Elihu wɩ́bʋlɛ́: Ʋ ká taŋá rɩ Wɩɩsɛ bʋl wɩ́ɛ́ nɩbííne rí
33
1 Zɔɔbɛ, ɩ má zesíŋ há sɩ́ bʋ́lʋ́ ná a pɛ́ɩ́,ɓilí dɩllɛ wéri ká zesíŋ wɩ́bʋlɛ́ ná wuu.
2 Ŋ kéŋ liŋó, ŋ sɩɛ́ có rɩ́ŋ máŋsʋ́.
3 Ŋ có rɩ́ŋ caasɛ bʋ́l sɩ́fɩɛŋsɛ,
arɩ́ taŋá nyammɩ́ a pɛ́ɩ́
4 Wɩɩsɛ Sabɩɩna nɛ́ máŋ,
Wɩɩsɛ ná há kɛ́ oŋ Sabɩɩna nɛ́ tɛ́ ŋ ká mɩɩsɛ.
5 Rɩɩ wolo, ɩ lɩ́sɛ nʋɔ ŋ wɩ́bʋlɛ́ nyaŋ sɩɛrʋ,
kánɩ́ tɩɩ rɩ́ŋ rɩ́rɩ́ɩ́ bʋl wɩ́ɛ́. Pɔ́ weri!
6 Wɩɩsɛ sɩ́ɛ́ mɛ́, ŋ rɩ́rɩ́ɩ́ mɔ́ naŋá rɛ́,
ŋ má ká cʋʋ nɛ́.
7 Ŋ ká nɩfaalɛ́ rɛ́>> Ɩ wɩ mɔhɛ̃́ rɩ́ɩ́ vaklɛ,
ŋ waá a rɩ́ŋ fɩkɩ́ wɩ́ɩ́ mɛ́.
8 Ɩ liŋó dɔmɛ há mɩnɩ́ŋ dɩlla mɛ́,
tɛ́ŋ ná mɛ́, wɩ́ɩ́ né fa há mɩnɩ́ nʋɔ mɛ́, ɩ yɩ́yɩ:
9 «Ŋ é wɩ wɩ́ɩ́ zɔkɛ́, ŋ wɩ Wɩɩsɛ mɛ́ cɩ́nɛ́;
ŋ wɩ busunnú zʋ́ɛ́.
10 Amá Wɩɩsɛ nóú rɩ́ŋ nʋɔ mɛ́ nɛ́ há mɔhɔ̃́ gáásɛ
ʋ píŋ a makʋ́ dɩŋdɔŋ.
11 Ʋ hé bara ŋ naa mɛ́,
ʋ sɩ́ɩ́ cɔ́ŋ wɩ́'állɛ wuu mí.»
12 Ɩ wɩ taŋá kéné wɩ́ɩ́ né sɩɛrʋ, ŋ có rɩ́ŋ bʋl ɛ́ a pɛ́ Zɔɔbɛ;
Wɩɩsɛ zeno kɩ́ŋkáŋ a kɩ́llɛ nɩbííno.
13 Beé rí sɩɛ́ tɛ́, ɩɩ́ gaasɛ wɩ́ɛ́ ʋ rɩ́,
ʋ há wɩ́ɩ́ wɩ́bɔsɛ́ ná sɩ́ɛ́ lɩ́sɛ aá pɛ́ɩ́ wɩ́ɛ́>>
14 Wɩɩsɛ wɩ́ɛ́ bʋ́lɛ́ ŋmɛ́ŋsɛ ká bammawa rɛ́,
tɛ́ŋ nɔ́ŋ ʋ tɩŋ ŋné mí, tɛ́ŋ nɔ́ŋɔ mɛ́ ʋ tɩŋ nɔ́ŋɔ ká nɩɛ waá kɩ́ɛ́lɛ.
15 Ʋ tɩŋ duose mí aá bʋl wɩ́ɛ́, a a nɩɛ nɩna wɩ́ɛ́ tɩ́táŋ,
tɛ́ŋ ná mɛ́ doluŋó há kéŋwó,
ɓa pɛ́, a tɛ́wɔ́ tɩɩ ɓa baŋsa mɛ́.
16 Ʋ nɛ́ bʋl wɩ́ɛ́ aá héwó dɩlla mɩŋ,
a makɛ rɩ́wɔ́ pɔ́wɔ́ tɩɩ mɛ́, a kaá mʋ́ wuu:
17 ʋʋ́ já rɩ́wɔ́ bɩrwɔ́ har a tɛ́wɔ́ wɩ́'állɛ nɛ́,
ʋʋ́ já rʋ́ʋ́ kɛ́rɛ, rɩ́ nyʋkdaarɔ sɩ́wɔ́ kɛ́sʋ́ nɛ́.
