Ɛsɩtɛɛrɛ bɩrmɛ hakuóro
2
1 Ɛ́ wɩ́ɛ́ har rɩ́ mɛ́, kuóro Asuerisi cɔwɩɩlɔ́ pɔ́rɔ́, ʋ sɩɛ́ líísú tɩɩ Vasiti wɩ́ɛ́, ʋ fa há ɔ́ɔ́ ná arɩ́ wɩ́ɩ́ ná há bílú mí. 2 Kuóro hatɩŋna ná háá tʋ́mʋ́ mɛ́, sɩɛ́ bʋ́lʋ́ rɩ́ bʋlɛ́: «Ʋ mɔhɔ̃́ rɩ́wɔ́ ja toopere ná há wéró kɩ́ŋkáŋ a wɩ báála pɩ́nɛ́ ná, a pá kuóro. 3 Ʋ mɔhɔ̃́ rɩ́ kuóro lɩ́sɛ nɩɛ ʋ dɩtɩ́llɛ pʋ́rvɛ́ŋsɛwa wuu mí, a pɔ́wɔ́ liŋó rɩ́wɔ́ kɛsɛ toopere ná há wéró kɩ́ŋkáŋ a kaa ko tɔ́zeno Suzi, kuóro wuolo mí, a makɛ rɩ́ Hege ní háá bel kuóro wuolo rɩ́ kuóro háála mɛ́, rʋ́ʋ́ bélwó mí, a ja háwernʋnnɛ pɔ́wɔ́. 4 Kuóro sɩ́ɩ́ há sɩ́ zʋ toopero ná, ʋ nɛ́ sɩ́ la hákuóro Vasiti nyúú mí.» Kuóro nóú rɩ ɛ́ sabɩɩna wéró, ʋ saŋ rɩ́ wɔ́ tʋŋ ɛ́.5 Zuwifi oro ɓaá yɩ́rʋ́ Mardose, ʋ má fa mɩŋ Suzi tɔ́zeno ná mɛ́; ʋ áná yɩr nɛ́ Yayiri, Yayiri má áná yɩr nɛ́ Simeyi, Simeyi má áná yɩr nɛ́ Kisi, a lɛ́ Bɛŋzamɛ jɩmʋ́l. 6 Babɩlɔɔnɛ kuóro Nebukanɛtɩzaarɛ nɛ́ fa yóé ka ɛ́ Mardose, rɩ́ nɩɛ náŋa Zerizalɛmɛ mɛ́, arɩ́ Ziida kuóro Yekonia a kaa mʋ́ ráŋ. 7 Mardose sɩɛ́ fa púú anwie toló Hadaasa, ɓa kaá yɩ́rɛ Ɛsɩtɛɛrɛ, a dɩ́ɛ́sɛ. Ʋ áná rɩ́rʋ́ maá wuu ní fa sʋ́sɛ́, kɔ́ʋ́ nɛ́ bíbélú mí ʋ bɩ́rmʋ́ toló. Ɛ́ toló sɩɛ́ fa wéró kɩ́ŋkáŋ, ʋ tɛŋ má tʋlɛ́.
8 Ɓa há kúé búóli kuóro liŋó ná, tolé ɓɩkana kúó hé náŋá mɛ́ tɔ́zeno Suzi mí; Ɛsɩtɛɛrɛ fa mɩ́ŋwɔ́ sɩɛrʋ. Ɓa sɩɛ́ kɛ́sɩ́wɔ́ wuu zʋ kuóro wuolo, a píwó pá háála bíbello Hege rʋ́ʋ́ bíbélwó mí. 9 Hege sɩɛ́ fa có Ɛsɩtɛɛrɛ wɩ́ɛ́. Ɓalaɓala rʋʋ já háwernʋnnɛ rɩ́ ɓidííle a pɔ́ʋ́, a tʋɔsɛ kuóro jaa toltʋtʋnna balpɛ a pɔ́ʋ́, a ja wuolo ná jɩwero a hóú rɩ́rʋ́ tʋtʋnna ná. 10 Ɛsɩtɛɛrɛ fa wʋ́ʋ́ duo mákɛ́, ʋ wʋ́ʋ́ dɩlɩ́ɩ́ má mákɛ́, bee wɩ́ɛ́ Mardose fa sʋ́ʋ́ pɔ́ rʋ́ʋ́ háá mákwɔ́. 11 Ká kál wuu, Mardose má sɩ́ ko kuóro wuolo sɩ́ɛ́, a makɛ rʋ́ʋ́ ná Ɛsɩtɛɛrɛ tɛŋfɩ́ɛ́l mʋɔsɔ, arɩ́ ɛ́ ná ɓa háá bélú mí.
