Nɩpiŋŋi (waalmɛ́ nɛrɔ) wɩsʋlɔ́
41
1 Davidi yɩl, a mɩŋ yɩɩla nyúútɩ́na yɩɩla kɛnɔ sɩɛrɔ.
2 Nɛ́ŋ ná haá gieli nɩpɔllɛ ná wér!
Kal ná wɩ́ɛ́ há sɩ́ bɩr yala pɔ́ʋ́, Nyuutɩna Wɩɩsɛ sɩ́ lɔ́ʋ́ tá.
3 Ʋ mɩɩsɛ mɩŋ Nyuutɩna Wɩɩsɛ nɛ́sɛ mɛ́ nɛ́, ʋ nɛ́ ɛ́ɛ́ ʋʋ́ dí tɔ́ɔ́ wér,
ʋ waá ló rʋʋ zʋ́ʋ́ dɩŋdɔma nɛ́sɛ.
4 Rʋʋ nɛ́ pɩ́nɛ́ aá ná wɩɩla, Nyuutɩna Wɩɩsɛ nɩ́ɩ́ bélú mí,
aá vaarʋ́ pʋɔlɩ́.
5 Ŋ é yɩrɛ Nyuutɩna Wɩɩsɛ nɛ́:
«Fáŋ susú ká vaarɩ́ŋ;
ŋ saŋɔ́, rɩ́ŋ ɔɔ zɔkɩ́ mɛ́.»
6 Ná sahɔ́ wɩ́ɩ́ ná ŋ dɩŋdɔma há bʋlɛ́:
«Kal beé rí é tɩɩ rɛ́, ʋ sɩ́ sʋ́wɛ́ rʋʋ yɩr yʋ́ksɛ>>»
7 Rɩ ɓa oro wuu kúó rʋ́ʋ́ néŋ, ʋʋ́ lúksíŋ ní (zaŋba nɛ́);
ʋ já nyɩɛrʋ tʋɔlʋ́ sɩɛrʋ, rʋʋ sɩɛ́ kúó lɩ har rɩ́, ʋ kaá mʋ́ cesi aá pɔ́ʋ́ náŋá.
8 Ɓa wɩ́ŋwɩ́ɛ́cówa (nɩɛ ná há có) hé náŋá mɛ́
aá vʋ́ʋ́rɩ́ŋ vʋ́ʋ́rɛ́, a ná ɛ́ ɓa há sɩ́ hálɩ́ŋ; ɓa sɛ́:
9 «Pʋɔlɩ́ ná há kénú, bɔmɔ́,
ʋ pɩ basa (godo mí) mɛ́, ʋ sɩɛ́ baá tó ɓɩ'isí má.»
10 Ŋ naŋnɔ́ŋfɩ́ɛ́mɔ́ ná má tɩɩ, ŋ fá há caasɛ lɔ́ʋ́ dí,
ŋ rɩ́rʋ́ fá dídí ɓɩɛ, ʋ nɛ́ bɩrɛ cɩ́nɩ́ŋ mɛ́.
11 Amá ɩ é, Nyuutɩna Wɩɩsɛ, fáŋ susú, ká cuolíŋ,
a makɛ rɩ́ŋ díŋ tɛŋbuóro ɓa nyúú.
12 Ná ɛ́ ná ŋ há sɩ́ zɩŋ rɩɩ mɩŋ har:
rɩ dɩŋdɔmɔ baá sɩ́ nʋɔ kánʋ́ rɩ́ɩ́ caasi ballɩ́ ŋ sɩ́ɛ́ mɛ́.
13 Ká pɛ́ŋ é mí, ŋ há wɩ́ɩ́ zɔkɛ wɩ́ɛ́,
a ló rɩ́ŋ mɩnɩ́ laka tɛ́ŋ wuu mí.
14 Nyuutɩna Wɩɩsɛ, Ɩzɩrayɛl Wɩɩsɛ bárka!
Ɩ́ bárkʋ́ tɛ́ŋ wuu mí.
Amɩɩ, rɩ ɛ́ nɛ́ ɓɩɛ́na cɩ́!