Zɔɔbɛ hatɩŋnɛ́ wɩ́bʋlɛ́: Mɩnɛ́ mɩnɛ́ ká ko tó haá wɛ́ ɛ́! b) Die wér daarɔ.
29
1 Zɔɔbɛ baá wúrú nʋɔ mɛ́ a bʋ́lɛ́:2 Rɩ́ŋ baá wo die ná aá ná rɛ́,
tɛ́ŋ ná mɛ́ Wɩɩsɛ tɩɩ nɛ́ fa haá belíŋ mí,
3 tɛ́ŋ ná mɛ́ ʋ caanɔ́ fa haá cuolíŋ nyúú rí!
Ʋ pʋmmɔ nɛ́ faá pɛ́ŋ mɛ́ ŋ vɩva tɩtáŋ.
4 Rɩ́ŋ fa peri bál ɛ́ tɛ́ŋ mɛ́ (mɩnɩ́ŋ bɩ́ɩ́ bɩŋsɛ sɩɛrʋ nɛ́),
ká Wɩɩsɛ díŋ naŋnɔŋnnɛ, aá bélíŋ jaa mɛ́.
5 Wɩɩsɛ ná há kɛ́ oŋ wuu, ʋ tɩɩ nɛ́ fá há mɩnɩ́ŋ har,
ká ŋ heŋbolli fá kilíŋ.
6 Ɛ́ tɛ́ŋ mɛ́, rɩ́ŋ fá pɛ́ ɓɩɛ sɩɛrʋ,
rɩ nʋʋ palʋ, ŋ nʋʋ dɩhaasɩ́.
7 Rɩ́ŋ nɛ́ fá lɩ́ɛ́ rɩ́ɩ́ caasɛ tɔ́ɔ́ dánnʋɔ,
rɩ́ŋ nɛ́ fá mʋ́ɛ́ kéŋ ɓasa daha cemé dɩhɩ̃́,
8 rɩ́ heŋbiwafɛlɛ néŋ, ɓa isi a ja cɔɔ nɔ́ŋɔ nɛ́,
ká nɩhɩ́ɛ̃́sɛ má isi a cɛ́ daha.
9 Nɩpiŋe tá wɩ́bʋlɛ,
a sikli ká tɩkwɔ́ nʋʋsɛ mɛ́.
10 Sɩ́dííre tuwiwó líŋsi, dɔmɛ́ baá waá dɔ́ŋ.
11 Nɛ́ŋ ná wuu nɛ́ ŋ wɩ́bʋlɛ́, ʋʋ́ bɛ́ ŋ mɛ́;
nɩɛ ná wuu há néŋ, ɓaá zilíŋ:
12 Beé wɩ́ɛ́, ŋ la nɛ́múrtɩ́ɩ́na ná há yɩrɛ a héŋ mí aá tá
arɩ́ bisiŋsi ná há wɩ dɩtɩ́ɛ́kɩ́ kéné.
13 Nɩɛ ná há cɛ́ sʋʋ mɛ́, hé barka aá páŋ,
ká ŋ a yúháála nɩná satɔrɔ́.
14 Rɩ taŋá nyɩ́ɩ́sɛ, ɛ́ nɛ́ fá káŋ gɛsúó,
ŋ kápóti nɛ́ ká wɩ́bile zile, ŋ nyúbalɔ (nyúɓikó) nɛ́ ɛ́.
15 Ŋ nɛ́ fa ká nyʋmmɔ sɩ́ɛ́,
ŋ nɛ́ ká gbɛ́rkɔ má naasɛ.
16 Ŋ nɛ́ fá ká wɩlnáára áná,
ŋ nɛ́ faá zɩŋ nɩhʋɔrɔ wɩ́kanɩ́ ʋ sɩ́ɩ́ mɛ́.
17 Amá nɩbɔma é wuu, ŋ faá ginníwó nyɩla,
aá lokri namɩŋsɛ ná há mɩŋwɔ́ nyɩla pɛ́ksɛ.
18 Ŋ fá sɛ́: «Ŋ dal sɩɛrʋ nɛ́ ŋ sɩ́ sʋ́wɛ́,
ŋ sɩ́ bɩr'isi a dí tɔ́ɔ́ dáánɛ kɩ́ŋkáŋ anɛ diíwie ná ɓa haá yɩrɛ “fenikisi”.
19 Ŋ nɩhɩ̃́ tuu ná nalúrsi há mɩŋ nyii sɩɛrʋ nɛ́;
tɩtáŋ nyɛlɔ́ nyɛl a kánɩ́ŋ hilli.
20 Ŋ sɩ́ ná yɩfɛlɔ́ tɛ́ŋ
ká rɩ́ŋ dóé a dofɛlʋ, a nɩ́ɛ̃́sɛ tuó ɓa há zɩnɛ.»
21 Ɛ́ tɛ́ŋ mɛ́, ɓaá sikli, kaá zesíŋ
aá dɛ́llɩ́ŋ há sɩ́ bʋ́lʋ́ ná.
22 Rɩ́ŋ bʋ́lɔ́ tenni, wɩ́bʋlɛ baá tó aá súúri,
ká wɩ́bʋlɛ́ ná nyʋ́ʋ́mɛ aá zʋ́wɔ́ tɛ́ŋ balá baláwa.
23 Ká nɩɛ dɩ́dɛllɩ́ŋ anɛ ɛ́ ɓa haá dɛllɛ duóŋ,
anɛ ɛ́ ɓa haá dɛllɛ yɩbíŋ duópuse.
24 Rɩ́ŋ nɛ́ mɔ́mɛ́ a caasɩ́wɔ́ má, ɓa wɩ́ŋ lɛ́ aá dí,
ká haá nyɩ́ɩ́lɩ́ŋ sɩ́ɛ́ mɛ́, rɩ́wɔ́ ná satɔrɔ́.
25 Ŋ nɛ́ fá díwó hɩ́ɛ̃́sɩ́, a makɛ ŋmɛ́nɔ́ aá pɔ́wɔ́,
ŋ mɩŋwɔ́ sɩɛrʋ anɛ ɛ́ kuóro há mɩnʋ́ sóójiwa sɩɛrʋ,
anɛ nɛrɔ háá bʋɔlɛ nɩɛ ná sɩɛnnɛ há zɔkɛ́.