Ŋ yɩrɔ́ aá hé mí ní mʋ́l né mí
17
1 Davidi wɩsʋlɔ́.
Nyuutɩna Wɩɩsɛ, zesi sʋlɛ́ ná há ká taŋá,
ɓɩllɩ́ dɩllɛ a zesíŋ wɩ́kanɩ́,
lo rɩ́ŋ sʋlɛ́ zʋ́ɩ́ dɩllɛ: nɩtaŋá sʋlɛ́ nɛ́.
2 Ɩ nɛ́ sɩ́ dí ŋ sarɩya,
já taŋá dɩmɩnɩ́.
3 Tɩtáŋ nɛ́ ɩ ko mɩlɩ́ŋ rɩ́ɩ́ ná ŋ taŋá;
ɩ kɩ́ɛ́lɩ́ŋ amá ɩ wɩ wɩ́bɔ́ŋ né ŋ mɛ́.
Ŋ wɩ lóé rɩ́ wɩ́ɩ́ lɩ́ŋ nʋɔ mɛ́,
4 a mʋ́ tɩ́ɩ́nɛ nɩɛ ná náŋá wɩ́'állɛ mɛ́,
amá ŋ hé dóé ká tɩŋɩ́ fa há sʋ́ʋ́ ná a páŋ.
Ŋmɛ́ŋduó ná sɩɛrʋ,
5 ŋ valɔ́ arɩ́ taŋá,
ŋmɛ́nɔ́ ná ɩ há makɛ́ a páŋ, ŋ wʋ́ʋ́ mɛ́ cʋ́rɛ́.
6 Mʋ́l né sɩɛ́,, ŋ yɩ́rɔ́ aá hé mí ní, beé wɩ́ɛ́, ɩ ká Wɩɩsɛ ná háá saŋ yɩrɛ́ nɛ́.
Sɩɛ́ ɓilí dɩllɛ cáásɩ́ŋ, a zesiŋ há sʋ́ʋ́ ná.
7 Makɩ́ collizeno ná a páŋ,
ɩ nɛ́ la nɩɛ ná há yuolí mí
aá tá ɓa dɩŋdɔma nɛ́sɛ mɛ́.
8 Pɔ́ŋ mɛ́ anɩ́ sɩ́ɩ́ sɩ́pʋna,
cú a tɔ́ŋ mɛ́, lo rɩ́ɩ́ kíŋkérú kɛ́rɩ́ŋ mɛ́,
9 rɩ́ nɩbɔma ná háá bɛ́ŋsɩ́ŋ sɩ́ ŋ ná,
rɩ́ nɩɓʋ́ʋ́ra ná há kilíŋ sɩ́ ŋ ná.
10 Ɓa ɓáŋ baŋcɩllɛ, wɩ́ɩ́ oro wuu wʋ́ɔ́ zʋ́,
ɓa nʋʋsɛ wɩ́bʋlɛ́ wuu ká nyʋkɛ wɩ́ɛ́.
11 Ɓaá tɩŋɩ́ŋ naasɛ nɛ́, nówó ní sɩɛ́ kilíŋ nyɛ.
Ɓaá dɛ́llʋ rɩ́wɔ́ cɩ́ɩ́nɩ́ŋ yo tíé ní,
12 anɛ kɩ́ŋkánáwa há féŋsi gɩrkʋɔsɔ́ sɩɛrʋ,
anɛ kaadihuoruwa haá ja rɩ́wɔ́ cɔnnɛ namɩ́ɛ́.
13 Nyuutɩna Wɩɩsɛ, isí daha,
cɩ́nɩ́ŋ dɩŋdɔma mɛ́, a rɩ́wɔ́ pɩ tíé;
láŋ tá nɩbɔma nɛ́sɛ mɛ́.
14 Pi tokowí, rɩ́ɩ́ tɩɩ nɛ́sɛ zɔkwɔ́, rɩ́wɔ́ nyɩ́ɩ́kɛ tíé nyúú.
Dunie né sɩɛrʋ, lo rɩ́wɔ́ kér ní a mɩtenno.
Lo rɩ́wɔ́ nyɔ bʋra nyii ná ɩ há bilwó mí.
Lo rɩ́wɔ́ bɛlɛ nyɔ́ bʋrɛ,
ká rɩ́wɔ́ bɛlɛ má bɛlɛ há tɩllɛ káánɛ!
15 Amá ló ŋ é, ŋ há kɛ́ɩ́ nɩtaŋá, rɩ́ŋ wolli cémí
rɩ́ŋ kuó isi, rɩ́ŋ jʋ́ɔ́sɩ́ (fɩ́ɛ́l) píŋ ná sɩɛrʋ.