II. SALOMOŊ SƖ́ŊSƲ́Ɔ́LA
10
1 Sɩ́ŋsʋ́ɔ́la ná Salomoŋ há sʋ́ɔ́lɛ́.Bio ná há ɛ̃ wɩ́ɛ́, kɔ́ʋ́ áná satɔrɔ́ nɛ́,
bicʋʋlɛ́ kɔ́ʋ́ maá hiĩne ní.
2 Gɩragɩra ɓɩɛ wɩ nyʋɔrɛ́ kené,
taŋá nɛ́ lá nɛrɔ aá tá sʋʋ nɛ́sɛ mɛ́.
3 Nyuutɩna Wɩɩsɛ waá lo rɩ́ nɩtaŋá ná losu wɩɩla,
amá ʋʋ́ vɔ́ŋ sahɔɔtɩɩnɔ háá hɩɛ̃nɛ óŋ ná.
4 Nɛ́ŋsa ná háá tʋmɛ́ rɩ́ɩ́ sɛ́ŋɓɛ́llɛ, ɓa kéŋ yaara aá ko.
Nɛ́ŋsa ná háá tʋmɛ́, ɓaá pá ɓɩɛ.
5 Nɛ́ŋ ná há já ɓɩɛ aá cákʋ́ tɩɩ, ɓɩɛ kʋsɛ́ tɛ́ŋ mɛ́, ká wɩ́zɩnnɔ nɛ́,
amá nɛ́ŋ ná háá pɩ́ dóŋ ɛ́ tɛ́ŋ mɛ́, ʋʋ́ hɩɩ̃sɛ nɩɛ nɛ́.
6 Nɩtaŋá nyúú kéŋ bárka,
amá sahɔɔtɩɩnɔ nʋɔ de sú rɩ́ bɔ́ŋbɔ́ŋ nɛ́.
7 Nɩtaŋá yɩr waá yʋ́ksɛ,
amá ɓa wɩ dáánɛ́ káá sʋ́llɛ sahɔɔtɩɩnɔ yɩr.
8 Nɛrɔ ná há ɛ̃ wɩ́ɛ́, ʋʋ́ saŋ makɛ́,
amá nɩcʋʋlɛ́ zɔ́kʋ́ tɩɩ nɛ́.
9 Nɩtékétéke wɩ wɩ́ɩ́ fá,
amá nɛrɔ ná háá tɩŋ gologolo ŋmɛ́nɔ wɩ́ɛ́ sɩ́ nyɩɩsɛ.
10 Nɛrɔ ná háá féŋsi taŋá, ʋʋ́ zʋ nɩɛ mɛ́ nɛ́,
nɛrɔ ná há cʋ́ʋ́lɛ́, ʋʋ́ zɔ́kʋ́ tɩɩ nɛ́.
11 Nɩtaŋá nʋɔ wɩ́bʋlɛ́ kéŋ waana,
amá sahɔɔtɩɩnɔ nʋɔ de sú rɩ́ bɔ́ŋbɔ́ŋ nɛ́.
12 Nɩbɛ́rɔ íllí nɛsɛ,
Cólle tɔ́ wɩ́bɔma wuu mí ní.
13 Zɩmɛ́ wɩ́bʋlɛ́ sú wɩ́zɩnnɔ nʋɔ,
amá nɩcʋʋlɛ́ é, daa nɛ́ tɩ́ŋʋ́ mɛ́.
14 Zɩmɛ́ tɩ́náwa tʋ́ɔ́lɛ́ zɩmɛ́,
amá nɩcʋʋlɛ́ nʋɔ pɔ́sɛ́ zɔ́krʋ nɛ́ aá ko.
15 Ɓɩɛ tɩ́na ɓɩɛ nɩ́ɩ́ kɛ́rʋ́ mɛ́,
Yaara nɩ́ɩ́ zɔkɛ nɩyaarɔ.
16 Nɩtaŋá suolé kéŋ waana,
amá sahɔɔtɩɩnɔ suolé gírsi bɔ́ŋbɔ́ŋ mɛ́ nɛ́.
