ELIHU WƖBƲLƐ
Elihu cɔwɩɩlɔ wɩ́ɛ́
32
1 Zɔɔbɛ há wɩ saŋɛ rʋ́ʋ́ ká wɩ́zɔkrʋ, Elifaaze rɩ́ Bildaadɛ arɩ́ Safaarɛ baá wɩ nʋɔ lɩ́sɛ a pɔ́ʋ́. 2 Ɛ́ ɔ́ɔ́ báálɔ oro ɓa haá yɩrɛ Elihu, cɔ́ɛ́ wɛ́. Ʋ áná nɛ́ ká Barakeli, a lɛ́ Buuzi jɩmʋ́l sɩɛrʋ, Raamɛ duo sɩɛrʋ. Zɔɔbɛ há lá taŋá Wɩɩsɛ rɩ́ a pɔ́ʋ́ tɩɩ, ɛ́ nɛ́ tɛ Elihu cɔ́ɛ́ wʋ́ʋ́. 3 Ʋ cɔ́ɛ́ sɩɛ́ wʋ́ʋ́ naŋnɔŋsɛ ná botoro má rɛ́, beé wɩ́ɛ́, nʋʋsɛ ná ɓa há lɩ́sɛ a pá Zɔɔbɛ fa wɩ weri. Ɓa sɩɛ́ tɩŋ ɛ́ mɛ́ nɛ́ a pi nyɩɛrʋ pá Wɩɩsɛ. 4 Elihu sɩɛ́ fa kénú nʋɔ, rʋ́ʋ́ sɩ́ wɩ́ɩ́ bʋ́lʋ́ Zɔɔbɛ rɩ́, beé wɩ́ɛ́, naŋá ná mɩɩsɛ hɩ́ɛ̃́sɩ́ fá kʋ́ʋ̃́. 5 Amá ʋ há kúé ná rɩ́ báála ná botoro baá wɩ nʋlɩsɔ́ wuu kéné, ʋ cɔ́ɛ́ pómó.Elihu máŋsɛ wɩ́ɩ́ ná há tɛ́, ʋ mɔ rʋ́ʋ́ hóú nʋɔ
6 Elihu, há ká Barakeli bio, a lɛ́ Buuzi jɩmʋ́l sɩɛrʋ sɩɛ́ wúrú nʋɔ a bʋ́lɛ́:
Ŋ é há ká nɩpʋɔ́sɩ́ rɛ́ ká ɩ́ é dí bɩŋsɛ ɓɩkana.
Ɛ́ nɛ́ tɛ́ ŋ fa fɩfa héwíŋ,
rɩ́ŋ bʋ́lɩ́ŋ há ʋ̃́ ná ɩ́ sɩ́ɛ́ mɛ́.
7 Ŋ fa sɛ́: «Nɩhɩ́ɛ̃́sɛ nɛ́ tɛ́ wɩ́bʋlɛ,
nɩbɩnɛ́wa nɛ́ kéŋ zɩmɛ́ a pi aá karmɛ nɩɛ!»
8 Taŋá wuu, nɩbííno wɩ́zɩŋ lɛ́ Sabɩɩna nɛ́,
Wɩɩsɛ ná há kɛ́ oŋ wuu Sabɩɩna nɛ́.
9 Nɛ́ŋ ná bɩŋsɛ há kánɔ́ dʋŋɔ rá wɩ zɩmɛ́ kéné,
nɛ́ŋ ná há nɩ́ɩ́nɛ́ dʋŋɔ rá wɩ taŋá ɛ̃́.
10 Ɛ́ nɛ́ tɛ́ ŋ sʋ́lɩ́wa rɩ́ɩ́wa cɛ́, ká rɩ́ŋ pɛ́ɩ́wa:
ŋ có rɩ́ŋ má makɩ́ŋ há ʋ̃́ ná a pɛ́ɩ́wa.
11 Ʋ ká ɛ́ nɛ́, ŋ dɛllɔ rɩ́ŋ néíwa fa há sɩ́ bʋ́lʋ́ ná,
ŋ fa có rɩ́ŋ nɛ́ wɩ́ɛ́ ná há mɩnɩ́wa sɩɛrʋ,
wɩ́ɩ́ ná ɩ́ haá bɩ́ɩ́nɛ́.
12 Ŋ ɓilíŋ dɩllɛ ká caasɛ zesíwa wɩ́bʋlɛ́ ná weri,
amá ɩ́ oro wuu wɩ Zɔɔbɛ wɩ́bʋlɛ́ ná bɩ́ɩ́lɛ
ɩ́ wɩ nʋlɩsɔ́ ɓɩwér lɩ́sɛ a pɔ́ʋ́.
13 Ɩ́ pɔ́ rɩ́ɩ́wa sɩ́ bʋ́lʋ́ rɩ́ɩ́ bʋ́lɛ́: «Nyɛ nɛ́ ká zɩmɛ́:
Wɩɩsɛ nɛ́ sɩ́ cɩ́nʋ́ wɩ́bʋlɛ́ ná mɛ́, amá á é rá wʋ́ɔ́ kaá bɩ́ɩ́lɛ.»
14 Zɔɔbɛ wɩ́bʋlɛ́ nyaŋ wɩ́ŋ nɛ́ caasɛ;
ɛ́ ná ɩ́ há lɩ́sɛ nʋɔ a pɔ́ʋ́, ŋ wɩ có rɩ́ŋ má nʋlɩsɔ́ nɛ́ ɛ́.
15 Ɩ́ nʋʋsɛ cɛ́wɔ́, ɩ́ wɩ wɩ́bʋlɩ́ kéné
ɩ́ baá wɩ́ɩ́wa há sɩ́ bʋ́lʋ́ ná ɛ̃́.
16 Ŋ há dɛllɛ, ká ɩ́ wɩ wɩ́ɩ́ bʋl
ká sikli, a wɩ nʋɔ kéné aá lɩ́sɛ,
17 ɛ́ wɩ́ɛ́, ŋ má nɛ́ tɛ́ wɩ́bʋlɛ́ mʋ́l né mí.
Ŋ má há ʋ̃́ ná, ŋ có rɩ́ŋ máŋsʋ́.
18 Ŋ sɩɛrʋ wɩ́ɛ́ káŋ;
ŋ wɩ wúó nyammɛ, ŋ sabɩɩna níí yikíŋ rɩ́ŋ bʋl wɩ́ɛ́.
19 Ŋ sɩɛrʋ wuu níí wáásɛ anɛ nyiipur sɩɛrʋ sɩŋ
há wie a cɔnnɛ nyiipufɛlɛ.
20 Ɓa lo rɩ́ŋ bʋl wɩ́ɛ́, ká hiẽ́si,
rɩ́ŋ wúríŋ nʋɔ mɛ́, a lɩ́sɛ wɩ́ɛ́ sɩ́ɛ́.
21 Ʋ ká pʋmmɩ́ rɩ́ŋ waá a rɩ́ŋ bʋl a zʋ́ nɛ́ŋ wuu har,
ŋ sɩɛ́ baá waá a rɩ́ŋ bɩ́ɩ́wa oro má wuu mí.
22 Ŋ wɩ nɛrɔ nyɩsɛ́ ɛ̃́, ká rɩ́ŋ nɛ́ sɩɛ́ tʋ́ŋ ɛ́ má,
ŋ Mɩmaarɔ waá ló rɩ́ŋ cɔ́ daanɛ, ká rʋ́ʋ́ láŋ mɩɩsɛ.