Sɩ́ɩ́ nʋɔ taŋŋʋ Wɩɩsɛ
109
1 Yɩl ná Davidi há yɩ́ɛ́, ʋ mɩ́ŋ gɔk'áná gɔkɩ́ sɩɛrʋ.
Wɩɩsɛ ná ŋ háá píŋse, sɩ́ɩ́ nʋɔ taŋŋʋ,
2 beé wɩ́ɛ́, sahɔtɩɩna arɩ́ gɩ́ŋgɩrmɩtɩɩna
lɩ́sɩ́wɔ́ nʋʋsɛ cɔ́ŋ mɛ́,
ɓa kéŋ nyɩɛrʋ nɔŋdilí a cɩ́nɩ́ŋ mɛ́;
3 ɓa sukíŋ hé rɩ́ nɩbɛrɛ wɩ́bʋlɛ,
a ká nɛsɛ ná há wɩ mʋ́l kéné cɩ́nɩ́ŋ mɛ́.
4 Ŋ cówó, ká arɩ́ ɛ́ má ɓa há pi nyɩɛrʋ aá páŋ;
ŋ é háá sʋ́l Wɩɩsɛ (aá pɔ́wɔ́).
5 Bɔ́ŋbɔ́ŋ nɛ́ ɓa pii tumíŋ wer ná ŋ há ɔ́wɔ́ mɛ́,
ká pi nɩbɛ́r túŋ colle ná ŋ há kéné rɩ́wɔ́.
6 - Lɩsɛ nyɛtɩɩnɔ rʋ́ʋ́ cɩ́nʋ́ mɛ́,
rɩ́ sahɔtɩɩnɔ́ cɩ́nʋ́ néduu rí.
7 Rɩ nyɩɛrʋ cɩ́ɩ́nʋ́ tɛ́ŋ ná ɓa há sɩ́ dúú sarɩ́ya,
rʋ́ʋ́ sʋ́lɛ́ ná bɩrmɛ bɔ́ŋbɔ́ŋ,
8 rʋ́ʋ́ tápʋ́lɛ́ coki múúri,
rɩ́ nɛrɔ nɔ́ŋɔ lɔ́ʋ́ tʋtʋmɛ́ aá tʋŋ,
9 rʋ́ʋ́ bɛlɛ bɩrmɛ bisíŋsi,
rʋ́ʋ́ háálɔ a yúhál,
10 rʋ́ʋ́ bɛlɛ a nɩbaarɛ́, a a sɩŋsʋlla,
rɩ́wɔ́ lɩ́wɔ́ jɩɓoru sɩɛnnɛ aá sʋ́lwɔ́ nʋɔ ɓɩdííle,
11 rɩ nɛrɔ ná há hé kɩ́ŋ pɔ́ʋ́ ko lɔ́ʋ́ onni wuu,
rɩ́ nɩhʋɔra ko lɔ́ʋ́ ɓɩɛ́ wuu,
12 rɩ́ nɛ́ŋ wuu báá sɩ́ wér aa pɔ́ʋ́,
rɩ́ nɛ́ŋ wuu sʋ́ʋ́ bisíŋsi súsú fá,
13 rʋ́ʋ́ dunɩɛ yɩr yʋ́ksɛ,
rɩ́wɔ́ yɩr sɩ́ yɩrʋ́ duó ná há tʋkɛ sɩɛrʋ,
14 ká rɩ́wɔ́ púú ánáwa wɩ́bɔma wɩ́ɛ́ aá liisi Nyuutɩna Wɩɩsɛ,
rʋ́ʋ́ maá má wɩ́zɔkɛ́ sɩ́ dʋsɩ́ ná.
15 Rɩ́ Nyuutɩna Wɩɩsɛ sɩ́ ɛ́ wɩ́ɛ́ oro mí sʋllʋ́,
rʋ́ʋ́ taŋá a rɩ́wɔ́ sʋllɩ́wɔ́ wɩ́ɛ́ tíé nyúú.
