Nɛrɔ há wɩ wɩ́ɩ́ zɔkɛ ká ɓa kánʋ́ mʋ́ sariya dɩdíí jɛ́nnɛ́
35
1 Davidi yɩl.
Nyuutɩna Wɩɩsɛ, cɩ nɩɛ ná há cɩ́nɩ́ŋ mɛ́,
yo (lal rɩ́) nɩɛ ná haá yó ŋ.
2 Pi hɔkɛ́rɛ ɓɩwíé arɩ́ ɓɩzeno,
isi daha a pɛ́ŋ mɛ́.
3 Ká cɔlmɛ wéri, ká ká saa há dí nʋʋsɛ bɛllɛ a ɓɔ́
a cɩ nɩɛ ná há cɩ́nɩ́ŋ mɛ́.
Ŋ dɛllɩ́ rɩ́ɩ́ bʋlɩ́ŋ a bʋlɛ́: «Ŋ é ní sɩ́ lɛ́ɩ́ a tá.»
4 Rɩ yɩtʋɔmɔ́ rɩ́ hɩ̃́ɩ̃́sɛ pú nɩɛ ná há cɩ́nɩ́ŋ mɩɩsɛ lɩ́sɛ́ mɛ́!
rɩ nɩɛ ná há kéŋ bɔ́ŋbɔ́ŋ aá jáŋ
sɩɛnnɛ zɔkɛ, rɩ́wɔ́ gúl.
5 Rɩ́wɔ́ dɔl anɛ nyɔpú poo há píé col,
tɛ́ŋ ná mɛ́ Nyuutɩna Wɩɩsɛ malɩka há sɩ́ kírwó;
6 rɩ binó mɩŋwɔ́ ŋmɛ́nɔ́ mɛ́, rʋʋ sɩ́sɩ́ɛ́rɛ,
tɛ́ŋ ná mɛ́ Nyuutɩna Wɩɩsɛ malɩka há sɩ́ kír a tɩŋwɔ́ mɛ́!
7 Ŋ wɩ wɩ́ɩ́ zɔkɛ,
ká ɓa hé bára rɩ́wɔ́ kánɩ́ŋ,
ɓa lú butuó rɩ́ŋ ɓálʋ́ sɩɛrʋ.
8 Rɩ wɩ́hala káŋwɔ́ a úríwó mí,
rɩ bára ná ɓa há hé bɩrkáŋwɔ́ tɩɩ
ká rɩ́wɔ́ tɩɩ má ɓallɛ butuó ná ɓa há lúé sɩɛrʋ!
9 Amá ŋ é, satɔrɔ́ sɩ́ súŋ Nyuutɩna Wɩɩsɛ yɩr mɛ́,
ʋ laatɛ́ ná yɩr mɛ́, ŋ sɩ́ wolli a jʋ́ɔ́sɛ.
10 Ŋ bʋl rɩ́rɩ́ŋ sɩɛrʋ wuu a bʋlɛ́:
«Nyuutɩna Wɩɩsɛ, ɩ nɔ́ŋ tó:
ɩ nɛ́ la nɩyaarɔ aá tá ʋ dɩŋdɔŋbɩbará nɛ́sɛ mɛ́;
ɩ nɛ́ la wɩ́lnaarɔ́ aá tá kaafordiire nɛ́sɛ mɛ́.»
11 Nyɩ́ɛ́rɛ daŋsɩ́ɛ́ nɩɛ nyɩ́ɩ́sɩ́wɔ́ tɩɩ;
wɩ́ɛ́ ná ŋ há wʋ́ɔ́ nʋɔ mɛ́ ɛ̃́ nɛ́ ɓa pi aá bɔ́sɩ́ŋ.
12 Bɔ́ŋbɔ́ŋ nɛ́ ɓa pi aá túŋ wérí ná ŋ há ɛɛ, sɩɛ́ néŋ ní ká ŋ dʋŋɔ má.
13 Ŋ dɩŋdɔma fá há ká pɔllɛ,
ŋ sɩɛrʋ fá zɔkɔ́,
ŋ fá múúríŋ tɩɩ a vɛ́ ɓɩdííle má tɩɩ
amá ŋ wɩ́sʋlɔ́ wɩ díé.
14 Ŋ fá kánɩ́ŋ tɩɩ anɛ ɓa káŋ naŋnɔ́ŋɔ ɛ́ rá ŋ maábinɔ́ŋɔ nɛ́,
ŋ sɩɛrʋ fá zɔkɔ́, ŋ híhííni
anɩ́ŋ maá há sʋ́wɛ́.
