147
1 Á bɛ́ Wɩɩsɛ mɛ́.Wɩɩsɛ mɛ́ bɩ́ɩ́ wero
Á Wɩɩsɛ dɛnnɛ wéró,
ʋ píŋse kéŋ hɩɛ̃ŋ paa.
2 Nyuutɩna Wɩɩsɛ sɩ́ bɩrsɔ́ Zerizalɛmɛ,
ʋ sɩ́ a rɩ Ɩzɩrayɛl nɩkɛsɛ́ ná bɩrko hé náŋá mɛ́.
3 Sɩɛnnɛ ná há zɔkɛ, ʋ nɩ́ɩ́ vaarɩ́wɔ́,
ʋ nɩ́ɩ́ sɛ́sɩ́wɔ́ fʋrɛ.
4 Ʋ ɛ̃́ caŋwʋllɛ nʋɔ;
a hé yɩr a pá oro wuu.
5 Á Nyuutɩna zeno, ʋ dóé wɩ wúó máŋsɛ;
ʋ wɩ́zɩŋ wɩ nʋɔ kéné.
6 Nyuutɩna Wɩɩsɛ nɩ́ɩ́ tɩɛkɛ nɩɛ ná háá múríwó tɩɩ,
ká múúri nɩbɔma a tuwi aá yakɛ tíé mí.
7 Ɩ́ ɓá yɩɛla a cʋ́ɔ́lʋ́,
ɩ́ dú cemo a bɩ́rá Wɩɩsɛ mɛ́;
8 ʋ nɩ́ɩ́ a dobasɛ isi tɔ́ bána mɛ́,
ʋ nɩ́ɩ́ a dóŋ tuwi tíé,
ká a nyɔ́ɔ́ nyʋ́nyʋ pallɛ daha.
9 Ʋ nɩ́ɩ́ pá pʋsɛ ɓɩdííle
arɩ́ bʋŋga bɛlɛ, rɩ́ ɓa nɛ́ sʋlɛ.
10 Ʋ sɩ́ɛ́ to zaka dóé mí,
ʋ sɩ́ɛ́ to nɩbííno dóé má mɛ́.
11 Amá Nyuutɩna Wɩɩsɛ sɩ́ɛ́ mɩ́ŋ nɩɛ ná háá fɔ́ʋ́ mɛ́ nɛ́,
nɩɛ ná cɩ́nɛ́ tɩkʋ́ taŋá ná.
12 Zerizalɛmɛ, bɛ́ Nyuutɩna Wɩɩsɛ mɛ́.
Sɩɔŋ, píŋsí Wɩɩsɛ.
13 Beé wɩ́ɛ́, ʋ nɛ́ ɛ́ɛ́ ɩ dánʋʋsɛ boryakɛ́ ká dóé;
ʋ nɛ́ hé bárka pɛ́ɩ́ bɛlɛ ɩ dɩmɩnɩ́ mɛ́.
14 Ʋ nɛ́ ɛ́ɛ́ tɛŋfɩ́ɛ́l mɩnɩ́ dɩtɩllɛ mɛ́,
ʋ nɛ́ tɛ́ ɩ ná ɓɩdíwéré a dí aá vɔkɛ.
15 Ʋ há sʋ́ʋ́ ná nɩ́ɩ́ tʋŋ tíé nyúú,
ʋ wɩ́bʋlɛ́ lʋmɔ fɛ́ɛ́ mɛ́.
16 Ʋ nɩ́ɩ́ a nyɛlhiré tuwi anɛ pepʋsɛ,
ʋ nɩ́ɩ́ a dodɔwɩ́wɩ́ɛ́lɛ tuwi ɓɛsɛ anɛ tápʋmmɔ.
17 Ʋ tá waarʋ dɔwʋ́ɔ́ ɓaá tuwi anɛ dodɔ́wʋ́ɔ́,
áŋ rɛ́ wóú waarɛ né duó cakɛ aá cɛ́>>
18 Rʋ́ʋ́ nɛ́ wúrú nʋɔ mɛ́, ɓaá mʋʋnɛ nɛ́,
ʋ nɛ́ ɛ́ɛ́ poo lulu, a ká nyii aá vá.
19 Ʋ nɛ́ caarʋ́ wɩ́bʋlɛ a pá Zakɔbɛ,
a púú wɩ́bile arɩ́rʋ́ kíŋse a pá Ɩzɩrayɛl.
20 Ʋ wʋ́ɔ́ makɛ pá duó oro wuu,
ɛ́ nɛ́ tɛ́ ɓa wʋ́ʋ́ kíŋse ɛ̃́.
Ɩ́ bɛ́ Wɩɩsɛ mɛ́.