Zɩmɛ́ arɩ́ Wɩɩsɛ fɛ́ɛ́ wɩ́ɛ́
3
1 Ŋ bio, sɩ́ŋ karmɛ́ ná mɛ́ sʋ́llʋ́,píŋ wɩ́makɛ́ ná má bílí sɩɛrʋ.
2 Ɓa sɩ́ súúrí tápʋlɛ́ rɩ́rɩ́ɩ́ bɩŋsɛ,
rɩ́ɩ́ dí vɔkɛ, arɩ́ tɛŋfɩ́ɛ́l.
3 Sɩ́ ló rɩ́ nɩcɩ́tɩkɔ́ rɩ́ taŋá fórí nɛ́sɛ mɛ́,
píwó tʋʋ láálɩ́ baŋ mɛ́,
a pʋ́ŋsɩ́wɔ́ héí beŋtú dɩluŋo.
4 Ɛ́ é, Wɩɩsɛ arɩ́ nɩɛ sɩ́ cóllí,
ká rɩ́ɩ́ yɩr má lɛ́.
5 La Nyuutɩna Wɩɩsɛ dí rɩ́rɩ́ɩ́ sɩɛrʋ wuu,
ká sɩ́ɩ́ tɩɩ wɩ́zɩmɛ nɛ́ bélú.
6 Jɔ́ʋ́ cóllé ɩ wɩ́'állɛ wuu sɩɛrʋ,
ʋ má sɩ́ tɩ́ɛ́sɩ́.
7 Sɩ́ɩ́ tɩɩ píí makɛ zɩ́zɩ́nnʋ́,
fá Nyuutɩna Wɩɩsɛ héwíŋ, a kánɩ́ tɩɩ kɛkɛ bɔ́ŋbɔ́ŋ mɛ́.
8 Ɛ́ sɩ́ pɛ́ɩ́ tɛŋ namɩɛ tɛŋfɩ́ɛ́l
ká súúrí heŋgbele má dóé.
9 Zíl Wɩɩsɛ rɩ́rɩ́ɩ́ nɛ́sɛ oŋkanɛ́,
arɩ́rɩ́ɩ́ oŋparɛ́ wuu oŋbʋʋrɛwa.
10 Ɛ́ nɛ́ rʋ́ʋ́ sɩɛ́ a rɩ́ ɓɩdííle caasɛ súí vʋ́ʋ́ra,
ká rɩ dɩvɛ́ŋfɛlɛ má súí vizeŋsi wuu a waalɛ.
11 Ŋ bio, sɩ́ Nyuutɩna Wɩɩsɛ cáánɛ píí yɩ́rɛ yɔ́ɔ́,
ká sɩ́ ló rʋ́ʋ́ dɩlmɩlmɔ́ má zɔ́kɩ́ sɩɛrʋ.
12 Bee wɩ́ɛ́, Nyuutɩna Wɩɩsɛ mɩ́lmʋ́ nɩcólli dɩlla nɛ́,
anɛ ɛ́ áná má háá mɩ́lmʋ́ bicólli dɩlla.
Zɩmɛ́ píŋ kɛ salmɛ
13 Wér pérí nɛ́ŋ ná há kéŋ zɩmɛ́, arɩ́ wɩ́zɩmɛ.
14 Ɩ há kéŋ zɩmɛ́, ʋ wér kɩ́ɩ́ há kéŋ wárɛ,
kɔ́ʋ́ nyʋɔrɛ́ má kɛ salmɛ.
15 Zɩmɛ́ píŋ kɛ bɛŋzɛllɛ,
oŋjaalɩ́ oro wuu má píŋ wʋ́ʋ́ mɔhɛ̃́.
16 Mígbóó mɩ́nʋ́ néduu mí,
ká kuorí arɩ́ yɩr mɩ́nʋ́ nɛ́gʋɔ mɛ́.
17 Ʋ ŋmɛ́ŋsɛ wér,
kɔ́ʋ́ dɩtɩŋɛ́ má wuu kéŋ tɛŋfɩ́ɛ́l.
18 Ʋ ká hiẽsó tuu ní, a pá nɩɛ ná há kenú,
nɩɛ ná há ʋ́ʋ̃́ kanɛ́ ná wér.
