Pʋɔlɔ́ ná há ʋ̃́ wɩ́zɔkɛ́ nʋɔ mɛ́ wɩ́sʋlɔ́
38
1 Davidi yɩl. Rʋʋ líísú tɩɩ Wɩɩsɛ wɩ́ɛ́.
2 Nyuutɩna Wɩɩsɛ, ɩ cɔ́ɛ́ wɩ́ŋ rɛ́, amá táŋa sɩ́ŋ bɛ́ŋsʋ́;
ŋ wɩ́ɛ́ kéŋ cɔ́wɩɩlɔ́ a pɛ́ɩ́, amá táŋa sɩ́ŋ dɩllɛ mɩ́lmʋ́.
3 Ɩ hɛ́mɛ́ kéníŋ, ɩ nɛ́gume yakɩ́ŋ a yo tíé.
4 Ŋ tɛŋ dɩhɩ̃́ oro wuu baá wʋ́ʋ́ nʋɔ mɛ́ césé: ŋ cɔ́wɩɩlɔ́ ná nɛ́ sɩɛ́ tɛ.
Ŋ heŋbgélé má tɩɩ baá tówó nʋɔ mɛ́: ŋ wɩ́zɔkɩ́ nɛ́ tɛ ɛ́.
5 Ŋ wɩ́bɔma káŋ, ɓa isó a daarɩ́ŋ nyúú,
ɓa nyaŋɩ́ŋ anɛ cɩkɛ zime kɩ́ŋkáŋ.
6 Ŋ kéŋ fʋ́bɔma, ɓa sʋɔrɛ́ má:
ŋ cʋllɛ nɛ́ sɩ́ hé róŋ.
7 Tápʋ́l wuu ŋ mɩŋ hííne mí,
ŋ wuu ní bɔ́lɛ́, ŋ bɛ́klɔ́ ɓɔ́ŋ.(ŋ táŋa wuu ní tenne)
8 Ŋ tɩŋa nɩ́ɩ́ ká níŋ,
tɛŋfɩ́ɛ́l mʋɔ́ má tóŋ mɛ́.
9 Ŋ wɩ dóé kéné, ŋ wuu ní yɛ́rkɛ́,
ŋ sɩɛrʋ wuu píí lɩ́ŋ tɩɩ.
10 Nyuutɩna Wɩɩsɛ, ŋ ɩ̃́ wɩ́jaalɛ́ wuu ní,
ɓa ná má há ká hííne a páŋ, ɩ ɩ́wɔ́ wuu ní.
11 Ŋ baŋcɩla nɩ́ɩ́ lúkle, ŋ wɩ dóé kéné,
ŋ sɩ́ɛ́ má tɩɩ baá wɩ wɩ ráŋ ná.
12 Ŋ naŋnɔ́ŋsɛ, ŋ tɛ́ŋ wuu mí vallɛ náŋá,
ɓa yuori ká tá, ŋ wɩ́nɩllɛ ná wɩ́ɛ́;
ŋ kénnináŋá má káŋwɔ́ tɩɩ kɛ́kɩ́ŋ mɛ́.
13 Ɓa ná háá jáŋ mɩɩsɛ lɩ́sɛ́, hé báráwa aá dɛ́llɩ́ŋ;
nɩɛ ná há kéŋ bɔ́ŋbɔ́ŋ aá jáŋ, bʋ́l wɩ́ɛ́ aá jáŋ zɔ́kɛ́
a ká zaŋba wɩ́ɛ́ má cɩ́nɛ́ mɛ́ tápʋ́l wuu.
14 Amá ŋ é fɛ́ŋsɩ́ŋ dɩ́lla, ŋ wʋ́ɔ́ rɩ́ zesi;
ŋ wɩ nʋɔ mɛ́ wure anɩ́ŋ ká dɩltennu.
15 Ŋ ɔ́ɔ́ anɩ́ŋ dɩlla wɩ wɩ́ɛ́ nɛ́,
ŋ wɩ́ŋ nʋɔ mɛ́ wure rɩɩ bʋ́l wɩ́ɩ́.
16 Nyuutɩna Wɩɩsɛ, ŋ píŋ yɩɛla wuu hé mí ní,
Nyuutɩna ŋ Wɩɩsɛ, ŋ dɛ́llɩ́ nɛ́ rɩ́ɩ́ páŋ liŋó.
17 Beé wɩ́ɛ́, ŋ sʋ́lɩ́ nɛ́ a bʋ́lɛ́:
pɔ́ rɩ́wɔ́ sɩ́ŋ nyaná na rɩ́ mɔ́mɩ́ŋ
ká hoŋŋíwó tɩɩ rɩ́ɩ́ kɩ́llɩ́ŋ, rɩ́ŋ nɛ́ kúé nyɔ́rkɛ.
18 Ŋ rɩ́ sʋʋ ká lɛ́rɛ́,
ká wɩɩla há kánɩ́ŋ.
19 Oo, ŋ saŋɩ́ŋ wɩ́zɔkɛ́, ká ŋ sɩɛrʋ há zɔkɛ ŋ wɩ́zɔkɩ́ ná wɩ́ɛ́.
20 Ŋ dɩŋdɔma wómó, ɓa duóko;
ɓa káŋ a cɩ́nɩ́ŋ mɛ́, ká ŋ wɩ wɩ́ɩ́ má zɔkɛ.
21 Bɔ́ŋbɔ́ŋ nɛ́ ɓa píí túŋ wérí ŋ mɛ́,
a pɔ́ rɩ́ŋ baá sɩ́ wérí a.
22 Nyuutɩna Wɩɩsɛ, sɩ́ŋ vɛ́ tá; ŋ (Tɩna) Wɩɩsɛ, sɩ́ŋ mɛ́ kɛ́kʋ́.
23 Nyuutɩna Wɩɩsɛ, ŋ laataarɔ, fá kɩ́kɛ́lɛ a ko láŋ mɛ́.