Kɩma wɩ́ɛ́
6
1 Ŋ bio, rɩɩ nɛ́ cɛ́ naa la kɩŋ a pɛ́ɩ́ kénninɔ́ŋɔ,rɩɩ nɛ́ tá nʋɔ, aá já rɩ́ɩ́ pɛ́ nɛ́ŋ mɛ́,
2 rɩ́ɩ́ nɛ́ vɔ́wɩ́ tɩɩ arɩ́rɩ́ɩ́ nʋɔ wɩ́bʋlɛ́,
rɩ tɩɩ nʋɔ wɩ́bʋlɛ́ nɛ́ kení,
3 ŋ bio, ná wɩ́ɩ́ ná ɩ há sɩ́ a, a lɛ́ɩ́ tɩɩ,
bee wɩ́ɛ́, ɩ nɛ́ kení tɩɩ héí kénninɔ́ŋɔ nɛ́sɛ mɛ́:
Mʋ́ múúrí tɩɩ a sʋ́lʋ́, a jɛ́nnʋ́ wérí.
4 Sɩ́ ló rɩ́ dóŋ zʋ́ɩ́ sɩ́ɛ́,
a sɩ́ɩ́ sɩ́ɛ́ má káá tɔ́.
5 Lɛ́ɩ́ tɩɩ anɛ wɩɛma háá fóri naŋballɔ nɛ́sɛ mɛ́ ɛ́,
anɛ diíwíé háá fóri diíwíɓʋ́ʋ́rɔ nɛ́sɛ mɛ́ ɛ́.
Tɛŋwɩtɩɩnɔ rɩ́ mimine wɩ́ɛ́
6 Tɛŋwɩtɩɩnɔ, mʋ́ bel mimine;
kɩ́ɛ́lʋ́ wɩ́'állɛ a má ka zɩmɛ́.
7 Ʋ wɩ kuóro kené,
ʋ wɩ nɔhɔ̃́ kené, ʋ wɩ nyúútɩ́na kené.
8 Tɔ́lɩɩla nɛ́ ʋʋ́ jɔ́ʋ́ ɓɩdííle,
onni kʋsɛ́ tɛ́ŋ mɛ́ nɛ́, ʋ ja ɓɩdííle aá cákʋ́ tɩɩ.
9 Tɛ́ŋ béé rí, ɩ jɩ́ja rɩ́ɩ́ tá pɩ́nɛ, tɛŋwɩtɩɩnɔ?
Tɛ́ŋ béé rí, ɩ sɩ́ isi dóŋ mí?
10 A fɛ́rmɩ́ vaŋsɛ,
a dɩ́ɛ́kɛ mʋ́ɔ́, a pɛ́ dóŋ.
11 Yaara sɩɛ́ sɩ́ ko a úrí mí anɛ gaarɔ,
ká rɩ losu má cíkí anɛ gabɩbar.
Sahɔɔtɩɩnɔ wɩ́ɛ́
12 Nɛ́ŋ ná háá nyɛ nyɩɛrʋ, nɩkɔsɔ nɛ́,
ʋ ká wɩ́bɔŋ'aarɔ nɛ́.
13 Ʋʋ́ kɩŋsʋ́ sɩ́ɛ́, a kánʋ́ naa aá bʋl wɩ́ɛ́,
aá cesi wɩ́ɛ́ rɩ́ néníé.
14 Bɔ́ŋbɔ́ŋ nʋ́ʋ́ sabɩɩna mɛ́,
bɔ́ŋbɔ́ŋ nɛ́ kɔ́ʋ́ wɩ́bɩɩnɩ́ tɛ́ŋ wuu mí,
ʋ có nɛsɛ héé.
15 Ɛ́ nɛ́ tɛ wɩɩla sɩ́ kánʋ́ úrú mí,
a zɔ́kʋ́ naasɩ́ balá ká luri toó aá lɔ́ʋ́.
Nyuutɩna Wɩɩsɛ wɩ́bɛ́rɛ
16 Wɩ́ɛ́ balgo rí Nyuutɩna Wɩɩsɛ bɛ́rɛ,
a peri balpɛ má tɩɩ, ʋ há wʋ́ɔ́ có:
17 Mákɩŋ tɩɩ nɩbeló, nyɩɛrʋ neŋdulí
nɛ́ŋsa ná háá ɓʋ́ nɩɛ ná há wɩ wɩ́ɩ́ zɔ́kɛ́,
18 sɩɛrʋ ná háá bɩɩnɛ bɔ́ŋbɔ́ŋ ɛɛ,
naasɛ ná há bíéri bɔ́ŋbɔ́ŋ har kiré,
19 daŋsɩ́ɛ́ nɛrɔ ná háá nyɛ nyɩɛrʋ,
arɩ́ nɛrɔ ná háá hé nɛsɛ maábináŋa pɛ́kɛ.