15 Ká ŋ ɓal, ɓa é hé náŋá mɛ́, aá mɔmɩ́ŋ, a cɩ́nɩ́ŋ mɛ́.
Nɩɛ ná ŋ wʋ́ɔ́ ɛ̃́, nɩhʋɔra nɛ́
cɩ́nɩ́ŋ mɛ́ déŋdéré.
16 Rɩ́wɔ́ néŋ rɩ́ŋ sɩ́ɛ́rɔ́, ɓa de mɔ́ŋ a táwɔ́ tɩɩ nɛ́,
ɓa ɔ́ɔ́ ŋ zɩŋ pʋmmɩ́ rɩ nɩbɛ́rɛ mɔmɔ nɛ́.
17 Nyuutɩna Wɩɩsɛ, ɩ nyɛ́ nɩ́ɩ́ sɩ́ siklí aá bélíŋ wuu>>
Láŋ mɩɩsɛ kɩ́ŋkáŋbɔma nyáŋ nénidafɩllɛ mɛ́.
18 Ŋ sɩ́ píŋsi ɩ púl sɩɛrʋ;
ŋ sɩ́ dɛ́nnɩ́ nɩkáŋdɔ́ nyaŋ sɩ́ɛ́ mɛ́.
19 Rɩ nɩɛ nyáŋ haá dɔmɩ́ŋ yɔ́ɔ́,
sikli a baá sɩ́ mɔ́mʋ́;
rɩ nɩɛ ná há cɩ́nɩ́ŋ ká wɩ táŋa kéné
baá sɩ́ fɩ́llʋ́.
20 Ɓa wɩ wɩ́wér kéné aá bʋl,
rʋʋ nɛ́ tó zaŋbawɩ́ɛ́ dʋŋɔ
ɓa kaa cɩ tɔ́ɔ́ tɛŋfɩ́ɛ́l nɩɛ mɛ́.
21 Ɓa wúriwó nʋjɛlɛ ná a cɩ́nɩ́ŋ,
a bʋlɛ́: «Há, há! á tɩɩ sɩ́ɩ́ nɛ́ cɛ́rʋ́.»
22 Amá Nyuutɩna Wɩɩsɛ, ɩ é tɩɩ sɩ́ɩ́ ná wɩ́ɩ́ ná há tʋ́mɛ́,
sɩ́ siklú, sɩ́ɩ́ tɩɩ kaá kɛ́kɩ́ŋ mɛ́.
23 Ŋ tɩ́na Wɩɩsɛ, isí daha a lá táŋa páŋ;
Nyuutɩna Wɩɩsɛ, sɩ́ dóŋ pɩ́nʋ́, isí láŋ tá.
24 Nyuutɩna Wɩɩsɛ, ɩ nɛ́ ká táŋa, sɩɛ́ lá táŋa a páŋ;
ŋ (tɩ́na) Wɩɩsɛ, rɩ́wɔ́ baá sɩ́ŋ mɔ́mʋ́ (kaá gbígbé) ɛ́!
25 Sɩ́ ló rɩ́ŋ dɩŋdɔma bʋlɛ́:
«Ʋ ká ɛ́ nɛ́, á kénú, ʋ bɩrmɩ́rá nʋɔ ɓɩdíílí.»
26 Rɩ hɩ̃́ɩ̃́sɛ arɩ́ yɩtʋ́ɔ́mɔ́
pú nɩɛ ná haá mɔ́mɩ́ŋ wɩɩla!
Rɩ hɩ̃́ɩ̃́sɛ arɩ́ yɩtʋ́ɔ́mɔ́
nɛ́ a nɩɛ ná há ɓɔ́wɔ́ tɩɩ a kɩ́llɩ́ŋ gɛbasa!
27 Amá rɩ satɔrɔ́, satɔrɔ́ ɓɩzeno,
peri nɩɛ ná fá há pi táŋa a páŋ!
Rɩ́wɔ́ bʋl ká baá bɩrbʋlɛ́:
«Nyuutɩna Wɩɩsɛ duókó,
ʋ satɔrɔ́ nɛ́ ká rʋʋ tʋtʋnnɔ́ sɩɛrʋ tɔrɛ.»
28 Ŋ é tɩɩ sɩ́ bɩ́ɩ́ mɛ́, ɩ táŋa ná yɩr mɛ́
kaá píŋsí tápʋ́l wuu.