Wɩ́ɛ́ dúkíŋ, láŋ tá
69
1 Davidi yɩl, ʋ há dú cemo a yɩ, ʋ mɩ́ŋ gɔk'áná gɔkɩ́ sɩɛrʋ.
2 Láŋta Wɩɩsɛ:
nyii zɩ́nɔ́ peri baŋ.
3 Ŋ́ mʋ́ʋ́rɔ́ aá tuwi pɩpɛ́rɛ́ mʋ́l nɛ́, ká wʋ́ɔ́ mʋ́l peri má,
óŋ too a kánɩ́ŋ aá cɛ́.
Ŋ́ mɩ́ŋ lúŋe mʋ́l,
nyipoo dɔmɩ́ŋ aá va.
4 Ŋ́ caaso a pii bɔ́l
ŋ líŋɓoro kaasɛ, a bubuori anɛ níŋ;
ŋ sɩ́ɛ́ má bɔ́l a tɩ́ŋɩ́ŋ háá dɛ́llɛ́ Wɩɩsɛ wɩ́ɛ́.
5 Nɩɛ ná haa dɔmɩ́ŋ yɔ́ɔ́,
ɓa káŋ a kɩ́llɩ́ŋ nyúpʋsɛ,
nɩɛ ná háá jáŋ zɔkɛ́,
kaa wɩ taŋá kéné,
ɓa kéŋ dóé.
Ŋ́ a ɛ́rɛ́ɛ́ rɛ́ kaa túŋ
oŋ ná ŋ há wɩ gɛ́>>
6 Ŋ ɩ̃́ŋ cʋllɛ mʋ́ɔ́sɔ́, Wɩɩsɛ
ŋ wɩ́zɔkɛ́ má wɩ́ɩ́ sɩ́ɛ́ mɛ́ féŋse.
7 Nyuutɩna Wɩɩsɛ, Doe wuu tɩna,
sɩ́ ló rɩ nɩɛ ná yɩɛla há mɩnɩ́ mɛ́
rɩ́wɔ́ dí hɩ̃́ɩ̃́sɛ a ŋ wɩ́ɛ́,
Ɩzɩrayɛl Wɩɩsɛ,
sɩ́ lo rɩ nɩɛ ná háá jɛ́ɩ́
rɩ́wɔ́ yeŋŋi ŋ wɩ́ɛ́.
8 Ɩ wɩ́ɛ́ nɛ́ tɛ́, ŋ nyammɛ zome,
hɩ̃́ɩ̃́sɛ tɔ́ŋ sɩ́ɛ́ mɛ́,
9 ŋ a nɩhɔ́r ŋ́ maábináŋá sɩɛrʋ,
ŋ jaa nɩɛ wɩ́ŋ ɩ̃́.
10 Ʋ ká ɛ́ nɛ́, ɩ jaa colle nɩhɩ̃́ níŋ ní
aá nyɩkɩ́ŋ;
zome ná ɓa há píé aá tʋ́ksɩ́,
lɔ́ʋ́ aá wɩ́ŋ mɛ́ nɛ́.
11 Ŋ wíó, a vɔwɛ nʋɔ,
ɛ́ má a zome a páŋ.
12 Ŋ laalɛ yuó jɔ́ɔ́,
ʋ má bɩrmɛ mɔ́ŋ wɩ́ɩ́ a pɔ́wɔ́.
13 Nɩɛ ná há ké tɔ́ɔ́ nʋɔ gɩgáásɩ́ŋ nʋɔ mɛ́,
ŋ nɛ́ ká yɩl, sɩ́nyɔ́ɔ́ra nʋʋsɛ mɛ́.
14 Nyuutɩna, náŋ wɩ́sʋlɔ́:
tɛ́ŋ ná há mɔhɛ̃́ rɩ́ɩ́ wúrí sɩɛrʋ páŋ;
Wɩɩsɛ ná nɩcɩtɩkɔ́ há zeno,
saŋɩ́ŋ sʋ́lɛ́, beé wɩ́ɛ́, ɩ nɛ́ ká taŋá laataarɔ.
15 Pɔ́sɩ́ŋ lɩsɛ pɩpɛ́rɛ́ sɩɛʋ; rɩ sɩ́ mʋ́ʋ́rʋ;
láŋ tá nɩɛ na há bɛ́rɩ́ŋ nɛ́sɛ mɛ́,
arɩ́ nyiluŋe mí.
16 Rɩ nyipoo sɩ́ŋ pii col,
rɩ lɛ́lɛ́tɔ́ɔ́ sɩ́ŋ liŋu,
rɩ víl (lɛ́lbule) sʋ́ʋ́ nʋɔ tɔ́ héŋ mí.
17 Lɩsɛ nʋɔ páŋ, Nyuutɩna Wɩɩsɛ,
beé wɩ́ɛ́, ɩ nɩcɩtɩkɔ́ nɛ́ wéré;
súsúfɔ́ɔ́ zeno, bɩrɩ́ sɩ́ɛ́ cáásɩ́ŋ,
18 ká baá sɩ́ɩ́ sɩ́ɛ́ kaa nyummí tʋtʋnnɔ rɩ́.
