Nɛrɔ ná Wɩɩsɛ há lɛ́ a ta sʋʋ nɛ́sɛ mɛ́ satɔrɔ́
16
1 Davidi yil. \Ŋ áná Wɩɩsɛ, belíŋ mí, ɩ nɛ́ ká ŋ dɩyuoli.
2 Ŋ bʋl Nyuutɩna Wɩɩsɛ rɩ́ a bʋlɛ́:
«Ɩ nɛ́ ká ŋ Nyuutɩna tɩɩ;
ŋ baá wer dɩhɩ̃́ nɔŋ wuó ná, rʋ́ʋ́ kɩ́llɩ́.»
3 Laadííre ná há mɩŋ tɔ́ɔ́ né sɩɛrʋ,
ɓa nɛ́ ká nɩtaŋáwa ná wɩ́ɛ́ háá tɔ́rɩ́ sɩɛrʋ.
4 Nɩɛ ná háá já wɩɩsɛ nɔŋ,
ɓa ja wɩɩla nɛ́ a súúri aá páwɔ́ tɩɩ.
Ŋ baá wɩ cɛ́l laa ɔsɛ vʋka rɩ́ pɔ́wɔ́.
Ɓa yɩra má tɩɩ baá wɩ́ŋ nʋɔ mɩ́ɩ́ lɩ́ɩ́ ná.
5 Nyuutɩna Wɩɩsɛ, ɩ nɛ́ tɛ ŋ hiẽso wér, ɩ nɛ́ ká ŋ kér,
ŋ hiẽso wuu mɩnɩ́ nɛ́sɛ mɛ́ nɛ́.
6 Ɛ́ ker kéŋ satɔrɔ́,
ʋ ká nyúwer ná háá pɔrɛ tɛ́ŋ nɛ́.
7 Ŋ barkɛ Nyuutɩna Wɩɩsɛ, ʋ nɩ́ɩ́ cáánɩ́ŋ:
tɩtáŋ má tɩɩ, ŋ sabɩɩna haa cáánɩ́ŋ.
8 Ŋ bel Nyuutɩna Wɩɩsɛ nɛ́ tɛ́ŋ wuu mí,
a de yʋɔrɛ é tó, beé wɩ́ɛ́, ʋ mɩnɩ́ŋ laka tɛ́ŋ wuu mí.
9 Ɛ́ nɛ́ tɛ́, ŋ sɩɛrʋ wuu tɔrɛ, ŋ dʋma jɩjʋɔsɛ.
Ŋ tɛŋ fɩ́ɛ́lɔ.
10 Ɩ waá lo rɩ sʋʋ kánɩ́ŋ abádá, Nyuutɩna Wɩɩsɛ,
ɩ waá saŋ lo rɩ nɛrɔ ná há cɩ́nɛ́ a tɩkɩ́ sʋɔrɛ lɛlbule sɩɛrʋ.
11 Ɩ nɛ́ makɛ hiẽso ŋmɛ́nɔ́ aá páŋ.
Ɩ dɩmɩnɩ́ kéŋ satɔrɔ́ kɩ́ŋkáŋ,
ɩ laka tɛŋpɔrɔ́ waá tenni.