xxx
14
1 Háálɔ ná há kéŋ zɩmɛ́ nɩ́ɩ́ sɔ́ʋ́ jaa,
amá hácʋʋlɛ́ tɩɩ nɩ́ɩ́ zɔ́kʋ́ jaa.
 
2 Nɛ́ŋ ná háá tɩŋ taŋá ŋmɛ́nɔ, ʋʋ́ fá Nyuutɩna Wɩɩsɛ héwíŋ,
amá nɛ́ŋ ná háá tɩ́ŋ bɔ́ŋbɔ́ŋ ŋmɛ́nɔ, ʋʋ́ zɔkɛ Nyuutɩna Wɩɩsɛ yɩr nɛ́.
 
3 Nyʋkwɩ́ɛ́ nɩ́ɩ́ lɛ nɩcʋʋlɛ́ nʋɔ mɛ́,
amá zɩmɛ́ tɩ́náwa wɩ́bʋlɛ́ nɩ́ɩ́ kɛ́rwɔ́ mɛ́.
 
4 Nɔparɛ́ há to ráŋ ná, vʋ́ʋ́ra ká wúólí,
Nɔɓallɛ dóé nɩ́ɩ́ a ɓɩdííle mɩŋ kɩŋkáŋ.
 
5 Taŋá dáŋsɩ́ɛ́ wɩ nyɩɛrʋ́ nyɛ,
amá nyɩɛrʋ dáŋsɩ́ɛ́ wɩ́ɩ́ nɛ́ ká nyɩɛrʋ.
 
6 Nɩmɔnnɔ́ já zɩmɛ́ ká wʋ́ʋ́ ná,
amá zɩmɛ́ tɩ́na é rí, wɩ́zɩmɛ néé ká mɔlɛ́.
 
7 Kanɩ́ɩ́ tɩɩ kɛkɛ nɩcʋʋlɛ́ mɛ́,
bee wɩ́ɛ́, ɩ wɩ wɩ́ɛ́ zɩmɛ́ wúó ná ʋ wɩ́bʋlɛ́ sɩɛrʋ.
 
8 Nɛrɔ ná há ʋ́ʋ̃́ tɩɩ kanɛ́, ʋʋ́ kɩ́ɛ́lɛ wɩ́ɛ́ nɛ́ kaá a, bee wɩ́ɛ́ ʋ kéŋ zɩmɛ́.
Nɩcʋ́llɛ cʋ́llɛ ná nɛ́ tɛ ɓaá gɩrmɛ náŋá.
 
9 Bʋl ɔsɛ wɩ́zɔkɩ́ to nɩcʋ́llɛ sɩ́ɛ́ wɩ́ɩ́,
amá sawér mɩŋ nɩtaŋáwa pɛ́kɛ.
 
10 Nɩbííno tɩɩ nɛ́ ʋ́ʋ̃́ sazɔkɔ́ mʋɔsɔ,
Nɛ́ŋ nɔ́ŋ wʋ́ʋ́ mɛ́ wúó pɛ́ aá jʋɔsɛ.
 
11 Ɓa sɩ́ zɔkɛ sahɔɔtɩɩna jaa,
amá nɩyɛ́rɛ́wa jaa sɩ́ jɛ́llɛ.
 