Sazɔkɔ́ péríŋ; sɩ́ vílmu kaa lɩsɛ nʋɔ páŋ;
19 péríŋ laka, ɩ nɛ́ káŋ laataarɔ́;
láŋ tá ŋ dɩŋdɔma nɛ́sɛ mɛ́.
20 Ɩ ɩ̃́ŋ (néŋ) zome, ŋ hɩ̃́ɩ̃́sɛ arɩ́rɩ́ŋ yeŋŋe;
ŋ dɩŋdɔma wuu mɩnɩ́ sɩ́ɛ́.
21 Zóŋ zɔkɩ́ŋ sɩɛrʋ,
ɛ́ hé pʋɔlɩ́ páŋ;
ŋ ká yɩɛla rɩ nɛ́ŋ sɩ́ fáŋ súsú, amá yɔ́ɔ́ nɛ́;
ŋ ká yɩɛla rɩ nɩɛ sɩ́ bʋɔlɩ́ŋ, amá ŋ wɩ nɛ́ŋ néé.
22 Ɓa hé bɛ́rɔ́ ŋ ɓɩdííli sɩɛrʋ;
nyinyʋɔsɛ há kéníŋ, viínɛgɩrɛ nɛ́ ɓa páŋ rɩ́ŋ nyɔ́.
23 A rɩ́wɔ́ ɓɩdííli bɩrmɛ bára a pɔ́wɔ́ tɩɩ,
ká a wayɩwa/filewa, a pɔ́wɔ́ nɩcolle.
24 Lo rɩ́wɔ́ nyʋmmɛ, a sɩ́ ráŋ ná;
a rɩ́wɔ́ dudúúri deŋdéré.
25 Dí cɔ́ɛ́, ɓa nyúú;
rɩ́ɩ́ cɔwɩɩlɔ́ zeno ná péríwó.
26 A rɩ zɔkrʋ́ péríwó púl,
rɩ nɛ́ŋ oro wuu sɩ́wɔ́ jɩɩsɛ sɩɛrʋ zʋ́,
27 beé wɩ́ɛ́, ɓa piŋŋi nɛrɔ ná ɩ há bɛ́ŋsɛ́;
aá dɩɩsɛ wɩɩla ná ɩ há ɛ́ɛ́ ɓa peri ɛ́ nɩɛ nʋɔ.
28 Dɩ́ɩ́sɩ́wɔ́ wɩ́bɔmɔ né, a súúríwó wɩ́bɔma ná ná náŋá mɛ́,
a makɛ rɩ́wɔ́ sɩ́ taŋá kánʋ́.
29 A rɩ́wɔ́ yɩra yʋ́ksɛ hiẽso kɛnɔ sɩɛrʋ,
rɩ́wɔ́ yɩra sɩ́ tɩ́ŋ zʋ́ nɩtaŋáwa yɩra sɩɛrʋ,
hiẽso kɛno mɛ́.
30 Ŋ́ ká nɛ́múrtɩ́ŋ, wɩ́hala nɛ́ŋ:
Wɩɩsɛ, ɩ laatɛ́ nɛ́ sɩ́ láŋ mɛ́.
31 Ŋ sɩ́ wolli yɩ yɩl a bɛ́ Wɩɩsɛ yɩr mɛ́,
ŋ sɩ́ pɔ́ʋ́ díé, a píŋsú.
32 Wɩ́ɩ́ ná háá tɔrɛ Nyuutɩna Wɩɩsɛ sɩɛrʋ, a kɩllɛ nɔɔ nɛ́ ɛ́,
a kɩllɛ nɔɓala há ká nyɩsɛ arɩ́ nacɩksɛ tɩ́na.
33 Nɛ́mútɩ́ɩ́na ná ɛ́, aá jʋ́ɔ́sɛ a bʋ́lɛ́:
«Ɩ́ nɩɛ ná háá ja Wɩɩsɛ
rɩ mɩgbó péríwa.»
34 Beé wɩ́ɛ́, Nyuutɩna Wɩɩsɛ la nɩyaara sʋ́lɛ́,
rʋʋ nɩɛ mɩ́ŋ bɩnajaa mɛ́ má, ʋ wʋ́ɔ́ vɛ́ɛ́ a tá.
35 Bána rɩ́ tíé, mʋrɛ
arɩ́wɔ́ sɩɛnnɛ onni wuu, ɩ́ píŋsú.
36 Beé wɩ́ɛ́, Wɩɩsɛ sɩ́ la Sɩɔŋ tá,
ká bɩrsɔ́ Ziida tɔ́nɛ.
Nɩɛ sɩ́ mɩ́ŋ ráŋ tɩ́llʋ́,
37 ʋ sɩ́ ɔ́ʋ́ tʋtʋnna dúnɩɛ liwe,
ká rɩ nɩɛ ná má há cóú yɩr ná mɩ́ŋ ráŋ.