65
1 Gɔkɩ́. Davidi yɩl ná ʋ há yɩ́ɛ́, ʋ mɩ́ŋ gɔkɛ áná gɔkɩ́ sɩɛrʋ.
2 Wɩɩsɛ ná há mɩ́ŋ Sɩɔŋ mɛ́,
ɩ cɛrɔ rɩ́ píŋse,
ɩ mɔhɩ̃́rá nʋtallɛ nʋlɩsɩ́wá lɛ́ɩ́.
3 Ɩ nɩ́ɩ́ zesi wɩsʋlɔ́,
nɩbíhiẽsi wuu sɩɛ́ kóé rí.
4 Ŋ wɩ́zɔkɛ́ fa dúkíŋ nɛ́sɛ
amá ɩ párá wɩ́bɔma a tá.
5 Nɛrɔ ná ɩ há lɩsɛ́ a yɩ́rʋ́, ʋ ná wér,
ʋ sɩ́ mɩ́nɩ́ wuolo sɩɛrʋ.
Á sɩ́ díí jaa oŋwéré,
ɩ jaa onni ná há kɛ́ɩ́ dʋŋɔ tɩ́llɛ́, a vɔksɛ.
6 Á laataarɔ Wɩɩsɛ,
ɩ nɛ́ tɛ́ tíé wuu ká tɛŋfɩ́ɛ́l,
a mʋ́ yakɛ dɩbole mʋrɛ mɛ́,
ɩ tɩ́ŋ wɩ́gɩrɛ́ mɛ́ nɛ́
a lɩsɛ nʋɔ aá párá taŋá sɩɛrʋ.
7 Ʋ nɛ́ kéŋ pallɛ cɛ́, a tíŋʋ́ vadóé;
dóé ní kɔ́ʋ́ tɩŋa vɔ́wɛ́.
8 Ʋ nɛ́ ɛ́ɛ́ mʋrɛ dɔmɛ sisikli,
ʋ nɛ́ ɛ́ɛ́ nyigʋgʋllɛ dɔmɛ sisikli,
ʋ nɛ́ ɛ́ɛ́ nɩɛ kʋ́ɔ́llɛ má nyʋ́nyɔ́ ráŋ.
9 Ɩ wɩ́gɩrɛ́ máánɛ dúníé toko nɩɛ nuʋsɛ,
ɩ nɛ́ ɛ́ɛ́ wɩɩsɛ dɩpomí arɩ́ wɩzʋʋlɔ́ nɩɛ cicáási satɔrɔ́.
10 Ɩ nɩ́ɩ́ bel tíé mí, ɩ nɛ́ pɔ́ʋ́ nyii;
ɩ nɛ́ kuóɓɩ́ɛ́ pʋ́rkʋ́.
Wɩɩsɛ polo súó rɩ́ nyii,
ɩ nɛ́ ɛ́ɛ́ ɓɩdííle mɩ́ŋ a pá nɩbííne.
Ná ɛ́ɛ́ ɩ há ɓɩ́ɛ́rɛ tíé:
11 nyii sú tíé nyinaasɛ,
a tɔ́ʋ́ paɓʋ́ɔ́ra (dúŋdúóme) mɛ́,
ɩ ɔ́ɔ́ dózeŋse ko tɔ́ɔ́ tíé wuu mí,
ɩ hé bárka a pá oŋ nyɩsɛ.
12 Ɩ a wɩ́wéré a ɓʋ́ bɩna,
ɩ dɩtɩŋɩ́ wuu, kɔrɔ ɓɛsɔ.
13 Pʋsɛ dɩdíé, gɩrbéteke sɩɛrʋ kéŋ kɔrɔ kɩ́ŋkáŋ;
dúŋdúome kíle wuu satɔrɔ́ mɩ́nɔ́,
14 pʋsɛ sú pʋsɛ nyɔɔ dɩdíé,
polli sú rɩ́ oŋparɛ́:
dɩhɩ̃́ wuu dʋdɔ́ŋ gɔkɩ́ arɩ́ satɔrɔ́.