Sɩ́ŋ vɛ́ɛ́ tá ŋ́ nɩ́ɩ́nɛ́ tɛ́ŋ mɛ́
71
1 Nyuutɩna Wɩɩsɛ, ɩ nɛ́ káŋ dɩyuoli;baá sɩ́ ló rɩ́ŋ dí hɩ̃́ɩ̃́sɛ, abádá.
2 Ɩ taŋá ná sɩɛrʋ, ɩ sɩ́ pɛ́ŋ mɛ́, a láŋ tá.
Ɓilí dɩllɛ a cáásɩ́ŋ, a láŋ tá.
3 A bʋ́ɩ́ a páŋ, rɩ́ŋ yuólí,
a tú aá peri tɛ́ŋ wuu mí:
ɩ vɔwɔ rɩ́ɩ́ láŋ tá nɛ́.
Oo, ɩ nɛ́ káŋ bʋ́ɩ́, ŋ dóé dɩhɩ̃́.
4 Ŋ Wɩɩsɛ, láŋ tá nɩbɔma nɛ́sɛ mɛ́,
nɩɓʋ́ʋ́ra arɩ́ nɩtɩ́ɛ́nnɛ nɛ́sɛ mɛ́.
5 Nyuutɩna Wɩɩsɛ, ɩ nɛ́ káŋ yɩɛla,
ŋ tɩɛkɩ́ mɛ́ nɛ́, ŋ pʋ́ɔsɛ tɛ́ŋ wuu mí.
6 Ŋ lʋlɛ tɛ́ŋ wuu mí, ŋ yelli mí ní,
ɩ́ lɩsɩ́ŋ ŋ́ maá luoru mí.
Ŋ sɩ́ dɛnnɩ́ tɛ́ŋ wuu mí.
7 Ŋ fá ká wɩ́gɩrɩ́ rɛ́, a pá nɩɛ ɓɩkana;
ɩ nɛ́ fá káŋ dɩyuoli ná há duóko.
8 Wɩ́ɩ́ ná fá há súŋ nʋɔ, ʋ nɛ́ ká rɩ́ŋ dɛ́nnɩ́,
rɩ́ŋ píŋsí tápʋ́l é wuu.
9 Mʋ́l né mí ŋ há nɩ́ɩ́nɛ nyɛ́, sɩ́ŋ vɛ́ɛ́ tá;
ŋ dóé tenno, sɩɛ́ sɩ́ɩ́ har bɩr tɛ́ŋ.
10 Beé wɩ́ɛ́, ŋ dɩŋdɔma bʋ́lɩ́ŋ wɩ́ɛ́ rɛ́,
nɩɛ ná haá bɛ́llɩ́ŋ, ɓaá vʋ́ʋ́rɩ́ŋ wɩ́ɛ́ rɛ́.
11 Ɓa sɛ́: «Wɩɩsɛ vɔ́ʋ́ tá;
ɩ́ tɩ́ŋʋ́ mɛ́, a kánʋ́,
nɛ́ŋ too a lɔ́ʋ́ aá tá.»
12 Sɩ́ɩ́ tɩɩ kaa kɛ́kɩ́ŋ mɛ́, Wɩɩsɛ,
ko kɩkɛ́lɛ́, ŋ Wɩɩsɛ, a pɛ́ŋ mɛ́.
13 Nɩɛ ná há cɩ́nɩ́ŋ mɩɩsɛ lɩsɛ́ mɛ́,
a rɩ hɩ̃́ɩ̃́sɛ díwó rɩ́wɔ́ sʋsɛ.
Nɩɛ ná háá jáŋ bɔ́ŋbɔ́ŋ,
a rɩ hɩ̃́ɩ̃́sɛ tɔ́wɔ́, rɩ́wɔ́ yɩr zɔkɛ.
14 Ŋ é kéŋ yɩɛla, ŋ waá bɔ́l,
ŋ́ dɛ́nnɩ́ nɛ́ tɛ́ŋ wuu mí.
15 Ɩ taŋá ná arɩ́rɩ́ɩ́ laatɛ́ ná wɩ́ɛ́
mɩnɩ́ŋ nʋɔ mɛ́ tapʋ́l é wuu,
ŋ wʋ́ɔ́ wuó dɩɩsɛ.
16 Nyuutɩna Wɩɩsɛ, ɩ tʋtʋŋzeŋse ná yɩr mɛ́ nɛ́, ŋ vɩva,
ɩ dʋŋɔ taŋá ná wɩ́ɛ́ nɛ́ mɩnɩ́ŋ nʋɔ mɛ́.
17 Wɩɩsɛ, ɩ karmɩ́ŋ ŋ pʋ́ɔ́sɛ tɛ́ŋ wuu mí ní,
a sɩɛ́ ko aá mɔ́ nyɛ́ mɛ́, ŋ́ haa bʋ́llɩ́ wɩ́wéré ná wɩ́ɛ́.
18 Arɩ́rɩ́ŋ nɩ́ɩ́nɛ́ ná wuu arɩ́rɩ́ŋ nyúpʋpʋmma ná wuu,
Wɩɩsɛ, ŋ há sɩ́ vɛ́ɛ́ tá:
ká rɩ́ŋ há wolli cáárɩ́ vaamɔ wɩ́állɛ, a pá woo né,
arɩ́rɩ́ɩ́ ballɩ́ a pá woo ná háá kúé.
19 Wɩɩsɛ, ɩ taŋá nyɩ́ɩ́sɔ́,
ɩ nɩ́ɩ́ a wɩ́zeŋse,
Wɩɩsɛ, áŋ nɩhɩ̃́>> (ɩ nɔŋɔ mɩ́ŋ nɛ́ɛ́>>)
20 Ɩ nɛ́ ɛ́ɛ́ á ná sazɔkɔ́ arɩ́ wɩ́halawa ɓɩkana,
amá ɩ sɩɛ́ sɩ́ lo ráá bɩrka mɩɩsɛ.
Ɩ nɛ́ sɩ́ a rɩ́ŋ bɩrlɛ́ lɛ́lbule sɩɛrʋ.
21 Ɩ nɛ́ sɩ́ bɩr kánɩ́ŋ yɩr ɓɔ́,
ká nɛ́ bɩrbʋɔlɩ́ŋ.
22 Ɛ́ mɛ́ nɛ́ sɩɛ́ rɩ cemo zʋ́ŋ nɛ́sɛ,
rɩ́ŋ dɛ́nnɩ́, ŋ́ Wɩɩsɛ, ɩ nɩcɩtɩkɔ́ ná wɩ́ɛ́;
Ɩzɩrayɛl kaŋdʋŋɔ,
ŋ dú lɔŋŋɔ a pɛ́ɩ́.
23 Ŋ sɩ́ dú pɛ́ɩ́,
ká rɩ́ŋ nʋɔ má wuri
a yɩ yɩɩla pɛ́í arɩ́ satɔrɔ́,
beé wɩ́ɛ́, ɩ yɔ́wɔ́ láŋ mɩɩsɛ.
24 Ŋ nɔŋdɩlɩ́ sɩ́ bʋ́lɩ́ taŋá ná wɩ́ɛ́,
tápʋ́l wuu,
beé wɩ́ɛ́, nɩɛ ná fá haa jáŋ bɔ́ŋbɔ́ŋ,
hɩ̃́ɩ̃́sɛ kéŋwó, ɓa yeŋŋi (yieki).