Zɔɔbɛ nʋlɩsɔ́ tʋkɛ́: Ŋ laataarɔ́ sɩ́ hé nɛ́sɛ dɩgirsí mí
19
1 Ɛ́ nɛ́ Zɔɔbɛ lɩ́sɛ nʋɔ a bʋ́lɛ́:2 Tɛ́ŋ bee mí rí, rɩ́ɩ́wa lóŋ sɩɛrʋ zɔkɛ́
a sɩ́ŋ wálmʋ́ rɩ́rɩ́ɩ́wa wɩ́bʋlɛ́>>
3 Naasɩ́ fí ní nyɛ, ɩ́ há tʋ́ksɩ́ŋ,
ŋ bɛ́ŋsɛ́ wɩ hɩ́ɩ́sɛ kéné pɛ́ɩ́wa>>
4 Rɩ́ŋ nɛ́ ɓɩ́ɛ́na fa tɛ́lɛ́,
ŋ tɛ́lɛ́ káŋ nyúú wɩ́ɩ́ rɛ́.
5 Rɩ́ɩ́wa nɛ́ ɓɩ́ɛ́na a nyʋ́kɔ́ cɩ́nɩ́ŋ mɛ́,
rɩ́ɩ́wa nɩ́ɩ́ wɩ́ɛ́ gáásɛ ŋ rɩ́, ŋ hɩ́ɩ́sɛ ná wɩ́ɛ́,
6 ɩ́ zɩŋ rɩ Wɩɩsɛ nɩ́ɩ́ bɛ́ŋsɩ́ŋ,
ʋ nɛ́ yo fiilewa (ŋmɛ́bára) tɔ́ŋ mɛ́.
7 Rɩ́ŋ nɛ́ cááse ɓa háá bɛ́ŋsɩ́ŋ wɩ́ɛ́,
nɛ́ŋ wɩ nʋɔ lɩ́sɛ́ aá páŋ;
rɩ́ŋ nɛ́ búŋse aá já saŋɛ má,
nɛ́ŋ toó aá bʋl taŋá.
8 Wɩɩsɛ tɔ́ŋ ŋmɛ́nɔ, ŋ báá wɩ wúó dáárɛ,
ʋ hé bino ŋ ŋmɛ́ŋwɩɛla mɛ́.
9 Ʋ dɔlɩ́ŋ (ɛ́ɛ́ ŋ baá wɩ píŋ)
ʋ wúrí kuónéŋcú ŋ nyúú mí (tʋ́ɔ́mɩ́ŋ yɩr).
10 Ʋ zɔkɩ́ŋ sɩ́ɛ́ arɩ́rɩ́ŋ har wuu ní, ká ŋ rɩ́ sʋʋ a tɛ́sɩ́ɩ́;
ʋ ɔ́ɔ́ ŋ baá wɩ yɩɛla kéné, anɛ tuu ná ɓa há cure.
11 Ʋ dí cɔ́ɛ́ cɩ́nɩ́ŋ mɛ́,
ʋ píŋ mákʋ́ dɩŋdɔŋ oro rí.
12 Ʋ lalyoore ní hé náŋá mɛ́ aá ko,
ɓa yɛ́l ŋmɛ́nɔ́ a ko yakɩ́ŋ mɛ́
ká cíkwó púl a kílíŋ taŋtɛ.
13 Wɩɩsɛ ɔ́ɔ́ ŋ maábinaŋá kɛ́kɩ́ŋ mɛ́.
ŋ bɩrmɛ nɩɛ ná há ɩ̃́ŋ nɩfáálɛ.
14 Ŋ laka nɩɛ vɛ́ŋ tá,
ŋ nɩzɩmɛ́ sʋ́llɩ́ŋ wɩ́ɛ́.
15 Nɩɛ ná ŋ fa há cakɛ aá láŋ jaa mɛ́
arɩ́rɩ́ŋ toltʋtʋnna píŋ makɛ nɩhʋɔ́r rɛ́;
Ŋ ká nɩhʋ́ɔ́r rɛ́ ɓa sɩ́ɛ́ mɛ́.