18 Ʋʋ́ já rʋ́ʋ́ tɩŋ nyɛ́ mɛ́ nɛ́, a láwɔ́ mɩɩsɛ a tá bʋɔ mɛ́,
rɩ́wɔ́ lú lɛ́ sʋʋ ŋmɛ́nɔ́ mɛ́.
19 Amá Wɩɩsɛ tɩŋ wɩɩla má mɛ́, aá cáánɛ (tʋrɛ) nɩbííno,
ʋʋ́ pɛ́ basa mɛ́:
tɛŋlʋmɔ́ a ʋ tɛŋnaŋdaasɛ wuu vɩvaklɛ, a waá tuwi;
20 ʋ sɩɛrʋ lɛ́ ɓɩdííli wuu duó,
ɓɩdicolli má tɩɩ baá wɩ wɔ́ŋ ʋ nʋɔ mɛ́.
21 Ʋ tɛŋnamɩ́ɛ́ tenne
ká kaanɛ heŋgbele dʋŋɔ.
22 Ʋ naa nɩ́ɩ́ zieli bʋɔ mɛ́,
ká ʋ mɩɩsɛ mɩŋ lɛlɛ nɛ́sɛ mɛ́.
23 Amá rɩ malɩka balá má ko ɛ́ báálɔ laka,
rɩ Wɩɩsɛ malɩkawa (nɩtʋmɛ́) nyaŋ bʋ́ɩ́ sɩɛrʋ balá má tɩɩ
nɛ́ ko rɩ́, ʋ wo taŋá ŋmɛ́nɔ́ makɛ aá pɔ́ʋ́.
24 Ʋ susú kéŋ malɩka ná, ɛ́ nɛ́ ʋ sʋ́l Wɩɩsɛ a bʋ́lɛ́:
«Sɩ́ ló rʋ́ʋ́ zʋ́ bʋɔ,
ŋ ná ŋmɛ́nɔ́ ná ŋ há sɩ́ tɩŋ ká lɔ́ʋ́ a tá.»
25 Báálɔ ná bɩrɔ́ a ná dófɛlɛ,
nóú ní bɩrɛ híŋsi anɛ nɩpʋɔsɩ́ (heŋbiwafɛlɔ́).
26 Rʋʋ nɛ́ sʋ́l Wɩɩsɛ, ʋʋ́ zesú weri;
ʋʋ́ mʋ́ sɩ́ɛ́ arɩ́ satɔrɔ́ nɛ́,
beé wɩ́ɛ́, Wɩɩsɛ ɔ́ɔ́ ʋ bɩrɛ nʋ́ʋ́ nɩ́ɩ́sɔ́.
27 Ʋ sɩɛ́ wúrú nʋɔ, a yɩɩla a pá nɩɛ wuu a bʋ́lɛ́:
«Ŋ fa ká nyɛtɩŋ rɛ́, ŋ fa ŋmɛ́nɔ́ píé,
amá Wɩɩsɛ láŋ a tá wɩɩla ná ŋ fa mɔhɛ̃́ dí nɛ́sɛ mɛ́.
28 Ʋ ɔ́ɔ́ ŋ lú a lɛ́ sʋʋ ŋmɛ́nɔ́ mɛ́,
a ka mɩɩsɛ, a há mɩŋ tɔ́ɔ́ mɛ́.»
29 Ʋ sɩɛ́ ká ɛ́ nɛ́, wɩ́ɛ́ nyaŋ wuu ní, Wɩɩsɛ aa pá nɩbííne,
a mʋ́ aá peri naasí bʋllɛ bʋllɛ, botorowa má tɩɩ.
30 Ʋ tʋ́ŋ aá já kɛ́rɩ́wɔ́ bʋɔ mɛ́ nɛ́,
a makɛ rɩ́wɔ́ ká mɩɩsɛ a dí tɔ́ɔ́ wér.
31 Zɔɔbɛ, ɩ mɔhɔ̃́ rɩ́ɩ́ ɓilí dɩllɛ a zesíŋ weri;
ɛ́ wɩ́ɛ́, sikli káŋ rɩ́ŋ (bʋl wɩ́ɛ́) pɛ́ɩ́.
32 Rɩɩ kéŋ nʋlɩsɔ́, ɩ bʋl,
beé wɩ́ɛ́, ŋ có rɩ́ŋ pi taŋá a pɛ́ɩ́ nɛ́.
33 Rɩɩ nɛ́ wɩ́bʋlɩ́ kéné, ɩ é há zesíŋ,
sikli ká rɩ́ŋ pi zɩmɛ́ a karmɩ́.