ƐSƖTƐƐRƐ
Kuóro Asuerusi dí caŋzeno
1
1 Wɩ́ɩ́ né fa ká Asuerusi kuorí díí tɛ́ŋ mɛ́ nɛ́. Ɛ́ Asuerusi faá bel pʋ́rʋ́vɛ́ŋsɛwa zɔlɔ rɩ́ mɛrɛ́ rɩ́ balpɛ mɛ́ nɛ́, a de pɔ́ Ɛŋdɛ dɩtɩ́llɛ mɛ́ ká kaa mʋ́ yakɛ Etiopi dɩtɩ́llɛ. 2 Ɛ́ tɛ́ŋ mɛ́ kuóro Asuerusi fa ké kuóɓasa daha Suzi mí ní, ráŋ nɛ́ fa ká kuótɔ́ɔ́. 3 Ʋ kuorí bɩŋsɛ botoro nyúú mí, ʋ dí cana ɓɩzeno a pɔ́ʋ́ kuóbɛlɛ, ʋ tʋtʋnna, Pɛrsɛ rɩ́ Mɛdɛ sóójiwa arɩ́ pʋ́rʋ́vɛ́ŋsɛwa sɩ́dííre rɩ́wɔ́ nɩpiŋe. 4 Ʋ mákʋ́ kuóɓɩɛ há wéró ɛ́ a pɔ́wɔ́, a mákʋ́ kuorí díí píŋ há zénó ɛ́ a pɔ́wɔ́. 5 Cana ná díí tápʋlɛ há césé, kuóro baa dí tápʋlɛ balpɛ cana ʋ zʋ́ɔ́ sɩ́ɛ́, tuuni mʋ́l a pá tɔ́zeno Suzi nɩɛ wuu, ɓɩɛ tɩ́náwa rɩ́ nɩyaara wuu. 6 Gepúwɩɛlɩ́wie pɛ́ŋbíé ɓa há pí gepúpʋmmɔ rɩ́ gepúmʋɔlɩ́ léŋsi a sɔ, ɓa nɛ́ ɓa pi gepúŋ ŋmɛ́pʋŋsɛ rɩ́ ŋmɛ́kɔklɛ́ a tʋ wárɛ oŋgílégíléwa mɛ́, a vɔsɛ márbɩrɛ nafarsɛ mɛ́. Ɓa mʋ́ɔ́lɛ́ tíé rɩ́ pórfííri rɩ́ márbɩrɛ rɩ́ nákɩrɛ arɩ́ márbɩrɛ bíno ní, a bil salmɛ dacakgóru rɩ́ wárɛ dacakgóru. 7 Sɩgbaŋsɛ yíri rɩ́wɔ́ duó wuu ní mɩnɛ́, ɓa hé sɩnnɛ pá nɩɛ ɓa kaá nyɔ. Kuóro dɩvɛ́ŋ búri dɩhɩ̃́ wuu, ɓa pɩ́pá nɩɛ kuópɛ́ɛ́ arɩ́ zilé. 8 Nɛrɔ wuu nyɔ́ɛ́ há có ɛ́, fɩkɛ́ toó; kuóro sʋ́ʋ́ tʋtʋnna pá nɛrɔ wuu sɩjaalɛ́. 9 Ká hákuóro Vasiti má mɩŋ kuóro Asuerusi wuolo sɩɛrʋ, a má dídí cana ɓɩzeno arɩ́ háála.Hákuóro Vasiti kiré wɩ́ɛ́
10 Tápʋlɛ balpɛ kal, rɩ kuóro tɛŋ wuu pɔ́rɔ́, ʋ há vɔ́kɛ́ dɩvɛ́ŋ. Ɛ́ nɛ́ ʋ yɩ́rʋ́ minísiwa ná balpɛ háá bélú ɓɩɛ mɛ́: Mehumaŋ, Bizita, Harbona, Bigita, Abagɩta, Zɩtaarɛ arɩ́ Karɩkasɛ, 11 a bʋlɛ́ rɩ́wɔ́ a rɩ́ hákuóro Vasiti kánʋ́ hákúónyúgiro ko kuóro sɩ́ɛ́, a mákʋ́ wér pá jamáŋ ná arɩ́ kuówɩɛla ná; bee wɩ́ɛ́ ʋ fa ká háwérí tɩɩ rɛ́. 