Kuóro hájáásɛ gɔkɩ́
45
1 Hájáásɛ gɔkɩ́, Koore bɛlɛ há dú cemo ká dɛnnɛ, ʋ mɩ́ŋ gɔk'áná gɔkɩ́ sɩɛrʋ.
2 Wɩ́bʋlɛ ŋmɔma nɩ́ɩ́ cɩ́ɩ́nɩ́ŋ sɩɛrʋ,
ŋ sɩ́ wúríŋ nʋɔ a dɛnnɛ kuóro.
Ŋ sɩɛ́ fá có rɩ́ŋ nɔŋdɩlɩ́ nɩ́ɛ́sɛ
nɛrɔ ná háá pʋ́ŋsɛ dawituurí ní.
3 Ɩ wér nɛ́ kɛ́ nɩbííne wuu,
Zile mɩ́nɩ́ nʋɔ mɛ́;
Wɩɩsɛ hé barka má pɛ́ɩ́,
a kaá mʋ́ wuu.
4 Lalyóóribɩbar, vɔ́wɩ́ tokówí ɩ kʋ́ŋkɔlsɩ́ɩ́ mɛ́,
ɩ wér arɩ́rɩ́ɩ́ yɩr nɛ́.
5 Ɩ wér sɩɛrʋ, zɩ́nɩ́ zaka a dí ballɩ́
rɩ taŋá rɩ́ múúrtɩɩ arɩ́ tekétéke nyɩ́ɩ́sɛ.
Ló rɩ́ɩ́ néduu nɛ́sɛ tʋ́ŋ wɩgɩrɛ́:
6 Ɩ hɛ́mɛ́ kéŋ nʋɔ.
Ɓa sɩ́ zʋ́ kuóro dɩŋdɔma baŋcɩllɛ sɩɛnnɛ,
duówa nɩɛ sɩ́ ɓallɩ́ naasɛ mʋ́l.
7 Ɩ kuorí wɩ dɩtenni kéné,
ɩ kuódeŋtuke ká yɛ́rɛ́ deŋtuke ní.
8 Ɩ có taŋá, ká bɛrɛ bɔ́ŋbɔ́ŋ.
Wɩɩsɛ, ɩ Wɩɩsɛ má cóí ní
a kɩ́llɩ́ vallɩnáŋá
a lɩsɩ́ a ɔ́ŋsɛ satɔrɔ́ nʋʋ a héí mí.
9 Ɩ gɛnnɛ wuu de sʋsʋ́ɔ́rɛ miiri rɩ́ alowe arɩ́ kanɛllɛ sɔ́ŋ nɛ́.
Gɔkɩcɩksɛ cɩcɩ́ɩ́mɩ́ beŋtunyɩla jaa ná mɛ́
aá nyaasɩ́ nyúú (aá pɛ́ɩ́ satɔrɔ́).
10 Kuóro tole kéní baŋzɛllɛ ko,
(kuóre tolé mɩnɩ́ hácolle sɩɛrʋ)
háálɔ ná má há ɓɩ́ɛ́rʋ́ tɩɩ rɩ́ Ofiiri salmɛ
ʋ nɛ́ cɩ́nɩ́ néduu.
11 Ŋ tolo, zesi! Bel ná, ɓɩ́lɩ́ dɩllɛ:
Sʋllɩ́ dunɩɛ arɩ́rɩ́ɩ́ jaa nɩɛ wɩ́ɛ́.
12 Ló rɩ kuóro hɩ́ɛ̃́nɩ́ wér ná!
Ʋ nɛ́ kɛ́ɩ́ nyúútɩ́na,
ɓírmú sɩ́ɛ́ mɛ́.
13 Ɛ́ mɛ́ nɛ́, rɩ Tiiri nɩɛ ná há ká kuóre
a kɩllɛ nɩɛ wuu,
sɩ́ ká zile onni a ko nyɩ́sɩ́.
14 Kuóro tolo zʋ́ kuóro zʋ́ɔ́, ʋ tʋ́lɛ́,
salmɛ gɛfʋʋlɛ́ nʋ́ʋ́ súé.
15 Gɛŋmɛ́sɛ iríŋwa bʋ́ɩ́ nɛ́ fʋ́ʋ́ gɛsulli ná
ʋ há súé ɓa kánʋ́ aá mʋ́ kuóro rí;
ʋ hatɩnna ká toopéré ní, a nʋɔlʋ́ aá kóí rí.
16 Ɓa hé lɛ́ɛ́, a jʋ́ɔ́sɛ satɔrɔ́ sɩɛrʋ
aá mʋ́ kuóro zʋ́ɔ́.
17 Ɩ bɛlɛ sɩ́ lɛ́ɩ́ ánáwa nyúú mí,
rɩ́ɩ́ bilwó rɩ́wɔ́ a tíé wuu nyúú kuóbɛlɛ.
18 Ŋ sɩ́ píí yɩr a líísi woo wuu;
duó wuu nɩɛ má sɩ́ dɛ́nnɩ́ yɩr
tɛ́ŋ wuu mí, a káá mʋ́ wuu.