Ɓílí dɩllɛ, Ɩzɩrayɛl nɩnʋɔlɔ
80
1 Azafɛ yɩl ná ʋ há dú cemo a yɩ, ʋ mɩ́ŋ gɔkɩ'áná gɔkɩ́ sɩɛrʋ.
2 Ɩzɩrayɛl nɩnʋɔlɔ, zesi.
Ɩ nɛ́ há kéŋ Zʋzɛfɛ dunɩɛ aá va anɛ pʋsɛ,
ɩ nɛ́ŋ ná háá dí kuorí malɩ́kawa nyúú, nyɩ́ɩ́sɩ́ tɩɩ,
3 Ɩfɩrayɩŋ rɩ́ Bɛŋzamɛŋ arɩ́ Manase sɩ́ɛ́ mɛ́.
Makɩ́ dóé, a la ráá tá.
4 Káŋ ráá bɩrko, Wɩɩsɛ;
wúrí sɩ́ɛ́ a cáásɩ́rá, ráá ná laatɛ́.
5 Nyuutɩna Wɩɩsɛ, Doe wuu tɩna,
tɛ́ŋ beé rí, rɩɩ cɔ́ɛ́ pɔrɛ, ká rɩɩ zésí nɩɛ wɩ́sʋlɔ́,
6 a baá sɩ́ lo rɩ́wɔ́ dí sɩ́mɩɩrʋ ɓɩdííle,
a sɩ́ lo rɩ́wɔ́ nyɔ́ sɩ́mɩɩrʋ nyii naasɩ́ ɛ́ rɛ́ɛ́>>
7 Ɩ ɔ́ɔ́ á kennináŋa nɩna náŋá á wɩ́ɛ́,
á dɩŋdɔma mʋmɔ́ŋrá.
8 Doe wuu tɩna Wɩɩsɛ, a ráá bɩrko (ráá bɩr ná ráá zʋ́ gbel, á dɩkeni);
wúrí sɩ́ɛ́ a cáásɩ́rá, ráá ná laatɛ́.
9 Viínyi tuu ná ɩ há la Ezipiti nɩɛ rí,
ɩ kiri duówa náŋá ká bɩr púú cɔ́ŋsɛ;
10 ɩ cúnni tuuni náŋá ká tá dɩhɩ̃́ pɔ́ʋ́,
a makɛ rʋ́ʋ́ nálúrsi ɔsɛ zʋ́ tíé,
a tɩ́llɛ tɔ́ɔ́ ná wuu.
11 Ʋ fɩ́ɛ́l isi tɔ́ pallɛ mɛ́,
kɔ́ʋ́ hilli má tɔ́ sɛdɩrɛwa ná há zɩ́nɛ́ aá tɩkɛ bána mɛ́.
12 Ɛ́ viínyi tɛ́l ná a mʋ́ yakɛ mʋʋ mɛ́,
kɔ́ʋ́ hilli má mʋ́ aá zaari mʋnaa mɛ́.
13 Beé rí tɛ́ ɩ cɔnnɛ lɩksɛn(kɛ́rsɛ),
ká nɩdaarɛ́ wuu wolli zʋ́ aá kúúni viínyi>>
14 Baka koo lɩ baka, a ko aá zɔkɩ́ viínyi tuu ná,
balla lɩ gɩr ko aá dúú.
15 Doe wuu tɩna Wɩɩsɛ, bɩrko;
wúrí sɩ́ɛ́ bána nyúú a bel ná.
Tʋ́ŋ tʋ́ŋ a la viínyi né tá,
16 a la mukúr ná ɩ néduu nɛ́sɛ há cɔ́ŋsɛ tá,
bio ná ɩ há píí dóé pɔ́ʋ́.
17 Níŋ dúú, a coki;
zɔkrʋ́ sɩɛ́ sɩ́ díwó ɩ cɔ́wɩɩlɔ́ tɛ́ŋ mɛ́.
18 Píí nɛ́sɛ sakɛ nɛ́ŋ ná há mɩnɩ́ néduu rí,
bio ná daha ɩ há píí dóé pɔ́ʋ́ mɛ́.
19 Ɛ́ é, á wɩ́ɩ́ mɩ́ɩ́ kɛkɛ;
a ráá bɩr ká mɩɩsɛ, ráá wolle bíí yɩr mɛ́.
20 Nyuutɩna Wɩɩsɛ, doe wuu tɩna, a ráá bɩr ká mɩɩsɛ;
wúrí sɩ́ɛ́ cáásɩ́rá, ráá ná laatɛ́.