Sofaarɛ wɩ́bʋlɛ́: Nɩbɔma ballɩ́ díí wáá daanɛ́
20
1 Sofaarɛ há lɛ́ Naama lɩ́sɛ nʋɔ a bʋ́lɛ́:2 Ná óŋ ná há tɛ ŋ wɩ́bɩɩnɛ́ fɩ́kɩ́ŋ mɛ́ rɩ́ŋ lɩ́sɛ nʋɔ,
ŋ há wɩ wúó nyammɛ wɩ́ɛ́.
3 Ŋ nɛ́ cáánɛ́wa há káŋ zomé,
amá ŋ sabɩɩna mɛ́, ŋ ɛ̃́ nʋɔ ná ŋ há sɩ́ lɩ́sɛ.
4 Ɩ wɩ ɛ̃́ rɩ́ fól wuu,
a pɔ́ tɛ́ŋ ná mɛ́ nɩbííno há mɩ́ŋ tíé nyúú,
5 rɩ́ nɩbɔma ballɩ́ díí wáá dáánɛ́,
rɩ́ nɩɛ ná há wɩ Wɩɩsɛ lɛ́ɛ́ dí, satɔrɔ́ wáá dáánɛ.
6 Rʋ́ʋ́ (nɩbɔma) gbesi có zɛ́ aá yakɛ bána mɛ́,
rʋ́ʋ́ nyúú có rʋ́ʋ́ tɩtɩkɛ duóbasɛ mɛ́ má,
7 ʋ sɩ́ nyɩ́ɩ́kɛ a kaá mʋ́ wuu anɛ ɛ́ ʋ kʋ́ɔ́ra háá nyɩ́ɩ́kɛ,
ká rɩ́ nɩɛ ná fa háá nóú bʋ́lɛ́:
«Ʋ mɩ́ŋ nɛ́ɛ́ rɛ́>>»
8 Ʋ sɩ́ fil anɛ ɛ́ duose háá file,
ɓa báá wʋ́ʋ́ ná;
ʋ ɓa kírú rʋ́ʋ́ nyɩ́ɩ́kɛ anɛ tɩtáŋ duóse;
9 sɩ́ɩ́ ná fa háá bélú báá wáá a rʋ́ʋ́ bélú,
ʋ dɩmɩnɩ́ baá wʋ́ʋ́ ná.
10 Ʋ bɛlɛ sɩ́ túŋ yaarɩtɩ́ɩ́na (+kɩma)
ʋ nɛ́sɛ sɩ́ pi óŋ ná fa há pɔ́ʋ́ kuorí tɛ.
11 Ʋ tɛŋ wuu fa kéŋ nɩpʋɔsɩ́ dóé,
amá ʋ rɩ́rʋ́ (ɛ́ dóé) wuu nɛ́ sɩ́ zʋ́ bʋɔ.
12 Bɔ́ŋbɔ́ŋ ŋmɔ́mɔ́ ʋ nʋɔ mɛ́,
ʋ pii féŋsú (gɩ́rʋ́) nʋŋduli mʋ́l.
13 Ʋ mɩ́nʋ́ rɩ́ ʋ wʋ́ʋ́ tɛ́,
ʋ kénú ʋ nʋɔ sɩɛrʋ,
14 ʋ ɓɩdííli sɩ́ bɩrsɛ ʋ lówíé sɩɛrʋ,
ʋ sɩ́ bɩrmɛ́ bɔsɔ huõno a mɩ́nʋ́ sɩɛrʋ.
15 Ʋ líŋ kuóɓɩɛ, ʋ sɩɛ́ sɩ́ tʋ́ɔ́sɩ́wɔ́,
Wɩɩsɛ sɩ́ kuóríwó ʋ file mí.
16 Ʋ cʋ́ʋ́sɛ́ bɔŋsa huõno,
kaɓaa nedulí sɩɛ́ sɩ́ ɓʋ́ʋ́.
17 Ʋ sɩ́ɩ́ baá waá a rʋ́ʋ́ ná tʋʋ arɩ́ nɛ́'ɩ́lnʋʋ
haá pálɛ́ anɛ nyii ɛ́ rá má polo ɛ́ rá má polcʋ́ɔ́rɛ nyii.
18 Ʋ sɩ́ tɛ ɓɩɛ ná wuu ʋ há kéné, rʋ́ʋ́ há wʋ́ɔ́ die,
ʋ há yɛ́llɛ ná ɓɩɛ́ ná, ʋ wʋ́ɔ́ dií ná wér.
19 Bee wɩ́ɛ́, ʋ gɛ́rɛ nɩyáára, a vɛ́wɔ́ tá,
ʋ la jɩɩsɛ ná ʋ rá há wɩ sɔ́ɛ́.
20 Ʋ waá vɔkɛ,
ʋ wɩ lóé rɩ́ óŋ kaanɛ́ a tɩ́ŋʋ́ óŋhɩɩ̃nɔ ná wɩ́ɛ́,
21 ʋ dídaarɔ́ ná wɩ nɛ́ŋ wuu tɛ́ɛ́;
ʋ wér díí ná sɩɛ́ wáá a rʋ́ʋ́ daanɛ́.
22 Ɓɩɛ há vɔkɛ nɩbɔmɔ tɛ́ŋ ná mɛ́ nɛ́ sazɔkɔ́ má sɩ́ pérú;
wɩ́halawa rɩ́wɔ́ duó sɩ́ púú.
23 Tɛ́ŋ ná mɛ́ ʋ háá já rʋ́ʋ́ file sú,
Wɩɩsɛ cɔ́wɩ́ɩ́lɩ́zeno sɩ́ cɩ́nʋ́ mɛ́;
a túwú tɛŋnamɩ́ɛ́ nyúú anɛ duóŋ.
24 Rʋ́ʋ́ nɛ́ fɛ́ɛ́ rʋ́ʋ́ lú lɛ́ hɔ́ɔ́ láála mɛ́,
bʋrɔzɛ tuhɛ́ŋ sɩ́ zʋ́ʋ́ a líísi.
25 Rʋ́ʋ́ nɛ́ curi tuhɛ́ŋ ná ʋ tɛŋ mɛ́,
arɩ́ hɛ́ŋ ná ʋ cɔ́ɛ́ mɛ́;
héwíŋ sɩ́ kánʋ́.
26 Bino rɩ́rʋ́ duó wuu nɩ́ɩ́ dɛ́llʋ́ kuóɓɩɛ́,
Níŋ ná nɛ́ŋ rá há wɩ marɛ́ sɩ́ dúú,
ká rɩ́ óŋ ná há káánʋ́ taŋtɛ sɩɛrʋ bɩrmɛ óŋyɔ́ɔ́.
27 Bána sɩ́ a rʋ́ʋ́ (nɩbɔmɔ) wɩ́zɔkɩ́ nyɩ́ɩ́sɛ,
tíé sɩ́ isi cɩ́nʋ́ mɛ́.
28 Wɩɩsɛ cɔwɩɩlɔ́́ kal,
ʋ jaa ɓɩɛ́ sɩ́ píésí, a col.
29 Kér Wɩɩsɛ há bil nɩbɔmɔ mɛ́ nɛ́ ɛ́,
liwe ná Wɩɩsɛ há bɩ́ɩ́nɛ́ rʋ́ʋ́ pɔ́ʋ́ nɛ́ ɛ́.