12
1 Nɛ́ŋ ná háá saŋ makɛ́ có wɩ́zɩmɛ,nɛ́ŋ ná há wáá saŋ rɩ́wɔ́ bʋ́lʋ́ pɔ́ʋ́ tɩɩ mɛ́, ká nɩcʋʋlɛ́ nɛ́.
2 Nyuutɩna Wɩɩsɛ nɩcólli nɛ́ ká nɛrɔ ná há có wérí ɛɛ,
amá sabɩŋbɔmɔ tɩ́na é, ʋ nɩbɛ́rɛ nɛ́.
3 Sabɔ́ŋ wɩ nɛ́ŋ ɔsɛ,
amá nɩtaŋáwa nalursí zʋ́ tíé.
4 Háwero kɔ́ʋ́ bála yɩr nɛ́;
amá háálɔ ná háá hɩɩ̃sɛ nɩɛ, ká heŋgbemʋkɔ́ nɛ́.
5 Nɩtaŋáwa sabɩɩna nɛ́ ká yɛ́rɛ́ ɛɛ,
amá sahɔɔtɩɩna wɩ́jaalɩ́ nɛ́ ká gɩ́ŋgɩ́rmʋ.
6 Sahɔɔtɩɩna wɩ́bʋlɛ́ ká nɩɓʋ́báráwa nɛ́,
amá nɩyɛ́rɛ́wa nʋʋsɛ kéŋ waana a pɔ́wɔ́.
7 Rɩ zɔ́krʋ nɛ́ pérí sahɔɔtɩɩna, a baa káánɛ toó,
amá nɩtaŋáwa jaa cɩ́nɛ wér.
8 Nɛ́ŋ ná há kéŋ wɩ́zɩmɛ, nɩɛ búú,
amá nɩcʋʋlɛ́ é, ɓaá bel guónú ní.
9 Ɩ há sáŋɛ́ ɓa múúrí, kɛ́ɩ́ ka tʋtʋnnɔ balá
ʋ nɛ́ cícó ɩ há já yɩr, ká wɩ óŋ kené aá dí.
10 Nɩtaŋá ʋʋ̃́ pʋsɛ má tɩɩ oŋjaalɛ́,
amá sahɔɔtɩɩnɔ é sɩɛrʋ haakɩ́.
11 Nɛ́ŋ ná háá párʋ́ baka, sɩ́ dí vɔkɛ;
amá nɛ́ŋ ná há mɩŋ wɩ́yɔ́ɔ́wa har ká nɩcʋʋlɛ́ nɛ́.
12 Sahɔɔtɩɩná hɩɛ̃nɛ nɩbɔma gɩ́ŋgɩ́rmɛ ɓɩɛ,
amá nɩtaŋáwá díwó suolé ní.
13 Sahɔɔtɩɩnɔ tɩɩ nʋɔ wɩ́bʋlɛ́ ká bárá nɛ́ aá kánʋ́,
amá nɩtaŋá fóri wɩɩla mɛ́.
14 Nɩbííno nʋɔ wɩ́bʋlɛ́ nɩ́ɩ́ a, ʋ dí wér vɔkɛ,
nɛrɔ wuu tʋtʋmɛ́ nɩ́ɩ́ túmú.
15 Nɩcʋʋlɛ́ bɩɩnɛ rʋʋ́ tʋŋ wérí ní,
amá nɛ́ŋ ná háá zesi cáánɛ ká zɩmɛ́ tɩ́na nɛ́.
16 Nɩcʋʋlɛ́ cɔ́ɛ́ lʋ́mɔ́
amá wɩ́zɩnnɔ é líŋú cɔ́ɛ́.
17 Nɛ́ŋ ná há kéŋ taŋá bʋlɔ́ aá ɔ́sɛ́ taŋá nɛ́,
amá daŋsɩ́ɛ́ nyɛtɩɩnɔ má wɩ́cólli nɩ́ ká nyɩɛrʋ.
18 Wɩ́kaŋbʋllɔ wɩ dáánɛ́ ká bʋl aá wɛ nɩɛ mɛ́, anɛ tókowí,
amá zɩmɛ́ tɩ́náwa é wɩ́bʋlɛ́ dúórí ní.
19 Nɛ́ŋ ná háá bʋl taŋá waá yʋ́ksɛ,
amá nyɛtɩɩnɔ é, sɩ́ɩ́ kɩŋsɛ ká dáánɛ rʋʋ yʋ́ksɔ́.
20 Gɩragɩra mɩŋ nɩɛ ná háá ja bɔ́ŋbɔ́ŋ ɛɛ sabɩŋsɛ mɛ́,
amá satɔrɔ́ nɛ́ mɩŋ nɩɛ ná háá ja tɛŋfɩ́ɛ́l mɛ́.
21 Wɩɩla oro wuu wɩ nɩtaŋá peri,
amá sahɔɔtɩɩna é wɩɩla sɩ́ vɔ́kwɔ́.
22 Nyuutɩna Wɩɩsɛ nɩbɛ́rɛ nɛ́ ká nɩɛ ná háá nyɛ nyɩɛnnɛ,
amá ʋ nɩcólle ní ká nɩɛ ná háá ja taŋá.
23 Nɛrɔ ná há ʋʋ̃́ tɩɩ kanɛ́, wʋ́ʋ́ wɩ́zɩmɛ kené aá nyɩɩsɛ,
amá nɩcʋ́llɛ cʋ́llɛ wɩ wúó féŋsi.
24 Nɛ́sɛ ná háá tʋmɛ́ nɩ́ɩ́ dí nyúú,
amá nɛ́sɛ ná háá tʋmɛ́ rɩ́ sɛ́ŋɓɛ́llɛ, dóé níí ɛɛ́ rʋ́ʋ́ tʋŋ.
25 Sazɔkɔ́ kéŋ tɛŋyʋɔrɔ́,
amá wɩ́bʋlwero kéŋ tɛŋpɔrɔ́.
26 Nɩtaŋá kɔ́ʋ́ vállɩ́nɔ́ŋɔ tɩ́tɩ́ɛ́sɔ nɛ́,
amá sahɔɔtɩɩna ŋmɛ́nɔ nɩ́ɩ́ tɛ́lwɔ́.
27 Tɛŋwɩtɩ́ɩ́nɔ wɩ namɩɛ néé aá wasɛ,
amá wɩ́ɩ́ ná há wéró kɩŋkáŋ a pá nɩbííno nɛ́ ká tʋmɛ́.
28 Taŋá ŋmɛ́nɔ kéŋ waana,
ɛ́ ŋmɛ́nɔ wɩ sʋʋ rɩ́ɩ́ mʋ́.