ZƆƆBƐ RƖ́RƲ́ NAŊNƆŊSƐ NÁ BOTORO BƖSƐ WƖ́Ɛ́
A pɔ́ sapíítir 3-31
Zɔɔbɛ wɩ có rʋ́ʋ́ fa ko tɔ́ɔ́
3 «Aa! Rɩ́ŋ tápʋ́lʋ́lɩ́ yɩr yʋ́ksɛ
arɩ́ tɩ́táŋ ná ɓa há sɛ́: “Heŋbole rí ɓa lʋ́l”!
4 Rɩ́ ɛ́ kal nɩ́ɛ̃́sɛ tɩ́tabino!
Rɩ́ bána nyúú Wɩɩsɛ púú makɛ yɔ́ɔ́!
Rɩ́ pʋmmʋ oro wuu sʋ́ʋ́ cáánʋ́!
5 Rɩ́ bino arɩ́ sʋʋ cúúnó tɔ́ʋ́ mɛ́
ká rɩ́ dóbáŋbino má tɔ́ ɛ́ kal mɛ́,
ɛ́ rá má rɩ́ bino ná há kéŋ héwíŋ tɔ́ ɛ́ tápʋ́l mɛ́!
6 Rɩ́ ɛ́ tɩ́táŋ bino kɩ́llɛ náŋa ná wuu,
rɩ́ ɓa baá sʋ́ʋ́ é dɩ́ɩ́sʋ́ bɩŋsɛ tápʋ́lɛ́ sɩɛrʋ,
a baá sʋ́ʋ́ dɩ́ɩ́sɛ caŋsɛ tápʋ́lɛ má sɩɛrʋ!
7 Taŋá wuu, rɩ́ ɛ́ tɩ́táŋ a tɩ́tapɩrɩ́ a kaá mʋ́ wuu
ká rɩ́ satɔɔrɩcááse wuu sɩ́ mɩnʋ́ ɛ́ tɩ́táŋ.
8 Rɩ́ nɩɛ ná há bʋ́rɛ́ aá hé tápʋ́lɛ́ mɛ́,
rɩ́ nɩɛ ná há kéŋ Dɩragɔŋ ɓɩzeno aá tʋ́ŋ,
rɩ́wɔ́ bʋrɛ a hé tɩ́táŋ ná ɓa há lʋ́lɩ́ŋ mɛ́!
9 Rɩ́ ɛ́ tɩ́táŋ tɩ́tápʋ́lla caŋwʋ́llɛ biri!
Rɩ́ ɛ́ tɩ́táŋ dɛ́llɛ pʋmmɔ, amá rʋ́ʋ́ sʋ́ʋ́ ná,
a sɩ́ tɩ́tápʋlla pʋmmɔ ná!
10 Beé wɩ́ɛ́, ʋ wɩ lówé kɛ́rɩ́ŋ dúníé kóé mí,
beé wɩ́ɛ́, ʋ wɩ kɛ́rɛ́ rɩ́ŋ sɩ́ wɩ́ɩ́la ná.
11 Beé rí tɛ́, ŋ wɩ́ŋ maá luori mí sʋ́wɛ́,
beé rí tɛ́, ŋ wɩ sʋ́wɛ́ ŋ há kúé aá lɩ́ŋ má luoru mí>>
12 Beé rí tɛ́ ŋ ná naasɛ ɓa cakɛ láŋ
arɩ́ ɩ́lla há dɩ́ɛ́sɩ́ŋ>>
13 Nyɛ mɛ́, ŋ fa pɩ́nɩ́ŋ lɛ́lbule mí cɩ́m;
ŋ fa pɛ́ dóŋ, aá fɩ́ɛ́lɛ,
14 ŋ rɩ́ kuóre arɩ́ tíé nyúú cɩ́cáánɛ,
fa há sɔ́ jɩpiŋe a pɔ́wɔ́ tɩɩ,
15 arɩ́ nɩpiŋe ná fa kéŋ salmɛ,
arɩ́ warɛ onni ɓa súwó jɩɩsɛ.
16 Ɛ́ rá má, rɩ́ŋ fa sɩ́ mɩ́nʋ́ má tɩɩ,
anɛ bio há tóú ʋ maá luori mí, anɛ bɛlɛ nyáŋ há wɩ pʋmmɩ́ néé ná ɓa ko lɩ́ɩ́ mɛ́.
17 Nɩbɔma baá wɩ nɛ́ŋ walmɛ́ lɛ́lbulli sɩɛrʋ,
ráŋ nɛ́ nɩɛ ná há bɔ́lɛ́, a wɩ dóé kéné fɩfɩ́ɛ́lɛ́.
18 Ráŋ, bɩnajaa nɩɛ má kéŋ tɛŋfɩ́ɛ́l,
ɓa baá wɩ nɛ́ŋ ná háá fɩ́ɩ́sɩ́wɔ́ liŋó dɔ́mɛ́ nɛ́;
19 heŋbíísi arɩ́ nɩhɩ́ɛ̃́sɛ mɩ́ŋ ráŋ,
yomó lɔ́ʋ́ tɩɩ ʋ nyúútɩ́na nɛ́sɛ mɛ́.
20 Beé rí tɛ́ wɩ́lnáárɛ ká mɩɩsɛ,
nɩɛ ná há mɩŋ wɩ́hala mɛ́ híhiẽsi,
21 aá dɛllɛ sʋʋ, kɔ́ʋ́ waá ko
a jɔ́ʋ́ aá kɩ́llɛ oŋpiŋe wuu duó,
22 ɓa tɛŋ sɩ́ pɔrɛ́
rɩ́wɔ́ cáásɛ jʋ́ɔ́sɛ arɩ́ satɔrɔ́ rɩ́ ɓa nɛ́ kéŋ lɛ́lbulli!
23 Beé rí tɛ́, Wɩɩsɛ lo nɛ́ŋ ná ŋmɛ́nɔ́ há féŋse ká mɩɩsɛ,
ʋ kɛ́rʋ́ mɛ́ anɛ zeŋe cɔ́ɔ́ wuu>>
24 Hííne ní káŋ ɓɩdííli,
ŋ wɩ́halwííle lɩ́lɛ́ anɛ nyii.
25 Wɩ́ɩ́ ná hewíŋ há kéníŋ, ʋ nɩ́ɩ́ péríŋ
wɩ́ɩ́ ná ŋ fa háá fɛ́ɛ́, ʋ nɩ́ɩ́ díŋ!
26 Ŋ wɩ́ŋ tɩɩ tɛ́, ŋ wɩ tɛŋfɩ́ɛ́l arɩ́ fɩ́ɛ́la kéné,
amá tɛ́ŋ wuu mí, wɩ́halawa níí púŋ.