Hácɔrmɔ bʋ́lɔ́ ka haŋpʋɔl
7
1 Ŋ bio, sáŋɩ́ŋ wɩ́bʋlɛ́,ká lo rɩ́ŋ wɩ́makɛ́ ná má mɩ́nɩ́ sabɩɩna mɛ́.
2 Sáŋɩ́ŋ wɩ́makɛ́, a makɛ rɩ́ɩ́ ka mɩɩsɛ,
ká bélíŋ karmɛ́ ná mɛ́ wérí, anɩ́ɩ́ sɩ́bíé.
3 Píwó tʋ́ɩ́ néníé mí.
Pʋ́ŋsɩ́wɔ́ héí beŋtú dɩluŋo.
4 Bʋl zɩmɛ́ rɩ́ a bʋlɛ́ : «Ɩ káŋ nétoló ní!»
ká pi wɩ́zɩmɛ ɛ́ɩ́ házoŋ.
5 A makɛ rɩ́wɔ́ kɛ́rɩ́ mɛ́ rɩ́ɩ́ nɛrɔ nɔ́ŋɔ háálɔ,
ɓa sɩ́ pɔ́ɩ́ mɛ́ rɩ́ɩ́ hánʋŋmɔ́ŋwɩ́bʋllɔ ná há tóí hál mɛ́.
6 Ŋ fá cɩ́nɩ́ŋ jaa tókóró mí,
a kaa wúri káá nyiili pʋmmɔ.
7 Ŋ ná haŋpʋɔla há wɩ zɩmɛ́ kené,
ɓa sɩɛrʋ, ŋ kɩ́ɛ́lɔ́ a ná heŋbóle nɔ́ŋɔ há ká nɩɓoó.
8 Ʋ fa ɓéró daarɛ ŋmɛ́nɔ aá mʋ́ háálɔ ná lóŋgboŋ rɩ́,
a va mʋ́ɔ́mʋ́ɔ́ aá mʋ́ʋ́ jaa rɩ́.
9 Gbaanɛ oro, sɩ́ɛ́ birebire tɛ́ŋ mɛ́ nɛ́ sɩɛ́ fa,
rɩ́ bíno púló aá zʋ, tɔ́ɔ́ biri.
10 Ɛ́ nɛ́ háálɔ ná sɩɛ́ ko cémú,
a su gɛnnɛ anɛ hácɔrmɔ, ká lɩ́ŋ wɩ́ɛ́ mɩ́nʋ́ sɩɛrʋ.
11 Ɛ́ háálɔ jɩ́klʋ́, ʋ wɩ hɩɩ̃sɛ́ fá,
ʋ wʋ́ʋ́ jaa míí ké.
12 Ʋ nɛ́ mɩŋ ŋmɛ́nɔ mɛ́, ʋ nɛ́ mɩŋ nɩkana dɩkéŋsi,
dɩhɩ̃́ wuu, ʋ é mɩŋ róŋ aá dɛllɛ bál.
13 Háálɔ ná ka ɛ́ heŋbóle, a kórmú,
a wɩ hɩɩ̃́sɛ fɛ́ɛ́, ká bʋ́lʋ́ rɩ́ a bʋlɛ́ :
14 «Ŋ fa mɔhɔ̃́ rɩ́ŋ ɔsɛ tɛŋfɩ́ɛ́l vʋk,
ŋ nʋtálɔ ná nʋɔ zaa sɩɛ́ súó, ŋ ɔ́sɛ́ ɛ́ vʋk.
15 Ɛ́ nɛ́ tɛ ŋ lɩɩ céŋ rɩ́ŋ kánɩ́,
ŋ faá jɛ́ɩ́ rɛ́, ŋ sɩɛ́ néí.
16 Ŋ jɛ́rɛ́ gɛnnɛ a tɔ́ŋ gódó mí,
gɛnnɛ ná ɓa há fʋ́ɛ́ rɩ́ Ezipiti gɛŋmɛ́sɛ.
17 Ŋ mɩ́sɛ mííri rɩ́ alʋ́wɛ́ɛ́sɛ
arɩ́ sinamóómi tulaaléwa ŋ gódó mí.
18 Sɩɛ́ ko ráá zʋʋ pɛ́ a jʋɔsɛ aá ja tɔ́ɔ́ pʋlɛ́,
a áráá náŋá cólle tɛŋpɔ́ɔ́rɩ́wɩ́ɛ́.
19 Bee wɩ́ɛ́, ŋ bála to jaa mɛ́,
ʋ vá ŋmɛ́ŋbólí rí.
20 Ʋ pɛ́ɛ́ púú meéwíé rɩ́ lɔkɔ́,
rɩ cana wɩ hɩ́ɛ̃́sɛ́, ʋ waá ko.»
21 Háálɔ ná bʋ́lɔ́ hé kɔrɔ, a kánʋ́,
a tɩ́ŋʋ́ nʋŋmɔ́wɩ́bʋlɛ́ ná mɛ́, ʋ kénú a tɩ́ŋʋ́ tɩɩ mɛ́.
22 Heŋbóle ná dee pɛ́rmɛ a tɩ́ŋʋ́ mɛ́,
anɛ nɔɔ ɓa há kené aá mʋ́ dɩɓʋ́ɩ́,
anɛ nɩcʋʋlɛ́ ɓa há kené vɔwɛ rɩ́wɔ́ tʋrɛ,
23 a kaá ja rɩ hɛŋ zʋ́ʋ́ cɔ́ɛ́, a caŋ lɛ́.
Anɛ dííwie há pɛ́rmɛ zʋ bará,
ká wɩ ɛ̃ rʋ́ʋ́ mɩɩsɛ dɩlɩ́ɩ́ nɛ́.
24 Ŋ bɛ́lɛ́, ɩ́ zésíŋ rɩ́, mʋ́l né mí
ká pɔ́ɩ́wa tɩɩ mɛ́ wérí rɩ́rɩ́ŋ nʋɔ wɩ́bʋlɛ́ ná.
25 Rɩ́ɩ́ sabɩɩna sɩ́ bɩ́rʋ́, rɩ́ɩ́ tɩŋ háálɔ́ né duo mí,
sɩ́ɩ́ naasɛ píí hóú naasɛ mɛ́, rɩ́ɩ́ yʋ́ksɛ.
26 Bee wɩ́ɛ́, ʋ zɔ́kɛ́ nɩkana;
báála ná má tɩɩ fa há kéŋ dóé, ʋ ɓʋ́wɔ́ wuu ní.
27 Rɩɩ púú jaa ŋmɛ́nɔ, ɩ pí lɛlɛtɔ́ɔ́ ŋmɛ́nɔ nɛ́,
aá mʋ́ sʋʋ dɩpɩ́nɛ.