Nyuutɩna, lá táŋa a pá
7
1 Yɩl ná Davidi há yɩ́ɛ́, hĩ́ĩ́ne sɩɛrʋ. Kusi há lɩ Bɛŋzamɛ jɩmʋ́l sɩɛrʋ wɩ́ɛ́ nɛ́, ʋ yɩ ɛ́ yɩl a pá Nyuutɩna Wɩɩsɛ.
2 Nyuutɩna, Ŋ Wɩɩsɛ, ɩ nɛ́ ká ŋ dɩyuoli.
Fá ŋ búŋsé, a lá ŋ tá nɩɛ ná háá walmɩ́ŋ nɛ́sɛ mɛ́.
3 Rɩ ɛ́ rá, ɓa sɩ́ nɛ́ kɩ́ŋkánáwa a kánɩ́ŋ cɔ́nnɛ,
ɓa sɩ́ conni naŋdaawa, ká rɩ nɛ́ŋ sɩ́ rɩ́ɩ́ lá ŋ tá.
4 Nyuutɩna Wɩɩsɛ, ŋ Wɩɩsɛ rɩ́ŋ wɩ́ɛ́ nyaŋ péríŋ:
rɩ́ŋ nɛ́sɛ nɛ́ a wɩ́bɔ́ŋ,
5 rɩ́ŋ nɛ́ pi bɔ́ŋbɔ́ŋ rɩ́ túŋ wéri wéri,
rɩ́ŋ nɛ́ fori nɛ́ŋ há cɩ́nɩ́ŋ mɛ́ ká ŋ wʋ́ʋ́ wɩ́ɩ́ zɔ́kɛ́ oŋ,
6 rɩ́ŋ dɩŋdɔmɔ nɛ́ kíre púŋ a kánɩ́ŋ,
rɩ́ŋ wommi ká rʋ́ʋ́ nʋnʋ́ɔ́sɩ́ŋ,
rɩ́ŋ yɩr zʋ́ busunnú!
Hʋʋmɔ
7 Nyuutɩna Wɩɩsɛ, isi daha, a dí cɔ́ɛ́;
cɩ́nɩ́ŋ dɩŋdɔma ná cɔ́ɛ́ há wɩ́ŋ mɛ́.
Ɩ nɛ́ lá táŋa aá pá nɩɛ, cɩ́nɩ́ŋ har.
8 Lo rɩ nɩɛ kilí,
amá dí dóé ɓa nyúú, ɩ nɛ́ ké kuóɓasa daha.
9 Nyuutɩna Wɩɩsɛ, ŋ kéŋ táŋa, ŋ wɩ́ɩ́ zɔkɛ́, \ dí nɩɛ sarɩya, a la táŋa a pá ŋ.
10 A rɩ nɩbɔma wɩ́bɔma ti,
pá nɩtáŋawa dóé, ɩ nɛ́ kɩ́ɛ́lɛ sabɩŋsɛ arɩ́ wɩ́'állɛ,
ɩ nɛ́ ká táŋa Wɩɩsɛ.
11 Wɩɩsɛ nɛ́ ká ŋ hɔkɛ́rɛ, aá kɛ́rɩ́ŋ mɛ́,
sapʋmmɔ tɩ́náwa laataarɔ́ nɛ́.
12 Wɩɩsɛ nɛ́ ká taŋá sarɩyadííro,
ʋ nɛ́ ká Wɩɩsɛ ná háá dí cɔ́ɛ́ tápʋ́l wuu.
13 Ká ɓɩlɓɩl, dɩŋdɔma wʋ́ʋ́ tɩɩ tɛ́,
ʋ sɛ́sʋ́ tokowí, ʋ gɛ́rʋ́ tuhɛ́ŋ kaá mallɛ.
14 Ʋ pɔ́ʋ́ tɩɩ mɛ́ arɩ́ nɩɓʋ́ laala nɛ́,
hɛ́ma ná huõno há nɩhɩ̃́ níŋ ní ʋ káá cakʋ́ tɩɩ.
15 Ʋ kéŋ wɩ́bɔma puo, ʋ cɩ́ɩ́nɛ wɩɩla
ʋ lʋl nyɩ́ɛ́rʋ.
16 Butuo luŋo ní ʋʋ́ lú,
amá ʋ tɩɩ nɛ́ sɩ́ zʋ́ ɛ́ bará sɩɛrʋ.
17 Bayɛlɛ́ mɩŋtʋɔrɛ ná bɩrɛ túwú tɩɩ nyúú,
bɔ́ŋbɔ́ŋ ná ʋ bɩɩnɛ́ bɩrɛ nyɔ́ʋ́ tɩɩ nyúdaa mɛ́.
18 Ŋ có rɩ́ŋ dɛ́nnɛ́ Nyuutɩna Wɩɩsɛ ʋ taŋá ná yɩr mɛ́,
ŋ sɩ́ yɩ yɩɩla píŋsi Nyuutɩnna Wɩɩsɛ ná há kɛ́ oŋ wuu.