16 Ŋ yɩ́rɩ́ŋ tʋtʋnnɛbáálɔ, ʋ sáŋɛ́,
ŋ wúríŋ nʋɔ jɛ́nnʋ́ má tɩɩ.
17 Ŋ sɔ́ŋ ɔ́ɔ́ ŋ háálɔ wɩ́ŋ wúó pérí,
ŋ bɛlɛ má tɩɩ sɩɛrʋ lɩ́ŋ.
18 Heŋbolwíísi má tɩɩ bel aá guóníŋ;
rɩ́ŋ nɛ́ isé, ɓa bʋl wɩ́ɛ́ aá cɩ́nɩ́ŋ mɛ́.
19 Nɩɛ ná ŋ fa há bʋ́lɩ́ŋ wɩ́féŋse aá pɔ́wɔ́ sɩɛrʋ lɩ́ŋ.
Nɩɛ ná ŋ há cówó, bɩ́rɔ́ a cɩ́nɩ́ŋ mɛ́.
20 Ŋ heŋgbele dʋŋɔ nɛ́ káánɛ́,
wɩ́hala há dáárɩ́ŋ mɛ́, ŋ oŋ wuu baá wɩ káánɛ́.
21 Ɩ́ fáŋ súsú, ɩ́ é ŋ naŋnɔŋsɛ, ɩ́ fáŋ súsú,
bee wɩ́ɛ́, Wɩɩsɛ nɛ́sɛ nɛ́ fɩ́rɩ́ŋ.
22 Bee rí tɛ, ɩ́ kír tɩ́ŋɩ́ŋ mɛ́ anɛ ɛ́ Wɩɩsɛ há kíré tɩ́ŋɩ́ŋ mɛ́>>
Ɩ́ wɩ́ŋ namɩ́ɛ́ vɔkɛ nɛ́>>
23 Rɩ́ŋ wɩ́bʋlɛ́ fa wuolo aá pʋ́ŋsɛ́ rɛ́,
rɩ́wɔ́ fa túúri hé kɛnɔ sɩɛrʋ!
24 Rɩ́wɔ́ fa pi hɔɔ ná kéŋ nʋɔ (hɔɔ dawie) arɩ́ pʋlɔŋ a túúríwó
a hé bʋ́ɩ́ daha,
rɩ́wɔ́ káánɛ ráŋ a kaá mʋ́ wuu!
25 Ŋ é taŋá ɩ́ɔ̃́ pʋmmɩ́, rɩ́ŋ laataarɔ́ há wómmó,
ʋ nɛ́ sɩ́ tɩ́ŋ har tíé nyúú, a isí cɛ́ daha,
26 ŋ namɩ́ɛ́ zɔkɛ har mɛ́;
rɩ́ŋ ná Wɩɩsɛ, ŋ tɛŋ sɩɛrʋ.
27 Ʋ ká ɛ́ nɛ́, ŋ sɩ́ nóú,
ŋ sɩ́ɩ́ sɩ́ nóú, nɛ́ŋ nɔ́ŋ rá;
Ŋ dɛ́llʋ́ rɩ́rɩ́ŋ sɩɛrʋ wuu, a bol ɓóŋ
28 Rɩɩ́wa nɛ́ bɔsɛ rɩ́ɩ́ bʋ́lɛ́: «Bee rí tɛ á kir tɩ́ŋʋ́ mɛ́>>»
ɛ́ mɛ́ nɛ́ rɩ́wɔ́ zɩ́mɩ́ŋ wɩ́kanɩ́ mʋ́l.
29 Ɩ́ fa tokówí héwíŋ,
beé wɩ́ɛ́, cɔ́wɩɩlɔ́ ká wɩ́zɔkɩ́ ná há kéŋ tokówí aá ko ní;
ɩ́ sɩɛ́ sɩ́ zɩ́ŋ rɩ́ sarɩ́ya díí mɩnɔ́!