Jaa ka wɩ́zɩmɛ
4
1 Ŋ bɛlɛ, ɩ́ zesi áná cáánɛ,ɩ́ zesi wérí, a ka wɩ́zɩmɛ.
2 Ŋ karmɛ́ ná kéŋ nyʋɔrɛ́,
ɩ́ sɩ́ŋ cáánɛ ná píí yóó tá.
3 Ŋ má fa ká bíí rí, a mɩ́nɩ́ŋ áná laka,
ŋ maá má fa cóllíŋ wérí anɛ bibala maá.
4 Ŋ áná fa cáánɩ́ŋ a bʋlɛ́:
«Lo rɩ́ŋ wɩ́bʋlɛ́ ná mɩ́nɩ́ beŋtú mí.
Tɩ́ŋɩ́ŋ wɩ́makɛ́ ná, a ka mɩɩsɛ.
5 Ja zɩmɛ́, a ja wɩ́zɩmɛ má,
sɩ́ŋ wɩ́ɛ́ sɩ́sʋ́llʋ́, a sɩ́ cʋ́rʋ́ kaá táŋ nʋɔ wɩ́bʋlɛ́ má.
6 Sɩ́ zɩmɛ́ vɛ́ɛ́ tá, ʋ sɩ́ pɔ́ɩ́ mɛ́;
cóllú, ʋ má sɩ́ bélí mí.
7 Zɩmɛ́ dɩpúli ní nyɛ:
Ja zɩmɛ́,
pi óŋ ná wuu ɩ há kené, a ja wɩ́zɩmɛ.
8 Kórmú, ʋ sɩ́ kánɩ́ ɓɔ́;
vɔ́wɩ́ tɩɩ a cɔ́ʋ́ mɛ́, ʋ sɩ́ a rɩ́ɩ́ yɩr lɛ.
9 Ʋ sɩ́ a siile nyúbála, ɩ nyúú mí;
ʋ sɩ́ a kuónéŋcú ná há kéŋ yɩr a pɛ́ɩ́.»
Pɔ́ɩ́ tɩɩ mɛ́ rɩ́ sahɔɔtɩɩna ŋmɛ́nɔ
10 Zesi ŋ bio, a sáŋɩ́ŋ wɩ́bʋlɛ́,
a makɛ rɩ́ɩ́ bɩŋsɛ yʋkɛ.
11 Ŋ mákɩ́ zɩmɛ́ ŋmɛ́nɔ,
ŋ kéní hé yɛ́rɛ́ ŋmɛ́nɔ mɛ́.
12 Ɩ valɛ́ sɩ́ a mɔlɛ́,
ká rɩɩ nɩ́ɩ́ fɛ́ɛ́ má, ɩ waá gɛ́rɛ.
13 Ka cáánɛ né wérí, a sɩ́ ló rʋ́ʋ́ fóri,
háásʋ́ ɓárɩ́ tɩɩ, bee wɩ́ɛ́ ʋ nɛ́ kɛ́ɩ́ hiẽsó.
14 Sɩ́ɩ́ naa píí hé sahɔɔtɩɩna ŋmɛ́nɔ mɛ́,
sɩ́ nɩɛ ná há có bɔ́ŋbɔ́ŋ ɛɛ ŋmɛ́nɔ tɩ́ŋʋ́.
15 Pɔ́ɩ́ tɩɩ mɛ́, sɩ́ ráŋ tɩ́ŋʋ́,
tɔ́ʋ́, ká bɩrɛ caasɛ cɔɔ nɔ́ŋɔ.
16 Bee wɩ́ɛ́, ɛ́ nɩɛ wɩ dóŋ wuó pɛ́, rɩ ɓa nɛ́ wɩ bɔ́ŋbɔ́ŋ ɛ́ɛ́,
dóŋ wʋ́ɔ́ sɩ́ɛ́ zʋ, rɩ ɓa nɛ́ wɩ ɛ́ɛ́ rɩ́ nɛ́ŋ ɓal.
17 Bɔ́ŋbɔ́ŋ wɩ́'állɛ nɛ́ kɔ́wɔ́ ɓɩdííli,
ká vadóé wɩ́'állɛ nɛ́ ɔ́wɔ́ nyɔɔlɔ́.
18 Nɩtaŋáwa ŋmɛ́nɔ nɩhɩ̃́ tɩ́tapʋlla pʋmmɔ nɛ́,
ɛ́ pʋmmɔ́ súúrí ní, a kaá ja wɔhɔ cɩ́ɩ́ka.
19 Nɩbɔma ŋmɛ́nɔ nɩhɩ̃́ caŋbíno ní,
ɓa wɩ dɩgɛ́rɛ́ ná.
20 Ŋ bio, zésíŋ wɩ́bʋlɛ́ wérí,
a lo rɩ́ŋ cáánɛ zʋ́ɩ́ dɩllɛ.
21 Lo rɩ́ɩ́ sɩ́ɛ́ cɔ́wɔ́ mɛ́,
lo rɩ́wɔ́ mɩ́nɩ́ sɩɛrʋ lúŋlúŋ.
22 Bee wɩ́ɛ́, ɓa ká hiẽsó rí a pá nɩɛ ná há kéŋwó,
aá pɔ́wɔ́ tɛŋ namɩɛ wuu tɛŋfɩ́ɛ́l.
23 Pɔ́ɩ́ sɩɛrʋ mɛ́ a kɩ́llɛ óŋ wuu,
bee wɩ́ɛ́, hiẽsó nyibúlsɩ́ɩ́ nɛ́.
24 Sɩ́ ló rɩ́ nyɛwɩ́ɛ́ lɩ́ɩ́ nʋɔ lɩ́lɛ,
kánɩ́ tɩɩ rɩ́ nʋŋmɔ́ŋ wɩ́bʋlɛ́.
25 Bélí sɩ́ɛ́, a bel wérí,
a lo rɩ́ɩ́ sɩ́belé má cáásɩ́ sɩ́ɛ́ térké.
26 Bɩ́rmɩ́ ŋmɛ́valɩ́ wérí,
rɩ́ɩ́ ŋmɛ́ŋsɛ wuu sɩ́ héwíŋ kánʋ́.
27 Sɩ́ cʋ́rʋ́ rɩ́ɩ́ hé néduu ɛ́ rá má nɛ́gʋɔ,
lɩ́sɩ́ naasɛ bɔ́ŋbɔ́ŋ ɛɛ mɛ́.