Kuóro wo Nyuutɩna Wɩɩsɛ aá yɩɛlɛ
21
1 Davidi yɩl ná há mɩŋ yɩɩla nyúútɩ́na yɩɩla kɛnɔ sɩɛrʋ.
2 Nyuutɩna Wɩɩsɛ, ɩ dóé ná wɩ́ɛ́ nɛ kuóro wɩwarɛ.
Ʋ satɔrɔ́ há zeno a mɔ́, ɩ há ko a lɔ́ʋ́ a tá!
3 Ɩ fá háá jɔ́ʋ́ ná nɛ́ ɩ a ʋ ná,
ɩ fá háá jɔ́ʋ́ ná ɩ rɩ́, ɩ wʋ́ʋ́ vɔmɛ́.
4 Ɩ nɛ́ lóé barkawa waalʋ́;
ɩ nɛ́ cú salmɛ kuónéŋcú a pɔ́ʋ́.
5 Ʋ fá sʋ́l mɩɩsɛ ɩ rɩ́, ɩ pɔ́ʋ́,
ká tʋkʋ́, ʋ caasɛ daanɛ kɩ́ŋkáŋ wéri.
6 Ɩ dóé ná yɩr mɛ́, ʋ kuorí píŋ;
ɩ nɛ́ ɛ́ɛ́ ʋ a kuózeni, ʋ yɩr lɛ́ kɩ́ŋkáŋ.
7 Ɩ ɔ́ɔ́ ʋ a bárka nyibulsɩ́ɩ́ a kaá mʋ́ wuu,
Ɩ mɩʋ́ har, ʋ ká satɔrɔ́ tɛ́ŋ wuu mí.
8 Oó, kuóro yɩɛla wuu mɩŋ Nyuutɩna Wɩɩsɛ mɛ́ nɛ́,
Wɩɩsɛ ná há mɩŋ bána nyúú collizeno ná yɩr mɛ́,
kuóro waá pʋɔlɩ́ ná.
9 Kuóro, ɩ sɩ́ wollí dɩŋdɔma wuu,
ɓa ná wuu há cɩ́nɩ́ mɛ́ sɩ́ zʋ́ɩ́ nɛ́sɛ.
10 Ɩ mɩnɩ́ tɩɩ nyɩ́ɩ́sɛ́ mɛ́ nɛ́ ká níŋ zeno há kéŋwó.
Oó, rɩ Nyuutɩna Wɩɩsɛ zɔkwɔ́ naasɩ́ balá ʋ cɔwɩɩlɔ́ sɩɛrʋ,
rɩ níŋ díwó mʋɔlɛ!
11 Ɩ sɩ́ píésíwó dunɩɛ tíé nyúú,
rɩ́wɔ́ duo yɩr yʋ́ksɛ nɩbííne sɩɛrʋ.
12 Rɩ ɓa nɛ́ kéŋ bɔ́ŋbɔ́ŋ aá jɛ́ɩ́,
rɩ ɓa nɛ́ cɩ́nɩ́ mɛ́, ɓa waá wollí ɛ́ɛ́ bɔ́ŋbɔ́ŋ wuu.
13 Ɩ hɛ́mɛ́ sɩ́ zʋ́wɔ́,
rɩ́wɔ́ fá pɩsɛ náŋá mɛ́.
14 Nyuutɩna Wɩɩsɛ, isi makɩ́ dózeno.
A é já ráá yɩ yɩɩla, a dɛ́nnɩ́ ɩ tʋtʋ́zeŋse ná yɩr mɛ́ nɛ́.