Nyuutɩna Wɩɩsɛ, ɩ nɛ́ tɛ ŋ ká mɩɩsɛ
30
1 Yɩl. Kuóro jaa píí pá Wɩɩsɛ yɩl, Davidi há yɩ́ɛ́.
2 Nyuutɩna Wɩɩsɛ, ŋ có rɩ́ŋ píŋsi,
beé wɩ́ɛ́, ɩ nɛ́ lɩ́sɛ sʋʋ bʋɔ mɛ́,
ɩ wɩ lóé rɩ́ŋ dɩŋdɔma kánɩ́ŋ mʋ́ʋ́rɩ́wɔ́ mʋʋla.
3 Nyuutɩna Wɩɩsɛ, ŋ Wɩɩsɛ, ŋ há yɩrɛ́ a hé mí, ɩ fáŋ búŋse, a láŋ tá.
4 Ɩ nɛ́ lɩ́sɩ́ŋ sʋsɛ sɩɛrʋ,
ŋ naa faá zieli bʋɔ mɛ́ rɛ́, amá Nyuutɩna Wɩɩsɛ, ɩ nɛ́ láŋ mɩɩsɛ a tá.
5 Nyuutɩna Wɩɩsɛ laadííre wuu, ɩ́ yɩ́ yɩɩla a dɛ́nnʋ́.
Ɩ́ líísíwa tɩɩ rʋʋ nɛ́ ká Wɩɩsɛ, a píŋsú.
6 Ʋ cɔ́wɩɩlɔ́ dáánɛ́ ká mʋɔ́ yɔ́ɔ́ dʋŋɔ rɛ́,
amá ʋ sawér mɩnɔ́ hiẽso tɛ́ŋ wuu mí ní.
Gbaanɛ há ká wiile ní,
amá tɔ́ɔ́pʋlɛ́ tɛ́ŋ mɛ́, satɔrɔ́ nɛ́.
7 Ŋ fá há kéŋ tɛŋfɩ́ɛ́l mɛ́ (nɛ́rɛ́ tɛ́ŋ mɛ́) ŋ sɛ́:
«Wɩ́ɩ́ tó aá walmɩ́ŋ.»
8 Nyuutɩna Wɩɩsɛ, ɩ kéníŋ a mʋ́ bil dɩdúó,
ɩ sawér ná sɩɛrʋ.
Amá ɩ bɩrɩ́ har tɛ́ŋ ká hɩ́ɩ́sɛ díŋ.
9 Nyuutɩna Wɩɩsɛ, ŋ ŋmɔsɛ búŋse aá pɛ́ɩ́ nɛ́;
ɩ nɛ́ há ká ŋ Nyuutɩna, ŋ sʋlɩ́ nɛ́.
10 Ŋ sʋʋ nyʋɔrɛ nɛ́ orí,
ŋ lɛlbule sɩɛrʋ zʋ́ɩ́ nyʋɔrɛ nɛ́ ká orí a pɛ́ɩ́>>
Nɛŋ ná há bɩrmɛ kúŋkulo,
ʋ wóí táŋa ná wɩ́ɛ́ aá caarɛ rɛ́>>
11 Nyuutɩna Wɩɩsɛ, wúólí dɩlla zesi, fáŋ búŋse;
Nyuutɩna Wɩɩsɛ, ko pɛ́ŋ mɛ́.
12 Ɩ ɔ́ɔ́ ŋ hííne bɩrmɛ jʋɔsɛ́,
ɩ wúrkíŋ yuwííri gɛnnɛ,
ɩ pá cana gɛnnɛ súŋ.
13 Ɛ́ wɩ́ɛ́, ɩ bɔlɛ wɩ́ŋ nʋɔ mɩ́ɩ́ kaasɩ́ ná,
ŋ sɩ́ yɩ́ yɩɩla dɛnnɩ́ rɩ́rɩ́ŋ sɩɛrʋ wuu.
Nyuutɩna Wɩɩsɛ, ŋ Wɩɩsɛ, ŋ sɩ́ bɩ́ɩ́ mɛ́ tɛ́ŋ wuu mí.