Nyuutɩna Wɩɩssɛ láŋ a tá ŋ héwíwɩ́ɛ́ wuu mí
34
1 Davidi yɩl. Davidi fá púú tɩɩ a makɛ gɩ́ŋgatɩŋ rɛ́ Abimelɛkɛ sɩ́ɛ́, ʋ kírú. Ʋ kírú ʋ ko lɩ dánʋɔ mɛ́, ná wɩ́ɛ́ ná ʋ há bʋlɛ́.
2 Ŋ có rɩ́ŋ bárkɛ Nyuutɩna Wɩɩsɛ tɛ́ŋ wuu mí.
Ʋ bɔlɛ wɩ́ŋ nʋɔ mɩ́ɩ́ kaasɩ́ ná.
3 Ŋ caasɔ́ a có Nyuutɩna Wɩɩsɛ wɩ́ɛ́.
Ɩ́ nɩɛ ná há kéŋ múúrɩ́ŋ tɩɩ, ɩ́ zesíŋ ká má jʋɔsɛ.
4 Ɩ́ pɛ́ŋ mɛ́ a máŋsɛ Nyuutɩna Wɩɩsɛ zéŋ há mɔ́ ɛ́.
A hé náŋá mɛ́ a kánʋ́ yɩr ɓɔ́.
5 Ŋ há yɩrɛ a hé Nyuutɩna Wɩɩsɛ mɛ́, ʋ saŋɩ́ŋ sʋlɛ́,
ʋ láŋ a tá ŋ héwíwɩ́ɛ́ wuu mí.
6 Nɩɛ ná sɩ́ɛ́ há cɔ́ʋ́, mɩŋ satɔrɔ́ mɛ́;
hɩ̃́ɩ̃́sɛ baá tówó sɩ́ɛ́ wɩ́ɩ́.
7 Ná nɩyaara má há búŋse a hé Nyuutɩna Wɩɩsɛ mɛ́; ʋ saŋʋ́ sʋlɛ́
a lɔ́ʋ́ tá ʋ wɩ́nɩllɛ wuu sɩɛrʋ.
8 Nyuutɩna Wɩɩsɛ malɩka nɩ́ɩ́ bel nɩɛ ná há cɩ́nɛ́ tɩ́kʋ́ mɛ́
a kɛ́rɩ́wɔ́ mɛ́ rɩ bɔ́ŋbɔ́ŋ sɩ́wɔ́ pérú.
9 Ɩ́ kɩ́ɛ́lɛ a ná Nyuutɩna Wɩɩsɛ wér há mɔ́ ɛ́.
Nɛ́ŋ ná há púú tɩɩ yellú mí ná wér!
10 Ɩ́ nɩɛ ná há ká Nyuutɩna Wɩɩsɛ tɩ́llɛ́, ɩ́ fáʋ́ héwíŋ;
nɩɛ ná há muúríwó tɩɩ aá pɔ́ʋ́, ɓa wɩ óŋ já gúl.
11 Kɩ́ŋkánáwa waá wúó fori wɩɩla arɩ́ losu nɛ́sɛ mɛ́,
amá nɩɛ ná haá yɩrɛ Nyuutɩna Wɩɩsɛ yɩr, ɓa nɛ́ tɛ́ wér.
12 Ŋ bɛlɛ, ɩ́ kó ŋ rɩ́, a zesíŋ há sʋ́ʋ́ ná;
ŋ có rɩ́ŋ makɩ́wa ɛ́ ná ɩ́ há mɔhɛ̃́ rɩɩ́wa zil Nyuutɩna Wɩɩsɛ:
13 Nɛ́ŋ ná há có waana, a colli rʋʋ dí tɔ́ɔ́ a vɔkɛ,
14 ʋ mɔhɔ̃́ rʋʋ kánʋ́ nʋɔ rɩ́ wɩ́bʋltɩɛnnɛ, a sɩ́ nyɩɛnnɛ nyɛ́,
15 a kánʋ́ tɩɩ kɛ́kɛ bɔ́ŋbɔ́ŋ mɛ́, aá tʋ́ŋ wérí
kaá já tɛ́ŋ wuu mí rɩ tɛŋfɩ́ɛ́l mɩŋ nɩɛ pɛ́kɛ.
16 Nyutɩna Wɩɩsɛ sɩ́ɛ́ cɔ́ nɩɛ há cɩ́nɛ́ tɩ́kʋ́ mɛ́,
ʋ dɩlla ɓíló a caasɩ́wɔ́ rʋʋ zesíwó búŋsé.
17 Nyuutɩna Wɩɩsɛ cɩ nɩɛ ná haá a bɔ́ŋbɔ́ŋ mɛ́,
rʋʋ a rɩ́wɔ́ yɩra yʋ́ksɛ tíé nyúú.
18 Laadiire mɩŋ yɩrɛ mɛ́ nɛ́ ká Nyuutɩna Wɩɩsɛ há saŋwɔ́ sʋlɛ́
a zɛ́wɔ́ ɓa wɩ́halawa wuu sɩɛnnɛ.
19 Nɩɛ sɩɛnnɛ há zɔkɛ́, ʋ mɩŋwɔ́ laka,
ʋ la nɩɛ sɩɛnnɛ há víŋse aá tá.
20 Wɩ́halawa káŋ aá peri laadiiró,
amá Nyuutɩna Wɩɩsɛ nɛ́ lɔ́ʋ́ aá tá ɓa wuu sɩɛrʋ,
21 ʋ nɩ́ɩ́ bel nɩɛ ná wuu há kɔ́ʋ́ tɛŋnaŋdaasɛ mɛ́,
a makɛ rɩ́wɔ́ sʋ́ʋ́ heŋgbel balá má boru.
22 Nɩbɔmɔ wɩ́bɔma nɩ́ɩ́ hóú tɩɩ nyúú,
ká rɩ nɩɛ ná má há cɩ laadiire mɛ́ dí wɩ́hala.
23 Nyuutɩna Wɩɩsɛ nɛ́ lɔ́ʋ́ tʋtʋnna mɩɩsɛ aá tá;
nɩɛ ná há píwó tɩɩ yéllú mí dɩlla waá mɩlmɩ́ ná.