Hamaŋ rɩ́ Mardose nɛsɛ wɩ́ɛ́
3
1 Ɛ́ wɩ́ɛ́ há dáárɛ́ har mɛ́, kuóro Asuerusi súúri Hamaŋ yɩr. Hamaŋ ná fa ká Agaagɛ duo nɛrɔ báálɔ oro ɓaá yɩ́rɛ Hamedata bio ní. Kuóro píŋsú, a a ʋ nɛ́ ɔ́ʋ́ náŋa ná há ká minísiwa ná wuu sɩ́dííro. 2 Kuóro zʋ́ɔ́ tʋtʋnna wuu faá ɓírmi ní a káŋwɔ́ sɩ́ɛ́ cú tíé Hamaŋ sɩ́ɛ́, bee wɩ́ɛ́ kuóro ní pá ŋmɛ́nɔ rɩ́wɔ́ tʋŋ ɛ́. Amá Mardose é fa vɔ́ɔ́, ʋ waá ɓírmi, a wʋ́ʋ́ sɩ́ɛ́ má kené aá cú tíé. 3 Ɛ́ nɛ́ tʋtʋnna ná há mɩŋ kuóro zʋ́ɔ́ mɛ́ bɔsɛ Mardose bʋlɛ́ rɩ́ beé rí tɛ ʋ wɩ kuóro nʋɔ zíl. 4 Kal wuu ɓaá bɔsɛ Mardose, kɔ́ʋ́ wʋ́ɔ́ rɩ́ zesi. Ʋ sɩɛ́ fa há bʋ́lɛ́ pɔ́wɔ́ bʋlʋ́ ká Zuwifi rí, ɛ́ nɛ́ ɓa wúllú mʋ́l pá Hamaŋ, a makɛ rɩ́wɔ́ ná ʋʋ́ bɩ́rsɛ mála rɛ́. 5 Hamaŋ há kɩ́ɛ́lɛ́ rɩ Mardose ɓɩɛ́na waá ɓírmi, ʋ wʋ́ʋ́ sɩ́ɛ́ má kené aá cú tíé ʋ sɩ́ɛ́, ɛ́ nɛ́ ʋ cɔ́ɛ́ wɛ kɩ́ŋkáŋ. 6 Ɓa baa ha bʋl pɔ́ʋ́ bʋlɛ́ Mardose ká Zuwifi rí. Ɛ́ nɛ́ ʋ ná rʋʋ nɛ́ dúú tɛŋbuoró Mardose dʋŋɔ nyúú, ʋ tɛŋ waá pɔrɛ. Ʋ sɩɛ́ ja ŋmɛ́nɔ rʋ́ʋ́ de ɓʋ́ʋ́sʋ́ duo nɩɛ wuu, Zuwifiwa ná wuu há mɩŋ kuóro Asuerusi dɩtɩ́llɛ. 7 Asuerusi kuorí díí bɩŋsɛ fí rí bɛllɛ nyúú mí, dʋ́ŋdʋ́ʋ̃́ cana há ká Nisaŋ cana, Hamaŋ ɔ́ɔ́ ɓa yo bíé ná ɓa háá yɩ́rɛ púrimi, rʋ́ʋ́ ná tápʋl ná rɩ́ cana ná háá cɛ́rɛ́ rɩ́ pɔ́ʋ́, rʋ́ʋ́ tʋ́mʋ́ há bɩ́ɩ́nʋ́ ná. Ɓa yó púrimi ná, rɩ caŋsɛ fí rí bɛllɛ nyúú mí há ká Adarɛ cana, rʋʋ nɛ́ cɛ́rɛ́.Hamaŋ bɩ́ɩ́nɛ Zuwifiwa túhéé