12 Amá minísiwa ná há mʋ́ɛ́ bʋl hákuóro ná rɩ́, ʋ vɔ́ɔ́, ʋ wɩ kúé. Ɛ́ nɛ́ kuóro cɔ́ɛ́ wɛ kɩ́ŋkáŋ, ʋ poŋ. 13 Ʋ bɔ́sʋ́ wɩ́zɩ́nnɛ́bɩbara rʋ́ʋ́ ná, bee wɩ́ɛ́ kuóro wɩ́ɩ́ wuu, nɩɛ ná há ɛ̃ wɩ́ɛ́, a zɩŋ wɩ́ɛ́ naasɛ, ɓa nɛ́ zɩ́mɛ́ aá pɔ́ʋ́. 14 Ɓa ɛ́ nɩɛ sɩɛrʋ, ɓa ná há lɛ́l kuóro kɩ́ŋkáŋ nɛ́ ká: Karsena, Sɩtaarɛ, Adɩmata, Tarsisi, Mɛrɛsɛ, Marsena arɩ́ Memukaŋ, ɓa balpɛ ká Medi rɩ́ Pɛrsɛ kuówɩɛla nɛ́, a a nɩpíŋé kuóro dɩtɩ́llɛ, ʋ káŋwɔ́ yardá. 15 Kuóro sɩɛ́ bʋ́lwɔ́ rɩ́ bʋlɛ́: <<Ŋ é, kuóro, ŋ tʋ́mɩ́ŋ minísiwa rɩ́wɔ́ ka liŋó mʋ́ pá hákuóro Vasiti, ʋ vɛ́ŋ nʋɔ. Wáda orí rí mɔhɛ̃́ rʋ́ʋ́ bílú mí?>>
16 Ɛ́ nɛ́ Memukaŋ bʋl kuóro rɩ́rʋ́ kuówɩɛla ná rɩ́ bʋlɛ́: <<Hákuóro Vasiti wɩ́'aalɩ́ ná wɩ weri mʋɔ́ má tɩɩ; ʋ sɩɛ́ wɩ ɛ́ɛ́ caasɛ kuóro dʋŋɔ nɛ́, kuóro rɩ́rʋ́ kuówɩɛla wuu, arɩ́ nɩɛ ná wuu há mɩŋ kuóro dɩtɩ́llɛ pʋ́rɔ́vɛ́ŋsɛwa ná wuu mí rɩ́ nɛ́, ʋ a. 17 Bee wɩ́ɛ́, háála wuu sɩ́ nʋ́ʋ́ wɩ́'aalɩ́ né, a má bel gúóníwó báláwa tíŋ, ká bʋlɛ́: <Kuóro Asuerusi má tɩɩ fa tʋ́mɔ́ rɩ́wɔ́ yɩ́rʋ́ háálɔ Vasiti rʋ́ʋ́ ko ʋ vɛ rɛ́.> 18 Zaa wuu, Pɛrsɛ rɩ́ Medi kuówɩɛla háála sɩ́ nɛ hákuóro wɩ́'aalɩ́ né, a pi ɛ́ bílwó báláwa mɛ́, a múúríwó, rɩ́ ɛ́ ílli báála cɔ́ɛ́. 19 Rɩ kuóro faá sáŋʋ́, rʋ́ʋ́ pʋ́ŋsɛ wáda kɛnɔ ná há sɩ́ bʋlɛ́ hákuóro Vasiti báá wɩ́ ŋmɛ́nɔ kené aá zʋ kuóro sɩ́ɛ́; ká rʋ́ʋ́ harwa oro há cúcóú mí, rʋ́ʋ́ nɛ́ la háála kuorí ná. Rɩ́ ɛ́ wáda kɛnɔ kuóro há sɩ́ pʋ́ŋsɛ, rɩ́wɔ́ hóú Pɛrsɛ rɩ́ Medi wádawa kɛŋzeno sɩɛrʋ, ʋ waá giri. 20 Rɩ ɛ́ liŋó ní pérí kuóro dɩtɩ́llɛ zenó né wuu, háála wuu sɩ́ zílwó báláwa, ɓɩɛ tɩ́náwa rɩ́ nɩyaara wuu.>>