Wɩɩsɛ píŋ arɩ́ nɩbííno píŋ wɩ́ɛ́
8
1 Yɩl ná Davidi há yɩ́ɛ́, ʋ mɩŋ yɩɩla nyúútɩ́na yɩɩla kɛnɔ sɩɛrʋ. Gatɛ cemo ní ɓa dú hóú mí.
2 Nyuutɩna Wɩɩsɛ, á Nyuutɩna,
ɩ yɩr zeno a la tíé wuu!
Ɩ píŋ kɛ́ bána nyúú píŋ.
3 Heŋbiisi arɩ́ bipʋllɛ nʋʋsɛ dɛ́nnɩ́,
a cɩ́nɩ́ dɩŋdɔma mɛ́.
Ɩ dóé nɩhɩ̃́ zekɛrɛ ɩ há sɔ́ɛ́ nɛ́,
a tɩŋ ɛ́ mɛ́, rɩ́ɩ́ dɩŋdɔŋbɩnɛwa nʋʋsɛ maanɛ.
4 Rɩ́ŋ bel bána ná ɩ há ɛ́ɛ́,
cana arɩ́ caŋwʋllɛ ná ɩ há ɛ́ɛ́ ɓa mɩnʋ́ nyúú,
5 ŋ bɔsɩ́ŋ tɩɩ a bʋlɛ́:
Beé rí ká nɩbííno, a mɔ́ rɩ́ɩ́ bɩ́bɩ́ɩ́nʋ́ wɩ́ɛ́>>
Beé rí ká nɩbííno bio, a mɔ́ rɩ́ɩ́ bibélú mí>>
6 Ká púú makɛ anɛ mʋɔ́ tó malɩka,
ɩɩ́ píŋsú aá pɔ́ʋ́ yɩr.
7 Ɩ ɔ́ɔ́, ʋ ká tíŋ ɩ oŋ'aalɛ́ wuu nyúú:
ɩ ɔ́ɔ́, ʋ nɛ́ bíbel onni wuu mí,
8 pieŋse, bʋnnɛ arɩ́ nɛsɛ,
arɩ́ balla má tɩɩ,
9 díwíísi, naŋwʋlɛ,
arɩ́ onni ná wuu há tɩŋ mʋnaasɛ mɛ́ aá va.
10 Oo, Nyuutɩna Wɩɩsɛ, á Nyuutɩna,
ɩ yɩr zeno a la tíé wuu!