17 Nɛ́ŋ ná háá tɩŋ cáánɛ, pí hiẽsó ŋmɛ́nɔ,
amá nɛ́ŋ ná há sʋ́llɛ tʋ́rɛ́ mɛ́, tɛ́lʋ́ tɩɩ.
18 Nɛrɔ ná há lʋ́ɔ́rɛ́ bɛ́rɛ nɩɛ, kéŋ nʋŋmɔ́ŋyɔ́ɔ́,
ká nɛrɔ ná háá cáárɛ nyɛ́wɩ́ɛ́, ʋ ká nɩcʋʋlɛ́ nɛ́.
19 Wɩ́kaŋcerso wɩ wo rʋ́ʋ́ sɩ́ áá zɔkɛ,
amá nɛrɔ ná há ʋ́ʋ̃́ nʋɔ kanɛ́, ʋ nɛ́ ʋ́ʋ̃́ tɩɩ kanɛ́.
20 Nɩtaŋá nʋɔ wɩ́bʋlɛ́ píŋó anɛ wárɛ́cʋɔrɩ́
amá nɩbɔmɔ sabɩɩna wɩ piŋ.
21 Nɩtaŋá nʋɔ wɩ́bʋlɛ́ kéŋ nyʋɔrɛ́ a pá nɩkana,
ká wɩ́ɛ́ kɩ́ɛ́lɛ́ toó, ɓʋ́ɓʋ́ nɩcʋ́llɛ.
22 Nyuutɩna Wɩɩsɛ há á wérí pɛ́ɩ́, ʋ nɛ́ ká ɓɩɛ,
Nɩbííno tɩɩ wálmɛ wɩ óŋ wúó súúri.
23 Kíso zɔkɛ́ kéŋ satɔrɔ́ a pá nɩcʋʋlɛ́;
anɛ ɛ́ zɩmɛ́ há kéŋ satɔrɔ́ a pá wɩ́zɩnnɔ.
24 Wɩ́ɩ́ ná sahɔɔtɩɩnɔ há fɛ́ɛ́, ʋ nɩ́ɩ́ pérú,
nɩtaŋá háá jɔ́ʋ́ ná, ʋ nɛ́ ɓaá pɔ́ʋ́.
25 Rɩ duópoo ní kúé, sahɔɔtɩɩnɔ waá káánɛ,
amá nɩtaŋá é mɩ́ŋ mʋ́biló ná há wáá zíksi daha.
26 Anɛ ɛ́ nyiemo háá nyíéŋsi nyɩla, ká nyʋɔsɛ búbuori sɩ́ɛ́,
ʋ ká ɛ́ nɛ́ a pá nɩɛ ná háá tʋ́ŋ tɛŋwɩtɩɩnɔ.
27 Nyuutɩna Wɩɩsɛ fɛ́ɛ́, ʋʋ́ súúri tápʋlɛ́,
amá sahɔɔtɩɩna bɩŋsɛ cókó aá múúri ní.
28 Nɩtaŋáwa yɩɛla nɛ́ ká satɔrɔ́,
amá sahɔɔtɩɩna wɩ yɩɛla kené.
29 Nyuutɩna Wɩɩsɛ ŋmɛ́nɔ ná ká kɛ́rɛ́ ɓɩduó rí, a pá nɩtaŋáwa,
amá ʋ ká zɔ́krʋ dɩhɩ̃́ rɛ́, a pá nɩɛ ná háá tʋŋ bɔ́ŋbɔ́ŋ.
30 Nɩtaŋá wáá sɛ́rsɩ́ ná,
amá sahɔɔtɩɩna wɩ tɔ́ɔ́ mɩ́ɩ́ dáánɛ.
31 Zɩmɛ́ mɩŋ nɩtaŋá nʋɔ wɩ́bʋlɛ́ mɛ́,
amá nɩtɔk neŋdulí, ɓaá cókú ní.
32 Nɩtaŋá nʋɔ wɩ́bʋlɛ́ pɔrɛ tɛ́ŋ,
amá sahɔɔtɩɩnɔ nʋɔ wɩ́bʋlɛ́ ká bɔ́ŋbɔ́ŋ dʋŋɔ nɛ́.