11
1 Nyuutɩna Wɩɩsɛ bɛ́rɛ nyɩɛrʋ oŋkaamáŋsɛ,amá ʋ sɩɛrʋ tɔ́rɛ́ zíŋ ná há cɛ́rɛ́.
2 Mákɩŋtɩɩ rɩ́ nɩguonó ní hé náŋa aá va,
zɩmɛ́ má rɩ́ múúríŋtɩɩ nɩ́ɩ́ hé náŋá.
3 Tékétéké ní kéŋ nɩtaŋáwa aá va,
amá zaŋbatɩɩna wɩ́bɔma nɩ́ɩ́ zɔ́kwɔ́.
4 Wɩɩsɛ cɔ́wɩɩlɔ́ kal, ɓɩɛ ká yɔ́ɔ́,
amá taŋá tɩŋɛ́ nɩ́ɩ́ la nɛrɔ sʋʋ nɛ́sɛ mɛ́.
5 Nɩtaŋá nɩtáŋnɛ nɩ́ kenú aá hé ŋmɛ́ŋwero mí,
amá sahɔɔtɩɩnɔ bɔmɩ́ nɩ́ɩ́ zɔ́kʋ́.
6 Nɩwere nɩtáŋnɛ nɛ́ lɔ́wɔ́ aá tá,
amá zaŋbatɩɩna wɩ́jaalɛ́ nɛ́ kɔ́wɔ́ bárá.
7 Sahɔɔtɩɩnɔ sʋʋ mɛ́, ʋ báá wɩ yɩɛla kené,
ʋ kuóɓɩɛ má yɩɛlɛ́ ká yɔ́ɔ́.
8 Nɩtaŋá fóri sazɔkɔ́ mɛ́,
ká sahɔɔtɩɩnɔ nɛ́ zʋ.
9 Sahɔɔtɩɩnɔ wɩ́bʋlɛ́ nɩ́ɩ́ zɔ́kʋ́ kénninɔ́ŋɔ,
amá nɩtaŋáwa wɩ́zɩmɛ nɛ́ lɔ́wɔ́ aá tá.
10 Rɩ nɩtaŋáwa nɩ́ɩ́ ná wér, tɔ́ɔ́ jʋɔsɛ́ nɛ́;
ká rɩ sahɔɔtɩɩna nɩ́ɩ́ sʋsɛ́, tɔ́ɔ́ hé kulí ní.
11 Nɩyɛ́rɛ́wa bárka yɩr mɛ́, tɔ́ɔ́ mʋ́ sɩ́ɛ́,
sahɔɔtɩɩna nʋʋsɛ́ zɔkɛ tɔ́ɔ́.
12 Nɛ́ŋ ná háá guónú nɔ́ŋɔ, ká nɩcʋʋlɛ́ nɛ́,
nɛrɔ ná há kéŋ wɩ́zɩmɛ ʋʋ̃́ nʋɔ kanɛ́.
13 Susooró kuusi wɩ́féŋse,
amá nɛrɔ ná há kéŋ sabɩɩna féŋsi wɩ́ɛ́.
14 Rɩ tɔ́ɔ́ nɛ́ wɩ sɩ́dííre kené, tɔ́ɔ́ zɔ́kɔ́,
Rɩ́ cɩ́cáánɛ nɛ́ kanɛ́, laatɛ́ mɩ́nɔ́.
15 Rɩɩ sɩ́ɩ́ sɩ́ cɛ́ naa, a la kɩŋ a pá nɛrɔ, ɩ já wɩɩla a pɛ́ɩ́ tɩɩ,
amá rɩɩ nɛ́ vɛ́ɛ́, ɩ lɛ́ɩ́ tɩɩ.
16 Háálɔ ná mála há wéró, nɛ́ kéŋ yɩr,
ká báála ná há kéŋ dóé, ɓaá ná ɓɩɛ.
17 Nɩwéró ɔ́sʋ́ tɩɩ nɛ́,
amá bɔ́ŋtɩɩnɔ, ʋʋ́ zɔ́kʋ́ tɩɩ nɛ́.
18 Sahɔɔtɩɩnɔ ɓɩɛ waá dáánɛ,
amá nɛrɔ ná háá ja taŋá túme nɩ́ɩ́ dáánɛ.
19 Ɛ́ wɩ́ɛ́, nɛ́ŋ ná háá ja taŋá sɩ́ ka mɩɩsɛ,
amá nɛ́ŋ ná háá tʋŋ bɔ́ŋbɔ́ŋ, ʋʋ́ ja sʋʋ nɛ́.
20 Nɩɛ ná há kéŋ sabɩŋtɩɛnnɛ, ɓa nɛ́ ká Nyuutɩna Wɩɩsɛ nɩbɛ́rɛ,
amá nɩɛ ná há ká tékétéké, ʋ nɩcólle ní ɛ́.
21 Sahɔɔtɩɩnɔ bɛŋsɛ́ to wɩ́girí,
amá nɩwere dunɩɛ é sɩ́ ná laatɛ́.
22 Háwero há cʋ́ʋ́lɛ́,
ʋ nɩhɩ̃́ koo ɓa há hé salmɛ dɩmmɛnɩ́ ʋ mɩɩsɛ mɛ́ nɛ́.
23 Nɩtaŋáwa wɩ́jaalɩ́ nɛ́ ká wérí ɛɛ,
sɔhɔɔtɩɩna yɩɛla nɛ́ ká cɔwɩɩlɔ́.
24 Nɛ́ŋ ná háá dí zilé kɩŋkáŋ, sɩ́ ɔsɛ ka ɓɩ́ɛ́,
amá nɛ́ŋ ná há ɔ́sɛ́ nyáŋ ɓɩɛ aá bil, sɩ́ ɔsɛ yaarɛ.
25 Nɛ́ŋ ná há kéŋ zilé, ʋ sɩ́ ɔsɛ ka ɓɩɛ,
ká nɛ́ŋ ná há sɩ́ nɩɛ nyɔ nyii, ʋ má tɩɩ sɩ́ ná a nyɔ.
26 Nɛ́ŋ ná há nyáŋ ɓɩdííle bil ká waá yɛ́llɛ, nɩɛ sɩ́ bʋr hóú mí,
amá nɛ́ŋ ná háá yɛ́llɛ ɓɩdííle, nɩɛ sɩ́ sʋl Wɩɩsɛ bárka pɔ́ʋ́.
27 Nɛ́ŋ ná háá ja wérí, nɩɛ sɩ́ cóllú,
nɛ́ŋ ná háá ja bɔ́ŋbɔ́ŋ sɩ́ ná bɔ́ŋbɔ́ŋ.
28 Nɛ́ŋ ná há púú tɩɩ yéllú kuóɓɩɛ mɛ́ sɩ́ ɓal,
amá nɩtaŋáwa sɩ́ dí wér anɛ tupaarɔ.
29 Nɛ́ŋ ná háá vúkmú jaa, ʋ liwe ní ká poo,
ká rɩ́ nɩcʋʋlɛ́ bɩrmɛ zɩmɛ́ tɩ́na yómo.
30 Nɩtaŋá wɩ́'állɛ nɩhɩ̃́ hiẽsó tuu ní,
ká zɩmɛ́ tɩ́na jɩ́ja nɩɛ.
31 Rɩ nɩtaŋá níí nóú wɩ́'állɛ túme tíé nyúú rɛɛ́,
sahɔɔtɩɩnɔ rɩ́ wɩ́bɔŋ'aarɔ sɩ́ nówó wɩ́'állɛ túme a kɩ́llɛ ɛ́.