Yɩɩla 46
46
1 Koore bɛlɛ yɩl, ɓa há yɩ́ɛ́ rɩ́ hágɔkɔ liŋó (liŋgelgel), ʋ mɩ́ŋ gɔkɩ'áná gɔkɩ́ sɩɛrʋ
2 Wɩɩsɛ nɛ́ kárá dɩyuoli arɩ́rá dóé,
dɩtɩ́ɛ́kɩ́ ná há mɩnɛ́ tɛ́ŋ wuu mí, sazɔkɔ́ tɛ́ŋ mɛ́.
3 Ɛ́ nɛ́ tɛ́ rɩ tíé níí zikle má,
rɩ pallɛ bonni aá ɓallɛ mʋrɛ sɩɛnnɛ,
á wɩ héwíŋ fá,
4 rɩ ɓa nyii ní cúúre aá dɔ́ŋ,
a wʋllɛ aá ginni pallɛ.
5 Amá fuo oro naasɛ rɩ hé satɔrɔ́ aá pá Wɩɩsɛ tɔ́ɔ́,
ʋ kɔ́ʋ́ dʋŋɔ Wɩɩsɛ ná kɛ́ oŋ wuu dɩmɩnɛ́ sɩɛrʋ.
6 Wɩɩsɛ mɩŋ ɛ́ tɔ́ɔ́ sɩsɩɛnnʋwa, ʋ wɩ vaklɛ.
Tɔ́ɔ́ mɩŋ pʋlɛ́ mɛ́ nɛ́ ká Wɩɩsɛ fɔ́ʋ́ búŋse:
7 Duówa nɩɛ gɩgáásɛ wɩ́ɛ́, dɩtɩllɛ́ vɩvaklɛ;
ʋ wúrú nʋɔ mɛ́, tíé mɩ́ɛ́rɛ.
8 Nyuutɩna Wɩɩsɛ ná há ká Doe wuu tɩna mɩ́ŋ ráá har.
Zakɔbɛ Wɩɩsɛ nɛ́ ká ráá dɩyuoli.
Dɩhiẽsi
9 Ɩ́ ká sɩ́ɩ́ mʋ́ ná Nyuutɩna Wɩɩsɛ wɩ'allɛ,
wɩgɩrɛ́ (zɔkrʋ) ná ʋ há ɛ́ɛ́ tíé nyúú.
10 Ʋ ɔ́ɔ́ lal cɛ́ a mʋ́ yakɛ dúníé toko mí,
ʋ nyʋksɛ tuo, a bori cɔlmɛ,
ʋ nyɩkɛ lalyóóritórkówa.
11 Ɩ́ bil laala. Ɩ́ zɩ́ŋ rɩ́ŋ nɛ́ ká Wɩɩsɛ.
Ŋ dí dóé duówa nyúú, ŋ dí dóé tíé mí.
12 Nyuutɩna Wɩɩsɛ, Doe wuu tɩna mɩ́ŋ ráá har.
Zakɔbɛ Wɩɩsɛ nɛ́ ká ráá dɩyuoli.
Dɩhiẽsi