋkáŋ rɩ́ héwízeno.
17 Nɛrɔ há pɛ́ɩ́ dɩpaarɔ arɩ́ cólle,
ʋ cícó nɛrɔ há pɛ́ɩ́ nɔvʋʋlɛ namɩɛ rɩ́ sagʋʋmɔ́.
18 Cɔ́ɛ́ tɩ́na lɔkɛ nɛsɛ nɛ́,
amá nyamma tɩ́na pɔrɛ nɛsɛ nɛ́.
19 Sɔrʋ tɔ́ tɛŋwɩtɩɩnɔ ŋmɛ́nɔ mɛ́,
amá nɩtaŋáwa ŋmɛ́nɔ ká ŋmɛ́ŋpaasɩ́ nɛ́.
20 Bio ná há ɛ̃ wɩ́ɛ́, kɔ́ʋ́ áná satɔrɔ́ nɛ́,
amá bicʋʋlɛ́ múúrú maá nɛ́.
21 Nɩcʋ́lwɩ́ɛ́ nɛ́ ká nɛrɔ ná há wɩ wɩ́ɛ́ ɛ̃ satɔrɔ́,
amá nɛrɔ ná há kéŋ wɩ́zɩmɛ, ʋʋ́ va taŋá sɩɛrʋ nɛ́.
22 Rɩ vʋʋrɛ́ toó, nɩbííno jáŋwa waá dí,
amá rɩ nɩɛ nɛ́ kanɛ́ aá cáánɛ, ɓa sɩ́ dí.
23 Nʋlɩ́sɛwero kéŋ tɛŋpɔrɔ́,
ɩ há bʋ́l wɩ́ɩ́ ʋ tɛ́ŋbʋlɩ́ mɛ́, nóú há wéró ɛ́!
24 Wɩ́zɩnnɔ pí ŋmɛ́nɔ ná háá mʋ́ hiẽsó ná há mɩŋ nyúú rí ní,
a makɛ rʋ́ʋ́ sʋ́ʋ́ ná háá mʋ́ lɛlɛtɔ́ɔ́ ná há mɩŋ tíé mʋ́l pí.
25 Nyuutɩna Wɩɩsɛ nɩ́ɩ́ zɔkɛ nyʋktɩɩna jaa,
amá ʋʋ́ kɛ́rɛ yúháálɔ tíé mí.
26 Nyuutɩna Wɩɩsɛ bɛ́rɛ sabɩŋtɩɛnnɛ,
amá wɩ́bʋlwere é cɛ́rɔ́, ʋ sɩ́ɛ́ mɛ́.
27 Nɛ́ŋ ná há có oŋgɩrmɛ́, ʋ yɩ́rɛ wɩɩla nɛ́ aá hóú jaa mɛ́,
amá nɛ́ŋ ná háá vɛ zílyɔwɛ́, ʋ sɩ́ ká mɩɩsɛ.
28 Nɩtaŋá bɩɩnɛ lúŋlúŋ ní káá lɩ́sɛ nʋɔ,
amá sahɔɔtɩɩna wɩ dáánɛ́ káá bʋl wɩ́bɔma.
29 Nyuutɩna Wɩɩsɛ rɩ́ sahɔɔtɩɩna pɛ́kɛ ból,
amá ʋʋ́ zési nɩtaŋáwa wɩsʋlɔ́.
30 Tɛŋpɔrɔ́ sɩ́belé kéŋ satɔrɔ́;
labáárɩwero kéŋ nadúóro.
31 Nɛ́ŋ ná há ɓílú dɩlla aá zesi tʋrɛ́ wɩ́bʋlɛ́ ná háá pá hiẽsó,
ʋ kéŋ dɩkení zɩmɛ́ tɩ́náwa sɩɛrʋ.
32 Nɛ́ŋ ná há wɩ cáánɛ zesi, ʋʋ́ lɔ́rʋ́ tɩɩ nɛ́,
amá nɛ́ŋ ná háá zesi wɩ́bʋlɛ́ ná há sʋ́ʋ́ kánʋ́ tɩɩ, ʋ nɩ́ɩ́ ná wɩ́zɩmɛ.
33 Nyuutɩna Wɩɩsɛ héwífɔ́ɔ́ ká zɩmɛ́ jɛɛ nɛ́,
Múúríŋtɩɩ nɩ́ɩ́ la yɩjɔɔ sɩ́ɛ́.