Pɔ́ɩ́ tɩɩ mɛ́ rɩ́ɩ́ cɔ́rmɛ
20 Ŋ bíí, zésí áná wɩ́makɛ́,
ká sɩ́ɩ́ har bɩr tɛ́ɩ́ maá má karmɛ́.
21 Lo rɩ́wɔ́ mɩ́nɩ́ sɩɛrʋ tɛ́ŋ wuu mí,
píwó tʋʋ láálɩ́ baŋ.
22 Rɩɩ nɩ́ɩ́ valɛ́, ɓa sɩ́ tɩ́ɛ́sɩ́,
rɩ́ nɛ́ pɛ́ dóŋ, ɓa sɩ́ pɔ́ɩ́ mɛ́,
ká rɩɩ nɛ́ kúé isi, ɩ sɩ́ bɛ bɩsɛ.
23 Bee wɩ́ɛ́, wɩ́makɛ́ ná ká caanɔ́ nɛ́,
karmɛ́ ná ká pʋmmɔ nɛ́, ká cáánɛ há sɩ́ɩ́ pɔ́ɩ́ tɩɩ mɛ́ a hiẽsó ŋmɛ́nɔ:
24 Ɓa cáánɛ sɩ́ kɛ́rɩ́ mɛ́ rɩ́ hátɔk,
arɩ́ hánʋŋmɔ́ŋwɩ́bʋllɔ ná há tóí hál neŋdulí mí.
25 Sʋ́ʋ́ hɩ́ɛ́nʋ́, ʋ wér wɩ́ɛ́,
a sɩ́ ló rʋ́ʋ́ sɩ́belé má kánɩ́.
26 Bee wɩ́ɛ́, dɩpɛ́ŋkul meéwí mɔ hácɔrmɔ wɩ́ɩ́,
amá nɛrɔ nɔ́ŋɔ háálɔ é, ʋʋ́ zɔ́kɩ́ hiẽsó wér wuu ní.
27 Nɛ́ŋ sɩ́ wólli níŋ pii hóú gɛzʋ́ma mɛ́,
kɔ́ʋ́ gɛnnɛ sɩ́ níŋ dí?
28 Nɛ́ŋ sɩ́ wólli níŋhala daha va,
ká rɩ́wɔ́ sʋ́ʋ́ naasɛ mɛ́ nyɩ́kʋ́?
29 Ʋ sɩɛ́ ká ɛ́ nɛ́ a pá nɛ́ŋ ná háá jɔ́ʋ́ nɔ́ŋɔ háálɔ :
nɛ́ŋ ná há tɩ́kʋ́ mɛ́, ɓa wʋ́ʋ́ píí tá fɛ́lɛ́lɛ́.
30 Rɩ gaarɔ nɛ́ gá ɓɩdííle rʋ́ʋ́ dí a pɔ́rʋ́ losu,
ɓa wʋ́ʋ́ hɩɩ̃sɛ.
31 Amá rɩ ɓa nɛ́ kenú, ʋ sɩ́ túmú oŋgaalɩ́ ná naasɩ́ balpɛ,
ʋ jaa ɓɩɛ wuu ní rʋ́ʋ́ ɓósi tɛ́.
32 Rɩ nɛ́ŋ tʋ́ŋ cɔ́rmɛ arɩ́ hál, ʋ ká nɩɓo ní,
bee wɩ́ɛ́ nɛ́ŋ ná háá jɔ́ʋ́ tɩɩ zɔkɛ́, ʋ nɩ́ɩ́ tʋŋ ɛ́.
33 Ŋmɔwɛ́ arɩ́ hɩɩ̃sɛ́ nɛ́ kɔ́ʋ́ ker,
kɔ́ʋ́ hɩɩ̃sɛ má wáá daarɩ́ ná.
34 Bee wɩ́ɛ́ bánɔnnɩ́ sɩ́ pusi bála ná cɔ́ɛ́,
ʋ tɛŋbuoró kal díí, ʋ waá a rʋ́ʋ́ fá nɩbíŋ susu.
35 Ʋ waá a rʋ́ʋ́ saŋ ɔsɛ́ óŋ oro wuu,
rɩ zilé onni có rɩ́wɔ́ pul mɔ ɛrɛ́ má, ʋ waá saŋ.