12 Toopere ná há mɩŋ wuolo ná mɛ́, ʋ fa mɔhɔ̃́ rɩ́wɔ́ bélwó mí, a bɩ́rmɩ́wɔ́ háwerbɩrmɛ́ bɩná sɩ́ɩ́, anɛ ɛ́ há máŋsɛ pá háála, ká rɩ́wɔ́ sɩɛ́ zɩŋ zʋ kuóro Asuerisi basa. Dʋ́ŋdʋ́ʋ̃́ caŋsɛ ná balgo, ɓaá pi mííri nʋʋ nɛ́ a fɔ́nnɩ́wɔ́, ká caŋsɛ balgo ná há tʋ́kɛ́, ɓa pi háála tulaaléwa arɩ́ háwernʋnnɛ aá tɩ́ɩ́sɩ́wɔ́. 13 Rɩ toopero ná nɩ́ɩ́ já rʋ́ʋ́ lɛ háála wuolo a zʋ kuóro dɩhɩ̃́, ʋ háá ja omo ná wuu ní ɓaá pɔ́ʋ́, ʋ kaa zʋ. 14 Ʋʋ́ zʋ kuóro dɩhɩ̃́ gbaanɛ nɛ́, tɔ́ɔ́ pʋl cɩ́cʋɔ ʋ lɛ a zʋ wuolo nɔ́ŋɔ, Saasɩgazɛ nɛ́ há ká minísi*(báféré) ná háá bel kuóro háwiisi mí, ʋ bíbélú mí. Ɛ́ toopero báá wɩ bɩ́rɛ́ aá zʋ kuóro dɩhɩ̃́, rɩ kuóro ra wʋ́ʋ́ ja rɩ́ɩ́ yɩ́rʋ́ yɩr, rɩ́wɔ́ a rʋ́ʋ́ zʋ.
15 Kal oro, Mardose anwie Abihayil toló Ɛsɩtɛɛrɛ, Mardose há píé dɩ́ɛ́sɛ, ʋ kuóro dɩhɩ̃́ tápʋl zʋʋlɩ́ nɛ́. Ɛsɩtɛɛrɛ ɔ́ɔ́ ɓa pɔ́ʋ́ onni ná Hege, kuóro minísi ná háá bel háála mɛ́ há mákɛ́ pɔ́ʋ́ nɛ́; ʋ tɩɩ wɩ óŋ wuu mákɛ́ súúri. Nɩɛ wuu sɩɛ́ fa có Ɛsɩtɛɛrɛ wɩ́ɛ́. 16 Kuóro Asuerisi kuorí bɩŋsɛ balpɛ nyúú mí, caŋsɛ fí nyúú mí ní, ɓaá yɩ́rɛ Tɛbɛtɛ cana, ɛ́ cana mɛ́ nɛ́ ɓa ka Ɛsɩtɛɛrɛ zʋ kuóro jaa a pá kuóro. 17 Kuóro cólli Ɛsɩtɛɛrɛ a kɩ́llɛ háála wuu. Ʋ cóllú wɩ́ɛ́ wérí a kɩ́llɛ toopere ná náŋa wuu. Ɛ́ nɛ́ ʋ pi hákuóro nyúgiro ná a cíkú nyúú mí, a a ʋ la Vasiti nyúú mí a dí háála kuorí. 18 Kuóro dí cana ɓɩzeno Ɛsɩtɛɛrɛ yɩr mɛ́, a yɩ́rʋ́ kuówɩɛla rɩ́rʋ́ minísiwa wuu. Ʋ pá ŋmɛ́nɔ rɩ́wɔ́ sɩ́ loŋpówa la pʋ́rvɛ́ŋsɛwa mɛ́, ká dí kuózilé a pá nɩɛ. 19 Ɓa baa hé toopere ná náŋá mɛ́ naasɩ́ bʋllɛ nyúú mí. Mardose fa kéŋ dɩkéni kuóro dánnʋɔ. 20 Ɛ́ tɛ́ŋ mɛ́ wuu, Ɛsɩtɛɛrɛ ha wʋ́ʋ́ dɩlɩ́ɩ́ rɩ́rʋ́ duo mákɛ́, anɛ ɛ́ Mardose há mákɛ́ pɔ́ʋ́. Ɛsɩtɛɛrɛ faá tɩŋ Mardose nʋɔ, (bee wɩ́ɛ́ ʋ nɩ́ɩ́ bélú mí).
Mardose wúlli nɩɓʋ́ʋ́ra mʋ́l
21 Tɛ́ŋ ná mɛ́ Mardose háá ké kuóro dánnʋɔ ná, kuóro minísiwa bɛllɛ Bigitaŋ rɩ́ Tɛrɛsɛ, háá bel dánnʋɔ mɛ́, ɓa fa vʋ́ʋ́rɔ́ rɩ́wɔ́ ɓʋ́ kuóro Asuerusi, ɓa cɔ́ɛ́ háá wʋ́ʋ́ wɩ́ɛ́. 22 Mardose nɛ ɛ́ wɩ́ɩ́, a bʋl pá hákuóro Ɛsɩtɛɛrɛ, ʋ bʋl kuóro mí Mardose yɩr mɛ́. 23 Ɓa ja, a ná rɩ ɛ́ wɩ́ɩ́ ká taŋá nɛ́. Ɓa kɛsɛ ɛ́ minísiwa bɛllɛ, a cɔ́ŋsɛ daa a yówó zúkléŋwa. Kuóro tɩɩ sɩ́ɛ́ mɛ́ nɛ́ ɓa pʋ́ŋsɛ ɛ́ wɩ́ɩ́ hé kuóre wɩ́'állɛ kɛnɔ sɩɛrʋ a bil.