Pɔ́ɩ́ tɩɩ mɛ́ rɩ́ hácɔrmɔ
5
1 Ŋ bio, zésíŋ é zɩmɛ́ wɩ́bʋlɛ́,ɓílí dɩllɛ a cáásɩ́ŋ é wɩ́zɩmɛ.
2 A makɛ rɩ́ɩ́ zɩŋ wɩ́ɛ́ kɩ́ɛ́lɛ,
ká rɩ́ɩ́ nʋɔ zɩŋ wɩ́ɛ́ bʋl caksɛ́.
3 Bee wɩ́ɛ́, tʋʋ nɩ́ɩ́ pal hácɔrmɔ nʋɔ mɛ́,
kɔ́ʋ́ nʋɔ wɩ́bʋlɛ́ pɔrɛ́ kɛ nʋʋ.
4 Amá ʋ dɩtenní, ʋ haakɩ́ anɛ bákalá,
ʋʋ́ zʋ nɩɛ mɛ́, anɛ tókowí háá dí nʋʋsɛ bɛllɛ nɛ́.
5 Ʋ naasɛ kenú aá mʋ́ sʋʋ rɩ́ɩ́ nɛ́,
ʋ nabulle kenú caasɛ lɛlɛtɔ́ɔ́ nɛ́.
6 Ʋ sɩ́ɛ́ to hiẽsó ŋmɛ́nɔ mɛ́,
ʋ́ʋ́ tɛl ŋmɛ́nɔ mɛ́ má, ká wɩ ɛ̃.
7 Ŋ bio, zésíŋ rɩ́ mʋ́l né mí,
sɩ́ŋ wɩ́bʋlɛ́ ná mɛ́ cʋ́rʋ́.
8 Lo rɩ́ɩ́ ŋmɛ́nɔ a dɩbólí rɩ́ háálɔ né duo,
a sʋ́ʋ́ jaa dánnʋɔ má tɩɩ pérú.
9 Rɩ́ɩ́ háá píí nɛrɩ́ pá nɩɛ náŋa,
ká rɩ́ básahɔtɩɩnɔ má cókí mɩɩsɛ múúri.
10 Rɩ́ nɩɛ náŋá nɛ́ háá díí ɓɩɛ vɔksɛ,
ká rɩ́ɩ́ suole ɓɩɛ má a nɛ́ŋ jaá ɓɩ́ɛ́.
11 Rɩ́ɩ́ háá ko hiĩ́ni, ɩ mɩɩsɛ tenné mí;
tɛ́ŋ ná mɛ́ ɩ tɛŋ arɩ́rɩ́ɩ́ dóé há sɩ́ tenni ɓóŋ.
12 Ɩ sɩɛ́ sɩ́ bʋlɛ́: «Bee rí tɛ ŋ vɛ cáánɛ
a wɩ́ŋ tɩɩ mɛ́ pɔ́ɛ́?
13 Bee rí tɛ ŋ wɩ́ŋ karmɩ'ánáwa cáánɛ zésé,
a wɩ́ŋ dɩlla má ɓílé cáásɩ́wɔ́ tɛ́ŋ ná mɛ́ ɓa háá cáánɩ́ŋ?
14 Mʋ́l né mí, mʋ́ɔ́ nɛ́ tó ká rɩ́ŋ ná wɩɩla duo wuu,
ŋ dunɩɛ sɩɛrʋ arɩ́ nɩɛ wuu sɩ́sɩɛrʋ.»
Haŋpɔháálɔ cólle wɩ́ɛ́
15 Nyɔ́ɩ́ tɩɩ butoluŋo nyii,
nyii ná háá lɩ́ɩ́ vil mí.
16 Ɩ nyibúlbʋɔnnɛ nyii mɔhɔ̃́ rɩ́wɔ́ pal, a lɩɩ waalɛ ŋmɛ́ŋsɛ rɛ́ɛ́?
Ɩ nyiinaasɛ nyii mɔhɔ̃́ rɩ́wɔ́ pal, a peri tɔ́ɔ́ dɩjɛlɛ rɛ́ɛ́?
17 Aɩ́! Ɩ dʋŋɔ nɛ́ mɔhɛ̃́ rɩ́ɩ́ tɩ́llɩ́wɔ́,
ɩ rɩ́ nɩɛ náŋa raa wɩ mɔhɛ̃́ rɩ́ɩ́wa suki tɩ́llɩ́wɔ́.
18 Rɩ́ Wɩɩsɛ bárka pérí nyibúlbʋɔ,
ká rɩ́ɩ́ ɛ́ɛ́ satɔrɔ́ rɩ́rɩ́ɩ́ haŋpɔháálɔ.
19 Ʋ wér anɛ ɓɛɛ, ʋ kéŋ zilé anɛ wɩɛma,
lo rʋ́ʋ́ ɩ́la caasɛ pʋ́pɔ́rɩ́ tɛŋ wérí tɛ́ŋ wuu mí,
lo rʋ́ʋ́ wér hɩɛŋ kánɩ́ tɛ́ŋ wuu mí.
20 Ŋ bio, bee rí tɛ, rɩ́ɩ́ sɩɛ́ lo rɩ háálɔ nɔ́ŋɔ hɩɛŋ kánɩ́,
rɩ́ɩ́ laarɛ háálɔ ná ɩ há wʋ́ʋ́ ɛ̃ ɩ́la?
21 Bee wɩ́ɛ́ nɩbííno wɩ́'állɛ wuu ká ɓɩlɩ́ɩ́ Nyuutɩna Wɩɩsɛ sɩ́ɛ́,
Ʋ nɩ́ɩ́ kɩ́ɛ́lɛ nɩbííno ŋmɛ́ŋsɛ wuu.
22 Sahɔɔtɩɩnɔ tɩɩ wɩ́zɔkɛ́ nɩ́ɩ́ dúú,
ʋ tɩɩ wɩ́bɔmɔ nɩ́ɩ́ vɔ́wʋ́.
23 Wɩ cáánɛ́ saŋ nɩ́ɩ́ ɓʋ́ʋ́,
Cʋʋlɛ daarɔ́ nɩ́ɩ́ zɔ́kʋ́.