Zɔɔbɛ nʋlɩsɔ́ dɩtenni: Zɔɔbɛ gáásɛ wɩ́ɛ́, nɩbííno mɩɩsɛ kul wɩ́ɛ́
14
1 Háálɔ nɛ́ lʋ́l nɩbííno.Ʋ mɩɩsɛ ká kulé, kɔ́ʋ́ wɩ́hala zeno kɩ́ŋkáŋ.
2 Ʋ nɩhɩ̃́ fɩɩl nɛ́, a puri kaá zɛ́kɛ;
ʋ nɩhɩ̃́ tufɩ́ɛ́l háá fɛ́ ká waá cɛ́ nɛ́.
3 (Ŋ tɩ́na Wɩɩsɛ), ʋ mɛ́ nɛ́ sɩɛ́, ɩ sɩ́ɛ́ cɔ́!
Ŋ nɛ́ ɩ sɩɛ́ ká aá dí sarɩ́ya>>
4 Áŋ rɛ́ wo omo ná há wɩ busunnú kéné aá lɩ́sɛ
omo ná há kéŋ busunnú sɩɛrʋ>> Nɛ́ŋ toó.
5 Rɩ́ɩ́ nɛ́ lɩsɛ nɩbííno tápʋ́lɛ́ nʋɔ;
rɩ́ɩ́ nɛ́ mákʋ́ caŋsɛ nʋɔ,
rɩ́ɩ́ nɛ́ mákɛ tɛ́ŋ ná ʋ wʋ́ʋ́ mɩ́ɩ́ dáárɛ,
6 ɩ lɩ́sɩ́ sɩ́ɛ́ ká tɔ́ʋ́ rʋ́ʋ́ fɩ́ɛ́lɛ;
a makɛ rʋ́ʋ́ sɩɛrʋ tɔ́rʋ́ tápʋ́l fɩ́ɛ́lɩ́ anɛ tumpáárɔ.
7 Tuu é kéŋ yɩɛla:
rɩ ɓa nɛ́ ɓáʋ́, ʋ sɩ́ bɩr pó,
ʋ hilli wɩ pa'ɔ́lma mɩ́ɩ́ ɓɩllɛ;
8 rʋ́ʋ́ nalúre nɛ́ nɩ́ɩ́nɛ tíé mí má,
rʋ́ʋ́ múkur nɛ́ sʋwɛ kúŋkulo sɩɛrʋ,
9 ká rʋ́ʋ́ ná nyii, ʋʋ́ puósi ní (bɩr'isi)
a ɓá hilli anɛ tupʋla.
10 Amá rɩ́ nɩbííno é sʋ́wɔ́, ʋ dóé tenno ní;
rɩ nɩbííno sʋ́wɔ́, ʋ mɩ́ŋ nɛ́ɛ́>>
11 Mʋʋ nyii há palɛ col,
fonni nyii hʋ̃́ʋ̃́sɛ́, a hɩl;
12 ʋ ká ɛ́ nɛ́ pá nɩbííno, rʋ́ʋ́ sʋ́wɔ́ ʋ baá waá isí;
rɩ́ bána nɛ́ mɩnɛ́ é rɩ́ɩ́ kaá mʋ́ wuu, ʋ wɩ bɩrɛ aá isé kéné,
ʋ baá wʋ́ʋ́ (hatɩŋnnɛ) dóŋ ná míí isí.
13 Hʋ̃́ʋ̃́! Rɩ́ɩ́ fa kéníŋ féŋsi lɛ́lɛ́tɔ́ɔ́ mɛ́ rɛ́,
rɩ́ŋ fa féŋsi ráŋ a kaá jɛ́ɩ́ cɔ́ɛ́ pɔ́rɛ́,
rɩ́ɩ́ nɛ́ fa páŋ tɛ́ŋ, ká rɩ ɛ́ har mɛ́
rɩ́ɩ́ baá fa bɩrɛ líísíŋ wɩ́ɛ́!
14 Rɩ nɩbííno nɛ́ fa sʋ́wɛ́, ká baá hihiẽsi,
ŋ fa sɩ́ dɛ́llɛ, ŋ tʋtʋmɛ́ tɛ́ŋ wuu mí,
a kaá já rɩ́wɔ́ láŋ mɛ́.
15 Ɛ́ mɛ́ nɛ́, rɩ́ɩ́ sɩɛ́ fa yɩrɩ́ŋ rɩ́ŋ saŋ,
ɩ sɩɛrʋ fa sɩ́ zɔ́kɩ́ nɛ́sɛ tʋtʋmɛ́ nyúú.
16 Mʋ́l né mí sɩɛ́, ɩ haá dɩ́ɩ́sɩ́ŋ nabuke (bélíŋ navalɛ́) wuu,
ɩ baá wɩ́ŋ wɩ́zɔkɩ́ é gieli.
17 Ŋ wɩ́zɔkɛ́ fa sɩ́ mɩ́ŋ púr sɩɛrʋ,
ká rɩ́ɩ́ fa mʋ́ʋ́rɩ́ŋ wɩ́bɔma tá.
18 Amá paalɔ́ ɓal, a buksi,
bʋ́ɩ́ gɩ́ɩ́kʋ́ dɩmɩnɩ́ mɛ́.
19 Nyii lɩ́ɛ́rɛ dɔ́wʋ́ɔ́,
nyigire pɩpá tíé kúŋkulo;
ɛ́ tɩɩ nɛ́, ɩ a nɩbííno yɩɛla yʋ́yʋ́ksɛ.
20 Ɩ cɩ́nʋ́ mɛ́ déŋdéré, ʋ col;
ɩ zɔ́kʋ́ sɩ́ɛ́, ká kírú tá.
21 Rɩ́ ɓa píŋsú bɛlɛ má, ʋ wɩ ɛ̃́;
rɩ́ ɓa hɩ̃́ɩ̃́sɩ́wɔ́ má nɛ́, ʋ wɩ ɛ̃́.
22 Ʋ tɩɩ tɛŋnamɩ́ɛ́ wɩ́ɛ́ nɛ́ ʋ dídí wɩɩla,
ʋ tɩɩ wɩ́ɛ́ nɛ́ ʋ híhííni.