Rɩ nɩɛ wuu zɩ́mɩ́ há ɔ́ʋ́ ná a páŋ
40
1 Davidi yɩl, a mɩŋ yɩɩla nyúútɩ́na yɩɩla kɛnɔ sɩɛrʋ
2 Ŋ píŋ yɩɛla wuu a hé Nyuutɩna Wɩɩsɛ mɛ́ nɛ́,
ɛ́ nɛ́ ʋ ɓilú dɩllɛ a caasɩ́ŋ, a zesíŋ búŋse.
3 Ʋ lɩsɩ́ŋ vil ná mʋ́l há waá ná sɩɛrʋ, pɩpɛ́rɛ́ ná lúŋ há wɩ wúó máŋsɛ sɩɛrʋ.
Ʋ nɛ́ cuolíŋ, ŋ cɩ́nɩ́ŋ naasɛ bɛllɛ nʋɔ mɛ́ bʋ́ɩ́ daha;
ʋ nɛ́ ɛ́ɛ́ ŋ valɛ́ a mɔlɛ́.
4 Ʋ hé yɩfɛlɔ́ ŋ nʋɔ mɛ́,
yɩl ná píŋsɩ́rá Wɩɩsɛ.
Nɩɛ ɓɩkaná sɩ́ɩ́ sɩ́ ná,
a sɩ́ zɩ́ŋ rɩ́ Nyuutɩna Wɩɩsɛ kéŋ tíŋ,
a píwó yɩɛla hóú mí.
5 Nɛ́ŋ ná púú tɩɩ yelli Nyuutɩna Wɩɩsɛ, ʋ ná wér,
ʋ wʋ́ʋ́ sɩ́ɛ́ píé aá hé nyʋ́ktɩ́ɩ́na wɩ́'állɛ mɛ́
ʋ rɩ́ nyɛ́tɩ́ɩ́na wɩ náŋá míí hé.
6 Nyuutɩna Wɩɩsɛ, ɩ wɩ́'állɛ káŋ, ɓa mɔ́ bɛllɛ mɛ́ má!
Ɩ nɔ́ŋɔ tó.
Ɩ tʋ́ŋ tʋŋwéré rɩ́ tʋtʋŋzéŋse a párá.
Ɓa káŋ, ŋ wɩ nʋɔ kéné aá bʋlwɔ́ wɩ́ɛ́, aá dɩ́ɩ́sɩ́wɔ́ wuu.
7 Ɩ ɔ́ɔ́ ŋ zɩŋ
rɩ vʋka ɔsɛ́ ɛ́ rá má satɔɔ́rɩpallɛ nɩ́ɩ́ tɔ́rɩ́ sɩɛrʋ.
Pʋsɛ ná ɓa há ɓʋ́ɛ́ a fisí koro daha rá ɩ jɩ́já,
ɓa ná ɓa há ɓʋ́ɛ́ a sʋ́l suúri má rá ɩ jɩ́já.
8 Ɛ́ nɛ́ ŋ sɛ́: «Ŋ kéníŋ tɩɩ a kó aá pɛ́ɩ́ nɛ́.
Ŋ ná wɩ́ɩ́ ŋ há mɔhɛ̃́ rɩ́ŋ a kɛnɔ ná sɩɛrʋ.»
9 Ŋ Wɩɩsɛ, ŋ wɩ́jaalɩ́ nɛ́ ká rɩ́ŋ zilí,
ká nyaŋɩ́ wɩ́bile ná bilíŋ sɩɛrʋ.
10 Nɩkaná sɩɛrʋ,
ŋ sɩ́ caarɛ laabaarɛ wéró né há sɛ́: Nyuutɩna Wɩɩsɛ nɛ́ ká laataarɔ́.
Nyuutɩna Wɩɩsɛ, ɩ má tɩɩ ɩ̃́ɔ́ rɛ́, ŋ wɩ́ŋ nʋɔ wúó taŋŋɛ.
11 Ŋ wɩ́ɩ́ laatɛ́ ná wo kaá féŋsi,
amá ŋ sɩ́ caarɛ a bʋlɩ́ nɛ́ ká laataarɔ́ tɩɩ.
Nɩkaná má sɩɛrʋ, ŋ wɩ́ɩ́ nɩcɩtɩkɔ́ ná rɩ́rɩ́ sawér ná wɩ́ɛ́ kéné féŋsi.
12 Ɩ é Nyuutɩna Wɩɩsɛ, ɩ sɩɛrʋ wɩ́ŋ gʋ́ʋ́mɛ,
ɩ nɩcɩtɩkɔ́ ná arɩ́rɩ́ sawér ná nɩ́ɩ́ kɛ́rɩ́ŋ mɛ́ tɛ́ŋ wuu mí.
13 Wɩhalawa ɓɩkaná púŋ,
ŋ baá wʋ́ɔ́ wúó dɩɩsɛ má tɩɩ.
Ŋ wɩ́nyɔ́rkɛ wɩ́hala nɛ́, ŋ dídí,
ŋ baá wɩ́ có rɩ́ŋ nówó má tɩɩ.
Ɓa káŋ a kɩ́llɩ́ŋ nyúú nyúpʋsɛ má tɩɩ,
ŋ sɩɛrʋ má tɩɩ píí lɩ́ŋ tɩɩ.
14 Nyuutɩna Wɩɩsɛ, ŋ sʋlɩ́ rɩ, láŋ a tá;
Nyuutɩna Wɩɩsɛ, fá kɩ́kɛ́lɛ a ko láŋ a tá.
15 Rɩ hɩ̃́ɩ̃́sɛ arɩ́ sazɔkɔ́ pú nɩɛ ná haá jáŋ sʋʋ!
Rɩ nɩɛ ná há có rɩ́ŋ dí wɩɩla, gúl a di hɩ̃́ɩ̃́sɛ.
16 Rɩ nɩɛ ná haá mɔ́mɩ́ŋ mʋ́ʋ́nɛ (sikli)
hɩ̃́ɩ̃́sɛ há dukwó wɩ́ɛ́!
17 Amá, ɩ yɩr mɛ́, rɩ satɔrɔ́ nɩ́ɩ́sɛ nɩɛ ná wuu haá jɛ́ɩ́,
ká rɩ nɩɛ wuu há cóí, ɩ é laataarɔ́,
rɩ́wɔ́ sɩ́ bɔlʋ́ rɩ́wɔ́ caarɛ a bʋlɛ́: «Nyuutɩna Wɩɩsɛ zeno!»
18 Ŋ é ká nɛ́ŋmúrtɩŋ rɛ́, wɩɩlɩnar,
amá Nyuutɩna Wɩɩsɛ, ʋ bɩɩnɩ́ŋ wɩ́ɛ́.
Ɩ nɛ́ káŋ sɩsaŋnɔ́ arɩ́rɩ́ŋ laataarɔ́.
Ŋ (tɩ́na) Wɩɩsɛ, sɩ́ daanʋ́.