13
1 Bio ná há kéŋ zɩmɛ́ wʋ́ʋ́ áná nʋɔ mɩ́ɩ́ daarɛ,bilaamɔ wɩ bʋlɛ́ nɛ.
2 Nɛrɔ wuu nʋɔ wɩ́bʋlɛ́ nɩ́ɩ́ pɔ́ʋ́ ɓɩdíwere,
amá zaŋbatɩɩnɔ wɩhɩɛnɩ́ nɛ́ ká zɔ́krʋ.
3 Nɛrɔ ná há ʋ́ʋ̃́ nʋɔ kanɛ́, ʋʋ́ kɛ́rʋ́ hiẽsó mí ní,
Nɛrɔ ná há lɩ́ɩ́rɛ́ wɩ́ɛ́ aá daarɛ, ʋʋ́ zɔ́kʋ́ tɩɩ nɛ́.
4 Tɛŋwɩtɩɩnɔ sabɩɩna jáŋwa waá dí,
amá nɩɛ ná háá tʋmɛ́, ɓaá ná ɓɩɛ ɓaá bʋ́rsɩ́wɔ́.
5 Nɩtaŋá bɛ́rɛ nyɛwɩ́ɛ́,
amá sahɔɔtɩɩnɔ́ lɔ́rɛ nɩɛ, aá hɩɩ̃sɛ nɩɛ.
6 Taŋá nɩ́ɩ́ pɔ́ málwero tɩ́na mɛ́,
amá sahaksɩ́ nɩ́ɩ́ zɔkɛ wɩ́bɔŋ'aarɔ.
7 Nɛrɔ nɔ́ŋɔ púú tɩɩ makɛ kuór, ká wɩ óŋ kené,
nɛrɔ nɔ́ŋɔ má púú tɩɩ makɛ nɩyár ká ka ɓɩɛ kɩŋkáŋ.
8 Ɓɩɛ tɩ́na ɓɩɛ nɛ́ yɔ́wɛ́ aá lɔ́ʋ́ mɩɩsɛ,
amá nɛ́ŋ wɩ nɩyaarɔ́ wálmɛ.
9 Nɩtáŋáwa nɩhɩ̃́ pʋmmɔ nɛ́ aá pá satɔrɔ́,
amá sahɔɔtɩɩna caanɔ́ sɩ́ dʋsɛ.
10 Tɩɩmakɛ́ kéŋ kapɔsɛ,
amá nɩɛ ná háá zesi cáánɛ kéŋ zɩmɛ́.
11 Rɩ nɛrɔ nɛ́ já ɓɩɛ kɩ́kɛ́lɛ́, ɓaá tenni kɩ́kɛ́lɛ́ nɛ́,
amá rɩ nɛrɔ nɛ́ já ɓɩɛ, aá bil mʋɔ́ mʋɔ́wa, ɓaá púl ní.
12 Yɩɛla dɩ́ŋdéré ká béŋtú pʋɔlɩ́ nɛ́,
Jáŋ díó ká hiẽsó tuu ní.
13 Nɛrɔ ná háá vɛ cáánɛ, ʋ sɩ́ ná wɩɩla,
amá nɛrɔ ná háá zesi wɩ́makɛ́, ʋ sɩ́ ná siile.
14 Zɩmɛ́ tɩ́na nɩɛ karmɛ́ ká hiẽsó nyiibulsɩ́ɩ́ nɛ́,
a ka nɩɛ aá kɛkɛ sʋʋ báráwa mɛ́.
15 Wɩ́zɩmɛwero nɩ́ɩ́ ɔsɛ nɩɛ,
amá zaŋbatɩɩnɔ ŋmɛ́nɔ wɩ tokó kené.
16 Zɩmɛ́ tɩ́na é wuu kɩ́ɛ́lɛ wɩ́ɛ́ nɛ́ kaá a,
amá nɩcʋʋlɛ́ wʋ́ʋ́ cʋ́llɛ féŋsi.
17 Nɩtɔk tʋmɛ́ kéŋ wɩhála,
amá nɩtaŋá tʋmɛ́ kéŋ tɛŋpɔrɔ́.
18 Nɛrɔ ná há vɛ́ cáánɛ, ʋ nɛ́ ká yaarɩtɩɩnɔ, hɩɩ̃sɛ tɩ́na.
Amá nɛrɔ ná háá saŋ cáánɛ nɩ́ɩ́ la yɩr.
19 Sabɩ́ɩ́nájáŋ díó kéŋ tɛŋpɔrɔ́,
sɩ́ bɔ́ŋbɔ́ŋ á, nɛ́ ká nɩcʋ́llɛ wɩ́bɛ́rɛ.
20 Nɛ́ŋ ná háá ɓakɛ zɩmɛ́ tɩ́náwa sɩ́ ka zɩmɛ́,
amá nɛ́ŋ ná háá ɓakɛ nɩcʋ́llɛ sɩ́ ná wɩɩla.
21 Wɩɩla nɩ́ɩ́ kiri wɩ́bɔŋ'aara har,
amá wér nɩ́ɩ́ túŋ nɩtaŋáwa.
22 Nɩwero tá liwe aá pɔ́ʋ́ nihẽ,
amá wɩbɔŋ'aarɔ ɓɩɛ, nɩtaŋá nɛ́ sɩ́ tɩ́llɩ́wɔ́.
23 Nɩyaara baksɩ́ ɔ́sʋ́ wérí,
taŋátoó nɩ́ɩ́ a, ɓaá yʋksɩ́wɔ́ nɛ́sɛ mɛ́.
24 Nɛ́ŋ ná há wʋ́ʋ́ bió ŋmɔwɛ, ʋ wʋ́ʋ́ có ní,
amá nɛrɔ ná há cóú bio, ʋʋ́ tʋ́rʋ́ nɛ́.
25 Nɩtaŋá díó aá vɔkɛ nɛ́,
ká sahɔɔtɩɩna lowíé a wúólí.