Kuóro barka bɔlɛ
144
1 Davidi yɩl.
Rɩ Nyuutɩna Wɩɩsɛ ná há káŋ bʋ́ɩ́ yɩr píŋsi,
ʋ nɩ́ɩ́ máŋsɩ́ŋ nɛ́ŋsa lalyóé mí,
ʋ nɩ́ɩ́ máŋsɩ́ŋ nɛ́ŋsa gúŋse nɛsɛ dɩhɩ̃́.
2 Ʋ nɛ́ a weri aá páŋ, ʋ nɛ́ káŋ zekɛrɛ,
ŋ tɔ́yuoli ní, ŋ laataatɔ́,
ŋ hɔkɛrɛ nɛ́, ŋ dɩyuoli ní;
ʋ nɛ́ ɛ́ɛ́ ŋ dí dóé ŋ nɩɛ nyúú.
3 Nyuutɩna Wɩɩsɛ, nɩbííno ká beé rí,
a mɔ́ rɩ́ɩ́ sɩ́ɛ́ mɩnʋ́ mɛ́,
oŋsʋwɩ́ né, a mɔ́ rʋ́ʋ́ wɩ́ɛ́ mɩnɩ́ sabɩɩna mɛ́>>
4 Nɩbííno nɩhɩ̃́ poo ní,
ʋ tápʋlɛ́ má ká fɩ́ɛ́l háá daarɛ nɛ́.
5 Nyuutɩna Wɩɩsɛ, kánɩ́ bána ɓíl ká tuwi,
tɩkɛ pallɛ mɛ́ rɩ́wɔ́ lɛ́ nyʋ́ɔ́sɛ.
6 A rɩ caŋwʋllɛ yieri, rɩ́wɔ́ pɩsɛ náŋá mɛ́,
tɛ́ɩ́ hɛ́mɛ́ rɩ́wɔ́ mʋ́, a a rɩ́wɔ́ fá.
7 Tɛ́rɩ́ŋ nɛ́sɛ rʋ́ʋ́ lɛ́ bána nyúú a tuwi láŋ tá,
a láŋ tá nyikanana mɛ́,
a láŋ tá duhʋ́ɔ́rɔ nɛ́sɛ mɛ́,
8 nyɩ́ɛ́rʋ mɩ́ŋwɔ́ nʋɔ mɛ́,
gɩrágaɩrá súwó néduu nɛ́ŋsa.
9 Ŋ sɩ́ ɓá yɩfɛ́l pɛ́ɩ́, Wɩɩsɛ,
ká dú cemo (ná kéŋ ŋmɛ́sɛ fí) a pɛ́ɩ́:
10 ɩ nɛ́ lá ballɩ́ aá pá kuóre,
ɩ nɛ́ lɛ́ɩ́ tʋtʋnnɔ Davidi tá
nɩɓʋ́ tokowí mɛ́.
11 Láŋ tá rɩ́ŋ lú lɛ́
duhʋ́ɔ́rɔ nɛ́sɛ mɛ́,
nʋɔ ná kéŋ nyɩɛrʋ,
ká ɓa nɛ́ŋsa má sú rɩ́ gɩrágɩrá.
12 Ráá heŋbolli nɩ́ɛ́sɛ tuuni,
ɓa pʋ́ɔ́sɛ́ tɛ́ŋ mɛ́;
ká ráá tole má a naŋgbaŋjɛ́wa,
a a malla a sɔ́ kuójaa mɛ́.
13 Ráá piliwa sú,
rɩ oŋwéré rɩ́wɔ́ duó wuu súwó.
Ráá pʋsɛ púl naasɩ́ bʋ́ɩ́wa,
arɩ́ bʋ́ɩ́ fíwa á baksɛ sɩɛnnɛ.
14 Ráá nɛsɛ vʋ́;
rɩ zekume wuu sɩ́ ɓálʋ́ rɩ gbel pɛ́,
rɩ caase báá sɩ́ mɩnʋ́ á dɩmɩnɛ́.
15 Nɩɛ ná há kéŋ onni nyáŋ wuu, ɓa ná wér!
Wɩɩsɛ há ká nɩɛ náwa Nyuutɩna, ɓa ná wér.