12 Nɩbííno wúóló aá bɩɩnɛ rʋʋ mála wéró rí,
kɔ́ʋ́ dɩgírsi ká sʋʋ ŋmɛ́nɔ nɛ́.
 
13 Nɩbíínó mɔ́ŋ aá tɔ́ʋ́ wɩɩla mɛ́ nɛ́,
ká satɔrɔ́ má wólli sazɔkɔ́ aá bɩrmɛ.
 
14 Nɩkɔsɔ sɩ́ dúú wɩ́'állɛ wɩɩla,
ká rɩ́ nɩwero wɩ́'állɛ a rʋ́ʋ́ ná wér kɩ́llʋ́.
 
15 Nɛ́ŋ ná há wɩ wɩ́zɩmɛ kené lá wɩ́ɛ́ wuu ní aá dí;
amá nɛrɔ ná háá pɔ́ʋ́ tɩɩ mɛ́, ʋʋ́ bɩɩnɛ́ nɛ́ kaá a wɩ́ɛ́.
 
16 Zɩmɛ́ tɩ́na fá bɔ́ŋbɔ́ŋ ɛɛ héwíŋ, a kánʋ́ tɩɩ aá kɛkɛ bɔ́ŋbɔ́ŋ mɛ́,
amá nɩcʋʋlɛ́ wʋ́ʋ́ tɩɩ mɩ́ɩ́ pɔrɛ, ʋ wɩ héwíŋ fá.
 
17 Nɛ́ŋ ná cɔ́ɛ́ há wɩ dáánɛ́ káá wɛ, ʋʋ́ tʋŋ nɩcʋ́lwɩ́ɛ́,
sabɩŋtɩɛnnɛ tɩ́na má nɛ́ ká nɩbɛ́rɛ.
 
18 Wɩ́zɩmɛtóówa liwe ní ká cʋ́llɛ,
amá nɩɛ ná háá pɔ́wɔ́ tɩɩ mɛ́ kuónéŋcu ní ká wɩ́ɛ́ zɩmɛ́.
 
19 Nɩbɔma nɩ́ɩ́ gieni nɩwere sɩ́ɛ́,
ká sahɔɔtɩɩna pɩ́pɛ́llɛ nɩtaŋáwa dánnʋsɛ mɛ́.
 
20 Nɩyaarɔ nannɔ́ŋɔ má tɩɩ bɛ́rʋ́,
amá ɓɩɛ tɩ́na é nannɔ́ŋsɛ káŋ.
 
21 Nɛ́ŋ ná há bɛ́rʋ́ kénninɔ́ŋɔ ká wɩ́bɔŋ'aarɔ nɛ́,
amá nɛ́ŋ ná háá fá nɩyaara susu, ʋ ná wér.
22 Nɩɛ ná háá bɩɩnɛ bɔ́ŋbɔ́ŋ ɛɛ to nɩtɛlɛ́ rɛ́?
Amá nɩɛ ná háá bɩɩnɛ wérí ɛɛ nɩ́ɩ́ ná wér arɩ́ cɩ́tɩkɛ́.
 
23 Tʋtʋmɩ́ é wuu kéŋ nyʋɔrɛ́,
amá nʋɔ kɔyɔ́ɔ́wa é kéŋ yaara.
 
24 Zɩmɛ́ tɩ́náwa siile ní kɔ́wɔ́ kuóɓɩɛ,
Nɩcʋ́llɛ ker ní kɔ́wɔ́ cʋ́llɛ ná.
 
25 Dáŋsɩ́ɛ́ ná háá bʋl taŋá lá nɩɛ mɩŋsɛ aá tá rɛ́,
amá nyɛtɩɩnɔ é tɛl nɩɛ nɛ́.
 
26 Nɛ́ŋ ná háá fá Nyuutɩna Wɩɩsɛ héwíŋ, kéŋ yɩɛla kɩŋkáŋ,
bee wɩ́ɛ́ ʋ ká dɩyúólí rí a pɔ́ʋ́ bɛlɛ.
 
27 Nyuutɩna Wɩɩsɛ fɛ́ɛ́ ká hiẽsó nyibulsɩ́ɩ́ nɛ́,
ʋ kéŋ nɩɛ aá kɛkɛ sʋʋ báráwa mɛ́.
 
28 Nɩkana nɛ́ ká kuóro yɩr,
amá rɩ́ nɩɛ toó, kuóro wɩ dóé kené.
 
29 Nɛ́ŋ ná há wɩ cɔ́ɛ́ dí kɩ́kɛ́lɛ́, ʋ wɩ́zɩmɛ zéŋ,
amá nɛ́ŋ ná háá dí cɔ́ɛ́ kɩ́kɛ́lɛ́, ʋʋ́ nyɩ́ɩ́sʋ́ cʋ́llɛ nɛ́.
 
30 Sabɩɩna há pɛ́ dɩbalá nɛ́ ká tɛŋfɩ́ɛ́l,
amá sagʋʋmɔ́, heŋgbele pʋɔlɩ́ nɛ́.
 
31 Nɛ́ŋ ná háá bɛŋsɛ nɩyaarɔ, ʋʋ́ tʋ́ksʋ́ Mɩ́máárɔ nɛ́,
amá nɛ́ŋ ná háá fɔ́ʋ́ susu, ʋʋ́ píŋsú Mɩ́máárɔ nɛ́.
 
32 Sahɔɔtɩɩnɔ tɩɩ sahɔɔ nɩ́ɩ́ zɔ́kʋ́,
amá nɩtaŋá kéŋ yɩɛla, ʋ sʋʋ má tɩɩ mɛ́.
 
33 Nɛ́ŋ ná háá kɩ́ɛ́lɛ wɩ́ɛ́, ʋ kéŋ zɩmɛ́,
zɩmɛ́ sɩɛ́ wo nɩcʋ́llɛ má rɩ́ aá mɩŋ rɛ́?
 
34 Taŋá nɩ́ɩ́ ɓɔ́ tɔ́ɔ́,
Bɔ́ŋbɔ́ŋ ká tɔ́ɔ́ nɩɛ hɩɩ̃sɛ nɛ́.
 
35 Kuóro có tʋtʋnnɔ ná há ɛ̃ wɩ́ɛ́,
amá ʋ cɔ́ɛ́ wɛ́ nɛrɔ ná háá hɩ́ɩ̃sɛ nɩɛ.