8 Ɛ́ nɛ́ Hamaŋ bʋl kuóro Asuerusi rɩ́ bʋlɛ́: «Jamáŋ oro rí mɩŋ rɛɛ́ a ɔ́wɔ́ dʋŋɔ; ɛ́ jamáŋ nɩɛ dé kuosi nɩɛ sɩɛrʋ nɛ́ pʋ́rʋ́vɛ́ŋsɛwa wuu mí, ɩ dɩtɩ́llɛ. Ɓa wádawa kɔ́wɔ́ dʋŋɔ́, ɓa rɩ́rɩ́ nɩɛ ɓɩɛ to balá, ká ɓa wɩ kuóro nʋɔ máá tɩŋ. Ʋ wɩ nyʋɔrɛ́ kené a pɛ́ɩ́, rɩ́ɩ́ lo ɛ́ nɩɛ fɛ́lɛ́lɛ́. 9 Rɩɩ béló rɩ ɛ́ wéró, ɩ pʋ́ŋsɛ kɛnɔ a pá ŋmɛ́nɔ rɩ́wɔ́ ɓʋ́ʋ́sɩ́wɔ́, ká ná, ŋ sɩ́ dɩɩsɛ meéwícááka bʋ́ɩ́ fí a pá tʋtʋnna rɩ́wɔ́ hé kuóro meéwíé dáknɛ sɩɛrʋ.» 10 Ɛ́ nɛ́ kuóro lɩ́sʋ́ nénípɩr a pá Hamaŋ, Zuwifiwa dɩŋdɔmɔ; Hamaŋ ná há ká Agaagɛ duo nɛrɔ báálɔ oro ɓaá yɩ́rɛ Hamedata bio. 11 Kuóro sɩɛ́ bʋl Hamaŋ rɩ́ bʋlɛ́: «Kánɩ́ meéwíé, amá ɛ́ nɩɛ ŋ táwɔ́ pɛ́ɩ́ rɩ́ɩ́ ɛ́ɩ́ há có ɛ́.»
12 Dʋ́ŋdʋ́ʋ̃́ cana tápʋlɛ fí rí botoro kal, ɓa yɩ́rɛ kuóro kɛŋpʋ́ŋsa. Ɓa sɩɛ́ pʋ́ŋsɛ wɩ́ɛ́ ná Hamaŋ há máŋsɛ a pá kuóro nɩbilé: pʋ́rʋ́vɛ́ŋsɛwa hókomísɛ́rɛwa rɩ́ píréféwa arɩ́ íríŋ wuu kuóro. Ɓa pʋ́ŋsɛ kɛnnɛ ná kuóro dɩtɩ́llɛ pʋ́ŋsɛwa íriŋwa wuu mí, arɩ́rʋ́ dɩtɩ́llɛ líŋsi wuu mí ní. Ɓa pʋ́ŋsɛ kuóro Asuerusi yɩr mɛ́ nɛ́, a púú nɛ́cikó há kɔ́ʋ́ nénípɩr a ciki. 13 Ɓa tʋ́ŋ nɩɛ ɓa ka kɛnnɛ ná gʋɔrɛ ɓa kuóro dɩtɩ́llɛ pʋ́rʋ́vɛ́ŋsɛwa ná wuu. Kɛnnɛ ná sɩɛrʋ, ɓa pá ŋmɛ́nɔ rɩ́wɔ́ tú Zuwifiwa wuu hé, a ɓʋ́ʋ́sɩ́wɔ́, a pɔ́ heŋbólwie mí a kaa mʋ́ lɛ bánɩ́ɩ́na mɛ́, heŋbiisi rɩ́ háála wuu, tápʋ́l balá, ká tɩ́llɩ́wɔ́ ɓɩɛ wuu; caŋsɛ fí rí bɛllɛ nyúú mí há ká Adarɛ cana, tápʋlɛ fí rí botoro kal. 14 Pʋ́rʋ́vɛ́ŋsɛ wuu mí, kɛnɔ ná sɛ́ ká wádá rɛ́, a mɔ rɩ́wɔ́ búóli pá duo wuu nɩɛ, a makɛ rɩ́ nɛrɔ wuu kánʋ́ tɩɩ ɛ́ tápʋl rɩ́ tʋtʋmɩ́ ná tʋŋ. 15 Kuóro há tɛ́ ŋmɛ́nɔ rɩ́ nɩtʋmɛ́ ná ka kɛnnɛ ná va, kɩ́kɛ́lɛ́ kɩ́kɛ́lɛ́ rɩ ɓa cóló, ká ɓa búóli ɛ́ wɩ́ɩ́ sú tɔ́zeno Suzi. Kuóro rɩ́ Hamaŋ sɩɛ́ ké rɩ́wɔ́ nyɔ, ká Suzi tɔ́ɔ́ wuu mɩŋ wííle mí.