16 Beé wɩ́ɛ́, ʋ weri ɛ́ɛ́ wɩ́ɛ́ bɩɩnɛ,
ʋ bɛ́ŋsɛ nɩyaarɔ,
wɩ́lnaarɔ, nɛrɔ ná há ká summo, a mʋ́ lúrú sʋʋ mɛ́.
17 Ʋ fá có bʋrɛ weri,
ɛ́ nɛ́ bʋra dúú,
ʋ fá wɩ bárka hé có,
ɛ́ nɛ bárka kɛ́kʋ́ mɛ́,
18 bʋrɔ tɔ́ʋ́ mɛ́ anɛ kooti,
bʋra zʋ́ʋ́ anɛ nyii,
a zʋ́ʋ́ tɛ́ŋ wuu tɛŋ naŋdaasɛ wuu anɛ nʋʋ:
19 rʋ́ʋ́ nɛ́ a gɛrɔ a pɔ́ʋ́ rʋ́ʋ́ pi aá tɔ́ʋ́ tɩɩ mɛ́,
rɩ́ bʋra nɛ́ a vɔwɛ, rʋ́ʋ́ vʋvɔwɛ tɛ́ŋ wuu mí.
20 Ná ɛ́ ná Nyuutɩna Wɩɩsɛ há sɩ́ túŋ nɩɛ ná há pi nyɩɛrʋ aá cɩ́ɩ́nɩ́ŋ,
arɩ́ nɩɛ ná há bʋl bɔ́ŋbɔ́ŋ aá cáásɩ́ŋ.
21 Amá ɩ é, Nyuutɩna ná há ká Nyuutɩna Wɩɩsɛ,
a weri páŋ ɩ yɩr ná há píŋo wɩ́ɛ́.
Ɩ nɩcɩtɩkɔ́ wero, láŋ tá.
22 Ŋ ká yaartɩ́ŋ, wɩlnaar,
ŋ beŋtú mí, satɔrɔ́ too.
23 Mʋɔ́ mʋɔ́wa, ŋ́ col ní anɛ ɛ́ fɩ́ɛ́l háá nʋkɛ,
ɓa kiri tɩ́ŋɩ́ŋ mɛ́ anɛ hʋɔ̃́.
24 Ŋ naasɛ baa wɩ dóé kéné, a tɩŋ nʋvɔwɔ mɛ́;
ŋ tɛŋ mɩ́ɛ́rɔ.
25 Ŋ nɛ́ bɩrmɩ́wɔ́ nɩmɔmɩ́,
ɓa bélíŋ káá viki nyúú.
26 Nyuutɩna Wɩɩsɛ, ŋ Wɩɩsɛ, pɛ́ŋ mɛ́.
Ɩ nɩcɩtɩkɔ́ yɩr mɛ́, láŋ tá;
27 Nyuutɩna Wɩɩsɛ, rɩ́wɔ́ tɩ́ŋ ɛ́ mɛ́ a zɩ́mɩ́ nɛ́sɛ
arɩ́rɩ́ɩ́ wɩ́állɛ.
28 Ɓa bʋrɔ aá hé ní, kɛ́ɩ́ é hihe bárka.
Ɓa fá ísó cɩ́nɩ́ŋ mɛ́ rɛ́, ɩ sɩɛ́ ló ɓa dí hɩ́ɩ́sɛ,
kɛ́ɩ́ tʋtʋnnɔ wʋwarɛ.
29 Rɩ́ hɩ́ɩ́sɛ nɛ́ a nɩɛ ná há pi zɔkrʋ aá cɩ́ɩ́nɩ́ŋ gɛrɔ,
rɩ́ hɩ́ɩ́sɛ tɔ́wɔ́ mɛ́ anɛ kooti.
30 Ŋ sɩ́ ɓɔ́ŋ liŋó a dɛnnɛ Nyuutɩna Wɩɩsɛ,
nɩkana má sɩɛrʋ, ŋ sɩ́ píŋsú.
31 Beé wɩ́ɛ́, ʋ ísó cɛ́ nɩyaarɔ néduu rí
a lɔ́ʋ́ tá ʋ sarɩ́yaadííre nɛ́sɛ mɛ́.