Zɩmɛ́ nɩ́ɩ́ yɩ́rɛ nɩcʋ́llɛ cana díí mí
9
1 Zɩmɛ́ sɔ́ʋ́ jaa,ʋ sɔ́ɔ́ a hóú nafarsɛ balpɛ.
2 Ʋ ɓʋ́ pʋsɛ, a bɩrmɛ dɩvɛ́ŋ,
ká sɩɛ́ cíksi táábɩl.
3 Ʋ tʋ́mʋ́ toltʋtʋnna, ɓa mʋ́ tɔ́ɔ́ sɩɛrʋ
dúŋdúóme ná há ísí kɩŋkáŋ daha
a búóli aá yɩ́rɛ nɩɛ:
4 «Nɛ́ŋ ná zɩmɛ́ há múrú, rʋ́ʋ́ tɩ́na bɩr kó rɛ́!»
Ʋ bʋ́lɔ́ pá nɩɛ ná há wɩ wɩ́zɩmɛ kené a bʋlɛ́:
5 «Ɩ́ ko díŋ ɓɩdííle,
ká nyɔ dɩvɛ́ŋ ná ŋ há ɛ́ɛ́ bil.
6 Ɩ́ tɛ́ɩ́wa nɩcʋ́lwɩ́ɛ́ ká ná mɩɩsɛ,
ɩ́ pi wɩ́zɩmɛ ŋmɛ́nɔ!»
Zɩmɛ́ tɩ́na arɩ́ nɩlaamɔ wɩ́ɛ́
7 Nɛ́ŋ ná há cáánɛ nɩlaamɔ lɔ́rʋ́ tɩɩ,
nɛ́ŋ ná há kéŋ sahɔɔtɩɩnɔ aá hé ŋmɛ́nɔ mɛ́, ʋ já zome pɔ́ʋ́ tɩɩ.
8 Sɩ́ bʋ́l pá nɩmɔnnɔ rʋ́ʋ́ kánʋ́ tɩɩ, rʋ́ʋ́ háá ko bɛ́rɩ́,
amá bʋ́l pá zɩmɛ́ tɩ́na rʋ́ʋ́ kánʋ́ tɩɩ, ʋ sɩ́ cóllí.
9 Cáánɛ zɩmɛ́ tɩ́na, ʋ zɩmɛ́ sɩ́ súúri,
karmɛ nɩtáŋa, ʋ wɩ́zɩmɛ sɩ́ súúri.
10 Zɩmɛ́ dɩpúli ní ká Nyuutɩna Wɩɩsɛ héwífɔ́ɔ́,
ká zɩŋ Nyuutɩna Wɩɩsɛ ná há ká pár, má nɛ́ ká wɩ́zɩmɛ.
11 Bee wɩ́ɛ́, ŋ wɩ́ɛ́, ɩ tápʋlɛ sɩ́ pul,
ká rɩ́ŋ súúrí hiẽsó bɩŋsɛ.
12 Rɩ́ɩ́ nɛ́ kéŋ zɩmɛ́, ɩ tɩɩ nɩ́ɩ́ dúú wér,
rɩ́ɩ́ nɛ́ ká nɩmɔ́nnʋ́, ɩ dʋŋɔ nɩ́ɩ́ dúú wɩɩla.
Hácʋʋlɛ́ nɩyɩ́rɔ
13 Hácʋʋlɛ́ jɩ́klʋ́,
ʋ wɩ zɩmɛ́ kené, ʋ wɩ wɩ́ɩ́ wuu má ɛ̃.
14 Ʋʋ́ kénú jaa dánnʋɔ mɛ́ nɛ́,
dacaka mɛ́, tɔ́ɔ́ sɩɛrʋ dúŋdúóŋ daha,
15 a búóli aá pá nɩdaarɛ́ ná
há píwó ŋmɛ́nɔ, a va térké aá daarɛ, aá bʋlɛ́:
16 «Nɛ́ŋ ná zɩmɛ́ há múrú, rʋ́ʋ́ tɩ́na bɩrko rɛɛ́!»
Ʋʋ́ bʋl nɛ́ŋ ná há wɩ wɩ́zɩmɛ kené rɩ́ a bʋlɛ́:
17 «Nyigaalɛ́ nɩ́ ŋmɔmɛ́,
ɓɩdííle ná, ɓa há féŋsé a dí ní kéŋ hɩɛŋ!»
18 Ká ɛ́ nɩɛ wɩ ɛ̃ rɩ́ sʋsɛ dɩhɩ̃́ nɛ́,
rʋ́ʋ́ nɩyɩ́rɛ tuwi lɛlɛtɔ́ɔ́ nɛ́.