19 Nyutɩna Wɩɩsɛ pí zɩmɛ́ nɛ́ a a tíé,
wɩ́zɩmɛ mɛ́ nɛ́ ʋ tɩŋ a a bána.
20 Ʋ wɩ́ɛ́ zɩmɛ́ nɛ́ ɛ́ɛ́ nyii poŋ tíé dɩluŋe aá lɛ́,
ká duóbásɛ má tɩ́tá duónyii ɓaá tuwi.
Nyuutɩna Wɩɩsɛ nɩ́ɩ́ bel zɩmɛ́ tɩ́na mɛ́
21 Ŋ bio, sɩ́ ló rɩ́ wɩ́ɛ́ kɩ́ɛ́lɛ arɩ́ wɩ́ɛ́ bɩɩnɛ́ lúŋlúŋ fórí mí,
bélwó mí wérí.
22 Ɓa sɩ́ a rɩ́ɩ́ dʋma ka mɩɩsɛ, ká a baŋzíŋ rɩ́ɩ́ laalɛ.
23 Ɩ sɩ́ vɩ́va ká sɩ́ héwíŋ fá,
ká rɩ́ɩ́ naa má sɩ́ óŋ mí gɛ́rʋ́.
24 Rɩɩ nɛ́ pɩ́nɛ́, ɩ baŋcɩla waá yóó ná,
ɩ dóŋ má sɩ́ ka kɔrɔ, rɩɩ nɛ́ pɩ́nɛ́.
25 Sɩ́ héwí'urí ɓɩzeno fá,
a sɩ́ sahɔɔtɩɩna má héwíŋ fá, rɩ ɓa nɛ́ cɩ́nɩ́ɩ́ mɛ́.
26 Bee wɩ́ɛ́ Nyuutɩna Wɩɩsɛ nɛ́ kɛ́ɩ́ pʋ́pɔ́ɔ́rɔ,
ʋ sɩ́ kɛ́rɩ́ mɛ́, rɩ́ɩ́ naa sɩ́ bárá oro wuu zʋ́.
Zɩmɛ́ tɩ́na cóú kénninɔ́ŋɔ
27 Sɩ́ vɛ́ rɩ́ɩ́ a wérí pá nɛ́ŋ ná háá ja sáŋɛ,
rɩɩ dóé ní péré.
28 Rɩɩ nɩ́ wóí kénninɔ́ŋɔ mɛ́ aá pɛ́, ɩ sʋ́ʋ́ rɩ́ɩ́ bʋlʋ́ rɩ́ɩ́ bʋ́lɛ́:
«Mʋ́ ká cíé bɩrko rɩ́ŋ sɩɛ́ pɛ́ɩ́ mɛ́.»
29 Sɩ́ bɔ́ŋbɔ́ŋ bɩ́ɩ́nʋ́ rɩ́ɩ́ cáásɩ́ kénninɔ́ŋɔ
ʋ há mɩ́nɩ́ laka, ʋ lɛ́ɛ́ dí rí.
30 Sɩ́ nɛsɛ ná rɩ́ nɛ́ŋ yɔ́ɔ́,
rʋ́ʋ́ nɛ́ wɩ́ɩ́ bɔ́ŋbɔ́ŋ wuu ɛ́ɛ́.
31 Sɩ́ bánɔnnɩ́ dí arɩ́ sahɔɔtɩɩnɔ,
sʋ́ʋ́ wɩ́'állɛ má césú.
32 Bee wɩ́ɛ́, Nyuutɩna Wɩɩsɛ bɛ́rɛ sahɔɔtɩɩnɔ,
amá nɩtaŋáwa nɛ́ kɔ́ʋ́ naŋnɔ́ŋsɛ.
33 Nyuutɩna Wɩɩsɛ bʋra mɩŋ sahɔɔtɩɩnɔ jaa mɛ́,
amá ʋ bárka mɩ́ŋ nɩtaŋáwa jaa mɛ́.
34 Nyuutɩna Wɩɩsɛ mɔŋ nɩɛ ná háá mɔ́mʋ́,
amá ʋ sawér pérí nɩɛ ná háá múúríwó tɩɩ nɛ́.
35 Zɩmɛ́ tɩ́náwa ker ní ká yɩr,
amá hɩɩ̃́sɛ ní ká nɩcʋ́llɛ ker.