Ɩ kuorí wɩ toko kéné 17
145
Ŋ Wɩɩsɛ, ŋ kuóro, ŋ sɩ́ dɛnnɩ́,ŋ sɩ́ bɩ́ɩ́ yɩr mɛ́ tɛ́ŋ wuu mí, a káá mʋ́ wuu.
2 Ŋ bárkɩ́ tápʋ́l wuu,
ŋ sɩ́ píŋsí yɩr tɛ́ŋ wuu mí.
3 Nyuutɩna Wɩɩsɛ zeno, ʋ yɩr mɔhɔ̃́ píŋse;
ʋ zeŋ wɩ wuó máŋsɛ.
4 Woo wuu sɩ́ bɩ́ɩ́ tʋtʋŋwéré ná mɛ́ a mʋ́ yakɛ nɔ́ŋɔ mɛ́,
ɓa sɩ́ caarɩ́ tʋtʋŋzeŋse.
5 Ɩ wɩ́nyaŋsɛ ná wɩ́ŋ nʋɔ mɩ́ɩ́ kaasɛ ná,
ɩ píŋ ná há ká nyaamɩ́ wɩ́ɛ́ wɩ́ŋ nʋɔ mɩ́ɩ́ lɛ́.
6 Ɓa sɩ́ bʋlɩ́ dozeno ná wɩ́ɛ́,
ŋ sɩ́ dɩɩsɛ wɩ́zeŋse ná.
7 Ɓa sɩ́ líísí wɩ́zeŋse ná há wero wɩ́ɛ́, a bɩ́ɩ́ mɛ́,
ɓa sɩ́ bɔllɩ́ ɩ nɩcɩtɩkɔ́ ná yɩr mɛ́.
8 Nyuutɩna Wɩɩsɛ kéŋ sawer arɩ́ susufɔ́,
ʋ nɩcɩtɩkɔ́ zeŋ, ʋ fɩɛlɔ cɔwɩɩlɔ́ díí mí.
9 Nyuutɩna Wɩɩsɛ wero a pá nɩɛ wuu,
ʋ kéŋ susufɔ́ kɩ́ŋkáŋ ʋ wɩ́állɛ wuu sɩɛrʋ.
10 Nyuutɩna Wɩɩsɛ, ɩ wɩ́állɛ sɩ́ hé náŋá mɛ́ a píŋsí,
ká rɩ́ɩ́ laadííre má bɔllɩ́.
11 Ɓa sɩ́ bʋlɩ́ kuorí ná píŋ wɩ́ɛ́,
ɓa sɩ́ bʋlɩ́ dóé ná wɩ́ɛ́.
12 Ɓa sɩ́ caarɩ́ wɩ́zeŋse ná wɩ́ɛ́ a pá nɩɛ,
arɩ́rɩ́ɩ́ kuorí ná píŋ há ká nyaamɩ́ wɩ́ɛ́.
13 Ɩ kuorí ká dɩŋɛ,
ɩ dóé ná mɩnɔ́ a kaá mʋ́ wuu (woowa wuu sɩɛrʋ).
14 Nyuutɩna Wɩɩsɛ nɛ́ ká dɩtɩɛkɩ́ a pá nɩɛ ná wuu há ɓallɛ,
ʋ nɩ́ɩ́ cuoli nɩɛ ná wuu há pʋɔlɛ.
15 Nɩɛ wuu sɩ́ɛ́ cɔ́ɩ́ mɛ́ nɛ́, aá yɩɛlɛ rɩ́ɩ́ pɔ́wɔ́ ɓɩdííle,
ɩ nɛ́ sɩɛ́ pɔ́wɔ́ ɓɩdííle ɩ tɛ́ŋ jaalɩ́ mɛ́;
16 ɩ nɩ́ɩ́ wurí nɛ́sɛ
a lo nɩwomme ná wuu ɩ há cówó wɩ́ɛ́ dí aá vɔksɛ.
17 Nyuutɩna Wɩɩsɛ ɔ́ɔ́ wɩ́ɛ́ wuu arɩ́ taŋá nɛ́,
ʋ kéŋ nɩcɩtɩkɔ́ ʋ wɩ́állɛ wuu mí.
18 Nyuutɩna Wɩɩsɛ mɩ́ŋ nɩɛ ná wuu háá yɩ́rʋ́ laka,
nɩɛ ná wuu háá yɩ́rʋ́ arɩ́ taŋá laka.
19 Ʋʋ́ tʋŋ nɩɛ ná háá fɔ́ʋ́ héwíŋ colle,
ʋʋ́ zésíwó búŋse a láwɔ́ aá tá.
20 Nyuutɩna Wɩɩsɛ nɩ́ɩ́ bélú nɩcolle wuu mí,
amá ʋ sɩ́ tɩksɛ nɩbɔma wuu.
21 Nyuutɩna Wɩɩsɛ, ŋ nʋɔ sɩ́ wuri a píŋsí,
ká rɩ oŋmaalɛ wuu bʋ́ʋ́ yɩr ná há kɔ́ʋ́ dɔŋɔ mɛ́, a káá mʋ́ wuu.