Á tɔ́ɔ́ zɔkɔ́, pɛ́rá mɛ́
79
1 Azafɛ yɩl.
Wɩɩsɛ, duó naŋá kuó lɛ́ɩ́ liwe,
ɓa ɔ́ɔ́ ɩ jaa ná kɔ́ʋ́ dʋŋɔ zʋ́ busunnú,
ká zɔkɛ Zerizalɛmɛ má.
2 Ɓa ɓʋ́ʋ́sɩ́ tʋtʋnna
a pɔ́wɔ́ lɛ́lɛ́ pá bána nyúú diíwiisi,
nɩɛ ná há cɩ́nɛ́ tɩkɩ́ namɩ́ŋsa, a pá tíé nyúú balla,
3 ká bɩ́sɩ́wɔ́ cɛ́llɛ́ tá ɓa pɩpal
anɛ nyii Zerizalɛmɛ kile wuu,
nɛ́ŋ too a pɔ́wɔ́ aá hú.
4 Nárá kennináŋá haá bɛ́ŋsɩ́rá ɛ́,
nɩɛ ná há mɩ́ŋrá laka haá mɔ́ŋrá ɛ́, aá lɔrɩrá.
5 Nyuutɩna, tɛ́ŋ beé rí, rɩɩ cɔ́ɛ́ déŋdéré néé tenni,
rɩɩ bánɔnnɩ́ néé há nɩhɩ̃́ níŋ háá díé pɔrɛ.
6 Díí cɔ́wɩɩlɔ́ duówa ná há wɩ́ɩ́ ɛ̃́ nyúú,
dɩtɩllɛ́ ná há wɩ́ɩ́ cʋɔlɛ nyúú,
7 bé wɩ́ɛ́, ɓa ɓɩlɛ Zakɔbɛ nɩɛ,
ká zɔ́kʋ́ dɩtɩllɛ.
8 Sɩ́ ló ráá dí wɩ́zɔkɛ́ ná há daarɛ wɩ́ɩ́la.
Lo rɩɩ susúfɔ́ fa kɩ́kɛ́lɛ́ ko lárá sɩ́ɛ́,
beé wɩ́ɛ́, á nɛ́sɛ tíó kɩ́ŋkáŋ.
9 Á laataarɔ, á Wɩɩsɛ, pɛ́rá mɛ́,
ɩ yɩr ná há piŋó wɩ́ɛ́.
Lá ráá tá, sɛ́sɩ́rá wɩ́bɔma tá,
ɩ yɩr ná há zeno wɩ́ɛ́.
10 Beé rí tɛ́ rɩ duówa nɩɛ ká nʋɔ a bʋ́lɛ́:
«Ɓa wɩɩsɛ ná mɩ́ŋ nɛ́ɛ́ rɛ́>>»
Á sɩ́ɛ́ mɛ́, lo rɩ duówa nɩɛ nɛ,
rɩɩ díí tɛŋbuóro ɩ tʋtʋnna ná há sʋ́sɛ́ yɩr mɛ́.
11 Lo rɩ bɩnajaa nɩɛ hííne zʋ́ɩ́ dɩllɛ;
lo rɩ nɩɛ ná há sʋʋ dánʋ́ɔ́ mɛ́, ká mɩɩsɛ
a tɩ́ŋɩ́ vadóé mí.
12 Nyuutɩna, túŋ zóŋ ná á kennináŋá ná
há píé tʋ́ksɩ́ naasɩ́ balpɛ ɓa nyúú.
13 Ɛ́ é, á nɩɛ ná há kɛ́ɩ́ nɩɛ ɩ nʋnʋ́ɔ́lɛ,
á sɩ́ wolli aá píŋsi tɛ́ŋ wuu mí,
a dɛ́nnɩ́ a kaá mʋ́ bɩŋsɛ rɩ́ bɩŋsɛ.