Suuri sʋ́lɛ́ wɩ́ɛ́
51
1 Davidi yɩl, a mɩ́ŋ gɔkɛ nɔhɔ̃́ gɔkɩ́ sɩɛrʋ.
2 Davidi há kéŋ Bɛtɩsɩba a pɛ́, wɩlaabʋlla Nataŋ mʋ́ gáásʋ́ nʋɔ mɛ́, ɛ́ har mɛ́ nɛ́.
3 Ŋ (+áná>>) Wɩɩsɛ, fáŋ súsú, ɩ nɩcɛ́tɩkɔ́ ná yɩr mɛ́;
sɛ́sɩ́ŋ wɩ́zɔkɛ́ a tá, ɩ zílzeno ná yɩr mɛ́.
4 Sɛ́sɩ́ŋ wɩbɔmɔ a tá
mʋ́ʋ́rɩ́ŋ dɩnyɔ́rkɛ a tá.
5 Beé wɩ́ɛ́, ŋ tɩɩ ɩ̃́ŋ wɩzɔkɛ́,
ŋ béló aá náŋ wɩ́bɔmɔ ná tɛ́ŋ wuu mí.
6 Ɩ dʋŋɔ, ɩ dʋŋɔ léŋ mí ní, ŋ aa zɔkɛ,
wɩ́ɩ́ na há wɩ weri ɩ sɩ́ɛ́ mɛ́, ʋ nɛ́ ŋ́ ɛ́ɛ́,
ɛ́ wɩ́ɛ́, ɩ kéŋ táŋa rɩ́ɩ́ nɛ́ kúé wúrí nʋɔ mɛ́,
nyɩɛrʋ tóí rɩ́, rɩ́ɩ́ nɛ́ kúé aá dí sarɩya.
7 Néí ní, wɩ́bɔma sɩɛrʋ nɛ́ ɓa lʋ́lɩ́ŋ,
ŋ́ maá mɩ́ŋ wɩ́bɔma sɩɛrʋ nɛ́, ká kánɩ́ŋ puo.
8 Bino sɩɛrʋ, ɩ há cóú ná nɛ́ ká táŋa,
ɩ có rɩ́ŋ ká zɩ́mɛ́, ŋ betuu sɩɛrʋ lúŋlúŋ.
9 Pi ɩzɔpɛ sɛ́sɩ́ŋ wɩ́bɔmɔ tá, rɩ́ŋ sɩ́ busunnú kánú;
fóŋ, rɩ́ŋ pɩ́ɩ́rɛ a kɩ́llɛ duódɔ́wʋ́ɔ́.
10 A rɩ́ŋ ná satɔrɔ́, a jʋ́ɔ́sɛ́,
rɩ́ŋ heŋgbele ná ɩ fá há bonne isi gbɔ́ gbaala.
11 Sɩ́ lo rɩ́ɩ́ sɩ́ɩ́ cɔ́ŋ wɩ́bɔma mɛ́,
dʋsɩ́ŋ wɩ́zɔkɛ wuu.
12 Ŋ áná Wɩɩsɛ, páŋ beŋtuu ná há wɩ busunnú kéné,
lo rɩ sabɩŋfɛlɔ ná há kéŋ dóé mɩ́nɩ́ŋ mɛ́.
13 Sɩ́ŋ gbesí tá dɩboli,
sɩ́ɩ́ sabɩɩna ná há kɔ́ʋ́ dʋŋɔ kaá lɩ́sɩ́ŋ mɛ́;
14 lo rɩ́ŋ díí laatɛ́ ná satɔrɔ́,
ká rɩ sabɩɩna ná há wéró pɛ́ŋ mɛ́.
15 Ŋ sɩ́ makɩ́ ŋmɛ́nɔ ná a pá nɩɛ ná há ɛ́ɛ́ zɔkɩ́ mɛ́,
rɩ wɩ́bɔ́ŋ'aara bɩrkóí rí.
16 Ŋ áná Wɩɩsɛ, ŋ laataarɔ, láŋ tá ŋ há bɩsɛ cɛ́l tá wɩ́ɛ́,
a makɛ rɩ́ŋ nɔŋdili cáárɩ́ táŋa ná.
17 Wuríŋ nʋɔ Nyuutɩna,
ká rɩ́ŋ nɔŋduli dɛ́nnɩ́.
18 Beé wɩ́ɛ́, ɩ wɩ có rɩ́ŋ ɔsɛ vʋk nɛ́ pɛ́ɩ́,
ɩ waá saŋ la vʋk'fisi.
19 Vʋk'ɔsɔ ná há peri Wɩɩsɛ sɩɛrʋ, ʋ nɛ́ ká sabɩɩna ná há bɩ́rsɛ́;
sɩɛrʋ ná há bɩ́rsɛ́, aá múúrú tɩɩ, Wɩɩsɛ wʋ́ʋ́ vɛ́ aá tá.
20 A wérí a pá Sɩɔŋ,
bɩrsɔ́ Zerizalɛmɛ zeŋe.
21 Ɛ́ mɛ́ nɛ́ ɩ sɩ́ colli vʋka ná há mɩ́nɩ́ wɩ́bile sɩɛrʋ,
satɔɔrɩpalɔ́ ná há ká pírmi arɩ́ vʋk'fise;
ɛ́ mɛ́ nɛ́ ɓa sɩ́ kɛsɛ nɔɓallɛ a ɔsɛ vʋka ɩ koro ná daha.